Во судирите меѓу етничките групи во Западен Дарфур во Судан се убиени 83 лица, објави суданската новинска агенција повикувајќи се на болнички извори.

Борбите во главниот град на државата Ел Генеини започнаа во саботата по кавгата во која еден човек беше прободен до смрт, јави „Би-би-си“. Беше воведен полициски час низ Западен Дарфур, а премиерот Абдалах Хамдок испрати делегација да го испита случајот.

Скоро 100 лица беа повредени во конфликтот кој избувна во близина на бегалски камп. Фаталната расправија меѓу двајцата прерасна во борба меѓу вооружените милиции.

Минатата година беше потпишан мировен договор во кој беа вклучени повеќето, но не сите групи во Дарфур.

Конфликтот во Дарфур започна во 2003 година под претседателство на Омар ал-Башир, кој беше симнат од власт во 2019 година и кој го бара Меѓународниот кривичен суд под обвинение за воени злосторства и геноцид. Милиони луѓе побегнаа, а тензиите остануваат и покрај мировниот процес.

Насилството се случи речиси по три недели откако мировниците од Обединетите нации и Африканската унија ја предадоа безбедноста во рацете на властите во Картум по 13 години.

Највисоките претставници на Европската Унија изразија загриженост по притворањето на рускиот блогер Алексеј Навални, пренесува ТАСС.

„Притворањето на Алексеј Навални по пристигнувањето во Москва е неприфатливо. Ги повикувам руските власти веднаш да го ослободат”, напиша на Твитер претседателот на Европскиот совет, Шарл Мишел.

„Ги замолуваме руските власти за итно ослободување. Подготвени сме да го поканиме Навални во Европскиот парламент”, рече претседателот на Европскиот парламент, Давид Сасоли, во твит.

„Руските власти мораат да ги почитуваат правата на Алексеј Навални и веднаш да го ослободат. Политизацијата на судството е неприфатлива“, повтори високиот претставник на Европската унија за надворешна политика и безбедност, Жозеф Борел.

Ова прашање ќе се дискутира на состанокот на Советот за надворешни работи на ЕУ на 25 јануари и на седницата на Европскиот парламент што започнува на 18 јануари, изјави дипломатски извор во Брисел за ТАСС. Според изворот, земјите од ЕУ може да објават заедничка изјава за ова прашање во понеделник.

Навални, кој беше баран за кршење на условите за условна казна во случајот „Ив Рошер“, беше приведен на московскиот аеродром „Шереметјево“ по пристигнувањето од Берлин во неделата.

Наследникот на јужнокорејската бизнис империја Самсунг, Ли Џае-јонг е осуден на 2,5 години затворска казна поради корупција, јавија денеска локалните медиуми. Со таа пресуда, тој ја губи моќта да носи важни одлуки за иднината и работењето на технолошкиот гигант.

Високиот суд во Сеул го осуди Ли, формално потпретседател на Самсунг електроникс, најголемиот производител на паметни телефони и компјутерски чипови во светот, е прогласен за виновен за мито и проневера во врска со скандалот што доведе до симнување од власт на претседателот Парк Геун Хе.

Ли ја водеше компанијата неколку години откако неговиот татко доживеа срцев удар, по што почина во октомври минатата година.

„Многу е жално што Самсунг, водечка компанија во нашата земја и горд глобален иноватор, постојано е вклучен во криминални дела секогаш кога има промена на политичката моќ“, се вели во пресудата.