Поголем број членови на ВМРО-ДПМНЕ од Општинскиот комитет Аеродром одлучија да ја поддржат идејата и иницијативата за свикување вонреден конгрес на партијата.

„Меѓу нас има членови на општинскиот комитет, претседатели на месни комитети, како и обични активисти. Поддршката на идејата за свикување вонреден конгрес во ОК Аеродром е голема. Партијата е во очајна состојба. ВМРО-ДПМНЕ никогаш не било послабо. Никогаш во историјата на партијата немало ваква разединетост помеѓу членовите, како и меѓу членовите и раководството. Ова се само некои од причините поради кои решивме јавно да проговориме и да се обидеме нашиот глас да стигне до раководството на партијата. Раководството е целосно дистанцирано од комитетите и членството, како да се затворени во стаклено ѕвоно.

Сметаме дека одржувањето вонреден конгрес е единствениот начин да ја спасиме партијата, која е тргната кон амбис. Доколку не се преземат брзи чекори за крупни реформи и преиспитување на правецот во кој се движи партијата, сметаме дека постои реална опасност партијата да западне во уште потешка криза. Се надеваме дека оваа наша порака ќе стигне до претседателот на партијата и ќе ја прифати идејата за одржување вонреден конгрес“, се вели во соопштението на Јоаким Димулков, член на ВМРО-ДМПНЕ од Аеродром.