Патниците што доаѓаат во Франција од земји што не се членки на Европската Унија веќе нема да можат да влезат во земјата со негативен резултат на брз, лесно достапен тест на Ковид-19.

Според новите правила, кои стапуваат на сила на 18 јануари и се претставени во документ на француската влада, луѓето повеќе нема да можат да користат антигенски и други брзи тестови кои даваат резултат за неколку минути.

Како што објаснува Ројтерс, тие брзи тестови во голема мера ги користеле возачите на камиони, кои превезуваат стока преку Ламанш.

Во изминатите неколку недели, Франција побара од луѓето што влегуваат во земјата од Велика Британија да докажат дека немаат коронавирус.

Првите количини на кинеската вакцина против коронавирусот на компанијата „Синофарм“ ќе пристигнат утре во Србија, објавија повеќе српски медиуми.

„Новости“ пишува дека Агенцијата за лекови и медицински помагала (АЛИМС) сè уште нема издадено дозвола за употреба на кинеската вакцина, но се очекува наскоро да биде дадена.

Најверојатно в недела со кинеската вакцина ќе почне имунизацијата на здравствените работници кои изјавија дека сакаат да се вакцинираат.

Во Србија во тек е имунизација со вакцината на Бионтек/Фајзер и со руската вакцина „Спутник 5“.

Рускиот специјалист за особено опасни инфекции, доктор на медицински науки Владислав Жемчугов, рече дека нè очекува нов бран на коронавирусот напролет, бидејќи дотогаш ќе се формира доволно ниво на имунитет кај населението.

„Напролет нема да има бран на коронавирусот, имунолошкиот слој веќе ќе биде таков што вирусот нема да може да помине. Кој ќе се разболи? Нови пациенти. Зошто Кинезите се плашат толку многу? Затоа што малку луѓе ја преболеа короната, а народот е многуброен“, рече Жемчугов.

Според него, сончевото време ќе игра улога и напролет, бидејќи ултравиолетовото зрачење е смртоносно за вирусот.

Имунологот посочи дека падот на бројот на пациенти во Русија ќе продолжи уште две недели. Тој рече дека ниските температури не се погодни за вирусот и тој практично не се шири на улица. Жемчугов додаде дека на ситуацијата нема да влијае ниту ширењето на британскиот вид коронавирус.

Докторот по биолошки науки, вирологот Алексеј Аграновски, од своја страна, рече дека е малку веројатно студеното време да ја зголеми или намали брзината на ширење на коронавирусот, бидејќи луѓето обично не се заразуваат на отворено.