Десет лица треба да се појават на суд во Париз денес под обвинение за сексистичко онлајн-вознемирување на Брижит Макрон во најновиот случај предизвикан од години неосновани тврдења за полот на првата дама на Франција.

Судењето доаѓа неколку месеци откога Брижит и претседателот Емануел Макрон поднесоа тужба за клевета во Соединетите Американски Држави поради шпекулации на интернет дека Брижит Макрон е родена како маж. Неоснованите тврдења ја следат претседателската двојка со години, со постојани коментари за нивната 24-годишна разлика во години.

Десетте обвинети, осум мажи и две жени, на возраст меѓу 41 и 60 години, се обвинети за онлајн-вознемирување на Брижит Макрон и се соочуваат со затворска казна до две години доколку бидат осудени. Според обвинителите, обвинетите објавиле многубројни злонамерни коментари за полот и за сексуалноста на првата дама, а некои ја поврзуваат нивната разлика во години со педофилија.

Брижит Макрон поднесе кривична пријава во август 2024 година, што доведе до истраги и апсења во декември 2024 година и февруари 2025 година. Нејзиниот адвокат не одговори на прашањата на АФП, а не е познато дали првата дама ќе се појави на рочиштата.

Меѓу обвинетите е и Орелиен Поарсон-Атлан, 41-годишна специјалистка за маркетинг, позната на социјалните мрежи со псевдонимот Зои Саган, често поврзана со кругови на теоретичари на заговор. Обвинета е и Делфин Ж., 51-годишна жена, која вели дека е духовен медиум и онлајн се претставува со името Амандин Рој.

Во 2021 година таа објави четиричасовно интервју со „независната новинарка“ Наташа Реј на својот јутјуб-канал, во кое тврдеше дека Брижит Макрон, моминско Троње, всушност, е Жан-Мишел Троње, што е името на брат ѝ.

Теориите дека Брижит Макрон наводно е родена како маж се појавија за време на претседателската кампања на Макрон во 2017 година, а во последните години беа ширени од крајнодесничарските и од заговорничките кругови во Франција и во САД, каде што правата на трансродовите лица станаа клучно социо-политичко прашање.

Во јули претседателскиот пар поднесе тужба за клевета во САД против конзервативната водителка Кандис Овенс, која продуцира серија наречена Becoming Brigitte и тврдеше дека првата дама е родена како маж. Нивниот американски адвокат рече дека Макрон ќе презентира научни докази и фотографии на судот за да ги побие овие тврдења.