Бојан Стојаноски, пратеник од редовите на ВМРО-ДПМНЕ, имаше свое обраќање на денешната 71 седница во Собранието посветена за пратенички прашања, при што првото пратеничко прашање го упати до претседателот на Владата, Христијан Мицкоски. Стојаноски посочи дека во изминатиот период, Мицкоски, се соочува со критики и праќање на отворени писма од страна на јавните обвинители и судии кои, како што рече, сметаат дека најважната работа во реформите кон правосудството треба да биде покачувањето на нивните плати.

„Кој е вашиот став како Влада по однос на реформите и добро е да се објасни колку средства од Буџетот се издвојуваат за да овие луѓе коишто ве критикуваат, ви праќаат отворени писма и ете земаат плати, затоа што не сметам дека тоа е некое прашање коешто треба да се игнорира како што тие бараат. И на крајот од денот прашањето е какво покачување сте припремиле вие како Влада да им испорачате на нив, нормално земено низ призма на тоа какви резултати испорачуваат и тие, и колку граѓанството е задоволно од нив?“, праша Стојаноски.

Второто пратеничко прашање, Стојаноски исто така го адресира до претседателот на Владата, и кажа дека во Собранието во моментот е актуелно носењето на Буџетот за 2026 година и дека веќе 11-ти или 12-ти ден дебатираат на Комисијата за финансирање и буџет и истакна дека опозициската СДС има припремено само 3-4 тези кои ги изнесува човекот број 2 во Владата на Заев и Ковачевски, човекот којшто е одговорен за економски политики, зборуваат луѓе, за кои како што рече 7 години една шајка не заковале.

„Дали македонските граѓани и Република Македонија ќе може да се надеваат на завршување или отпочнување на нови капитални проекти за 2026 година, бидејќи стратегијата на СДС е јасна, да се создаде некоја магла во јавноста и да се дебатира на еден начин што направивте вие, што направивме ние. Не сметам дека тоа е соодветен начин за трудот којшто оваа Влада го вложува и за проектите коишто ги испорачува кон граѓаните. Така што, добро е ете да се одговори на една ваква сцена за капиталните проекти коишто според мене се и една движечка сила на македонската економија, но и она коешто е поважно тоа го споменуваат и во економските извештаи и релевантни институции како Европската Комисија“.

Стојаноски, третото пратеничко прашање го упати кон министерот за земјоделие, Цветан Трипуновски, при што истакна дека изминатите денови во Собранието, еден лик сака да се претстави како спасител на македонското земјоделие.

„Јас сметам дека тука еве треба да се одговори на следново прашање, неколку лица се осомничени за примање поткуп меѓукои и директорот на Платежната Агенција, токму тој господин вели дека истрагата треба да се прошири и сметам дека е една лага којашто на никого нема да му донесе добро, а најмногу ќе и одмогне на нашата држава, а тоа е дека Брисел ги стопирал средствата за ИПАРД фондовите и затоа сметам дека треба да се даде можност вие како министер за земјоделие да одговорите на ова прашање.

Министерот за одбрана Владо Мисајловски денеска во Сараево, Босна и Херцеговина, заедно со министри за одбрана од земјите од регионот учествуваше на министерскиот состанок на процесот СЕДМ чија основна цел е унапредување на стабилноста и безбедноста во регионот преку развој на воено-политичката соработка меѓу земјите членки.

За време на првата сесија на министерскиот состанок, Мисајловски се осврна на неколку клучни безбедносни предизвици на глобално ниво – руската агресија врз Украина и ескалацијата на насилствата на Блискиот Исток, при што истакна дека иако географски оддалечен, регионот е под силно влијание на безбедносната несигурност и дека единственото одржливо решение е почитувањето на принципите на меѓународното право, дијалогот и мирното решавање на сите несогласувања.

