Од утрово почна вакцинацијата против коронавирус во Москва со вакцината „Спутник 5“, со што Русија стана првата земја која го стартува процесот.

Работната група за коронавирусот објави дека вакцината од руско производство најпрво ќе им биде достапна на лекарите и другите медицински работници, наставниците и социјалните работници затоа што се изложени на најголем ризик од заболување, пренесува АП.

„Во текот на првите пет часа, 5.000 луѓе аплицираа за вакцинација – наставници, лекари, социјални работници, оние кои денес ги ризикуваат своето здравје и животи“, напиша градоначалникот Сергеј Собјанин на неговата веб-страница.

Граѓаните можат да аплицираат за вакцинација преку Интернет и можат да обезбедат бесплатен термин на една од 70-те локации низ градот.

Возраста на оние кои примаат вакцина е ограничена на 60 години. Забрането е вакцинирање на лица со хронични заболувања, бремени жени и оние кои имале респираторна инфекција во последните две недели.

Русија разви две вакцини против ковид-19 – Спутник V, поддржан од рускиот фонд за директни инвестиции и друга развиена од Институтот Вектор во Сибир, а за двете, финалните испитувања сè уште не се завршени, наведе АП.

Вакцината Спутник V се дава во два наврати, а втората доза се дава 21 ден по првата.

Москва, која е главно жариште на коронавирусот во Русија, регистрираше 7.993 нови случаи во текот на ноќта, за разлика од 6.868 ден претходно.

Американскиот претседател Доналд Трамп нареди повлекување на речиси сите американски војници од Сомалија најдоцна до 15 јануари, соопшти Пентагон.

САД имаат околу 700 војници во Сомалија, кои им помагаат на локалните сили во борбата против бунтовничката група Ал Шабаб, поврзана со терористичката мрежа Ал Каеда.

Мисијата се смета како основа за глобалните напори на Пентагон да и се спротивстави на Ал Каеда.

Трамп веќе најави намалување на бројот на војниците во Авганистан и Ирак.

Новоизбраниот американски претседател, Џо Бајден изјави дека вакцинацијата против коронавирус во САД нема да биде задолжителна и Американците нема да бидат принудени да ја примаат вакцината.

Во исто време, Националниот центар за контрола и превенција на болести апелираше да се носат заштитни маски на отворено и предупреди дека Соединетите држави влегле во фаза на високо пренесување на вирусот, објави АП.

Во последните 24 часа, во САД се потврдени скоро 225.000 нови случаи на Ковид-19 и повеќе од 2.500 смртни случаи.

Бајден најави дека церемонијата на инаугурацијата на 20 јануари во Вашингтон ќе биде организирана во помал формат, во согласност со епидемиолошката состојба.