Големо мнозинство Украинци (87 %) веруваат дека Русија нема да застане на моментно окупираните територии и планира да ја продолжи својата агресија, се вели во истражувањето на Меѓународниот институт за социологија во Киев (КИИС), објавено денеска.

Овие резултати беа објавени во време кога американскиот државен секретар Марко Рубио рече дека Украина треба да направи територијални отстапки како дел од можниот договор за прекин на војната.

Повеќето Украинци стравуваат од понатамошна агресија.

80 % од испитаниците во источните и јужните региони и 89-90 % во централна и западна Украина веруваат дека Москва нема да застане на сегашната линија на фронтот.
66 % од испитаниците веруваат дека крајната цел на Русија е уништување на Украина.
28 % веруваат дека целта е физички геноцид врз Украинците.
38 % веруваат дека Москва сака да ги елиминира украинската државност и идентитетот.
14 % веруваат дека Русија планира да го окупира поголемиот дел од Украина и да постави марионетска влада.
7 % веруваат дека целта на Русија е само да ја консолидира контролата над регионите Донецк, Луганск, Херсон и Запорожје.
Само 4 % од испитаниците веруваат дека Москва сака да ги задржи сегашните територијални придобивки, а 3 % го прифаќаат рускиот наратив за деназификација и демилитаризација на Украина.

Овие наоди се совпаѓаат со изјавите на рускиот министер за одбрана Андреј Белоусов, кој на 16 декември 2024 година изјави дека Москва планира да ги освои сите окупирани територии во 2025 година.

Истражувањето е спроведено преку телефонски интервјуа во периодот од 14 февруари до 4 март, со 1.029 испитаници на возраст над 18 години во сите региони под контрола на украинската влада.

Резултатите доаѓаат откако расте загриженоста дека американскиот претседател Доналд Трамп би можел да принуди брз крај на војната на начин што е неповолен за Украина, што би можело да ја остави земјата ранлива на идни руски напади.

Претседателката на Европската комисија, Урсула фон дер Лајен, денеска повика на зголемени инвестиции во европската одбрана и изградба на Европската одбранбена унија, која обезбедува мир преку единство и сила, велејќи дека времето на илузиите заврши.

„Европскиот безбедносен поредок е разнишан, а многу од нашите илузии се уништени“, рече Фон дер Лајен во Европскиот парламент во Стразбур за време на дебатата за состаноците на Европскиот совет и европската безбедност.

Во овој контекст таа изјави дека, по крајот на Студената војна, некои верувале оти Русија може да се интегрира во европската економска и безбедносна архитектура, а други се надеваат дека ЕУ може на неодредено време да се потпира на целосната американска заштита и дека ги намалила трошоците за одбрана.

„Времето на илузии сега заврши. Европа е повикана да преземе поголема одговорност за својата одбрана. Не во некоја далечна иднина, туку денес. Не со постепени чекори, туку со храброст што ја бара ситуацијата.

Ни треба нагло зголемување на европската одбрана. И ни треба сега“, рече таа. Во исто време оцени дека има итна потреба да се пополнат празнините во снабдувањето на украинската војска и да се обезбедат цврсти безбедносни гаранции на Украина.

„Но, овој момент на пресметка не се однесува само на Украина. Се работи за безбедноста на цела Европа и на целиот наш континент“, изјави Фон дер Лајен. Таа го обвини рускиот претседател Владимир Путин дека постојано докажува дека е непријателски сосед тврдејќи дека нему не може да му се верува, само може да му се одвлече вниманието.

Фон дер Лајен зборуваше и за нејзиниот план за повторно вооружување на Европа, вреден до 800 милијарди евра, и заклучи дека сите сакаме да живееме во помирни времиња. „Време е да се изгради европска одбранбена унија, која обезбедува мир на нашиот континент преку единство и сила.