„Одржливиот мир побарува сеопфатен пристап, кој вклучува многу повеќе од воени мерки, односно вклучува дипломатија, одговорност и отчетност, хуманитарна поддршка и долгорочен развој“, рече Мисајловски. Додаде дека „наша заедничка обврска e следното поглавје во меѓународните односи да не биде обликувано од конфликти и екстремизам, туку од дијалог, солидарност и почит кон меѓународните норми кои ќе овозможат безбеден и праведен свет за сите.“

Во однос на иднината на процесот СЕДМ, министерот даде полна поддршка на експертската работна група која работи на концептен документ за зацврстување на релевантноста на Бригадата на Југоисточна Европа – SEEBRIG.

„Бригадата е исклучително значајна во зајакнувањето на регионалната безбедност и стабилност и јас сум убеден дека таа ќе продолжи да ги развива целите на процесот СЕДМ“, рече тој. Како земја-домаќин на главниот штаб на Бригадата, рече министерот, јасно беше изразена нашата поддршка за овој процес, за кој истакна дека „инструмент за единство и кохезија“ помеѓу земјите од регионот.

На состанокот, министрите беа информирани за активностите реализирани од последниот министерски состанок во ноември 2024 година во Тирана, при што беше потенцирано дека еден од најзначајните проекти на СЕДМ е Бригадата на Југоисточна Европа – SEEBRIG, чија команда до 2026 година е сместена во Куманово.

Министерскиот состанок беше ко-организиран од министерот за одбрана на Босна и Херцеговина, Зукан Хелез, заедно со заменик-министерот за одбрана на Грција, Атанасиос Давакис, и претседавачот на СЕДМ Секретаријатот, амбасадорот Елефтериос Ангелопулос.

Иницијативата СЕДМ, формирана во 1996 година, ги обединува нашата држава, Албанија, Босна и Херцеговина, Бугарија, Хрватска, Грузија, Грција, Италија, Црна Гора, Романија, Србија, Словенија, Турција, Украина, САД и Молдавија. Според воспоставениот редослед, Грција ќе претседава со СЕДМ до првата половина на 2027 година, по што претседателството го презема нашата држава.

Во рамките на иницијативата функционираат и други важни проекти: SEESIM – проект за симулациски вежби, проектот „Жени лидери во одбраната и безбедноста“, проектот за интерконекција на воените болници, како и СЕДМ порталот за брза и ефикасна размена на информации меѓу земјите членки.

Министерот за правда Игор Филков одговарајќи на пратеничко прашање од Миле Талески од СДСМ, зошто не се бара екстрадиција на поранешниот премиер Никола Груевски, рече дека се додека некое лице ужива азил, екстрадицијата ја одбиваат.

Состојбата внимателно се следи, истакна тој, и кога ќе се создадат услови ќе се поднесе ново барање, што впрочем е исто како за секој предмет за екстрадиција.

,,Министерството за правда нема ништо заедничко со тоа министерство што го имавте вие во вашето време кога заедно со Артан Груби, Али Ахмети договаравте кој каде ќе избега. Ова Министерство си ги бара сите бегалци, но вие говорите за политички азиланти ако доволно ве следев. Што значи, дека секојпат кога ќе бидат создадени услови, Министерството за правда повторно ќе си ги бара своите граѓани. Во меѓувреме треба да дадете одговор каде се оние другите со кои што вие договаравте бегство”, потенцира Филков.

Министерот за правда му порача на СДСМ да има сериозен пристап и да се занимава со реална работа.

,,Мора да престанете да ја замајувате македонската јавност со ваков шарлатански пристап. Што уште треба да направите за народот да ви ја прати пораката и на следните избори. Значи, да се соземете, да бидете сериозни затоа што не е добро тоа за вас ниту како опозиција ниту за државата да се занимавате со циркус а не со реална работа. Тоа граѓаните ви го кажаа и на последните избори а убеден сум дека и следниот пат кога и да бидат парламентарните избори ќе ве пратат во историјата”, рече Филков.