Ова е моментот на Европа. И Европа ќе се издигне до тоа“, рече Фон дер Лајен. Претседателот на Европскиот совет, Антонио Кошта, оцени дека ЕУ живее во одлучувачки момент и дека се соочува со чувство на итност. „Геополитичките тензии се зголемија во последните недели. Мултилатерализмот е под огромен притисок, како и меѓународниот поредок заснован на правила“, рече Кошта.

Тој додаде дека безбедноста на Украина и Европа не може да се разделат и рече дека Европскиот совет ќе работи на нови иницијативи насочени кон одговор на итните потреби со кои се соочува Украина во однос на војската и одбраната.

„Истовремено, ние сме подготвени да ја поддржиме Украина кога ќе одлучи да почне преговори за да постигне траен, праведен мир.

Ги охрабруваме нашите партнери да ја поддржат Украина“, нагласи Кошта и додаде дека „Европа на одбраната и просперитетот“ ќе биде дел од неговиот мандат.

Полскиот министер за ЕУ ​-прашања, Адам Шлапка, изјави дека само сеопфатен, праведен и траен мир за Украина може да стави крај на војната.

„За мир преговараа Украина и нејзините легитимни власти предводени од претседателот Володимир Зеленски. Мир, кој вклучува Европејци, чија безбедност без сомнение ќе биде засегната. Мир заснован на силни безбедносни гаранции“, рече Шлапка, пренесува „Танјуг“.

Чарлс Грасли, најстариот актуелен сенатор на САД и најдолговечен републиканец во историјата на американскиот Конгрес, синоќа говореше од говорницата на американскиот Сенат.

Во својот говор сенаторот Грасли од сојузната држава Ајова укажа на ситуацијата во Босна и Херцеговина, како и на активностите на Милорад Додик, наведувајќи дека „ќе работи со администрацијата на Доналд Трамп за да обезбеди продолжување на притисокот врз Додик и неговите сојузници“ да ги почитуваат мировните договори со кои ставија крај на насилството во 1995 година, пренесува N1.ba.

На почетокот на својот говор еден од најистакнатите републиканци потсети на геноцидот во Босна и Херцеговина и изјави дека тоа се случило поради луѓе како Додик, а неговиот претходник Радован Караџиќ издржува доживотна казна затвор за воени злосторства и геноцид.

Во својот говор тој потсети и на мировните договори со кои беше ставен крај на тој геноцид.

„Со години лидерите на српскиот ентитет на чело со Додик се закануваат со отцепување. Запомнете дека во 90-тите имаше војна и геноцид поради луѓето како Милорад Додик, кои се однесуваа како сега. Неговиот претходник Караџиќ издржува доживотна затворска казна за воени злосторства, злосторства против човештвото и геноцид. Многу Босанци настрадаа во тоа страшно етничко насилство, кое не смее да се повтори“, изјави сенаторот, а пренесува „Вјести.ба“.

Тој рече дека босанско-американските граѓани во Ајова, неговите избирачи, се длабоко загрижени. Тој ги поддржа ставовите на државниот секретар Марко Рубио. Грасли додава дека САД внимателно следат кој го поддржува етничкиот сепаратизам во Босна и во регионот и дека тоа нема да заврши добро за нив.

Тој потсети дека Додик е осуден за неуставни дејства со отфрлање на авторитетот на босанските државни институции.

„Националното собрание на РС усвои закони со кои се забранува работата на државните институции. Ова е многу загрижувачко. САД презедоа акции преку Рубио покажувајќи дека тоа е приоритет на администрацијата на Трамп. Многу внимателно ја следам ситуацијата. САД набљудуваат кој ја поддржува стабилноста и кој спроведува етнички сепаратизам и потенцијален геноцид што може да се повтори. Запомнете дека не заврши добро за нив. Ќе работам со администрацијата на Трамп за да се осигурам дека ќе продолжам да вршам притисок врз г. Додик и неговите сојузници да престанат и да ги почитуваат мировните договори,, кои ставија крај на насилството во 1995 година“, заклучи тој.