Вкупната бројка на пациенти позитивни и суспектни на корона вирусот кои се лекуваат на инфективните оддели во главниот град и во болниците низ земјава е 1326. Од Министерството за здравство велат дека има околу 160 празни болнички кревети во ковид-центрите.

По извештаите на болниците кои пристигнуваат во Министерството за здравство на дневна основа, во болницата во Битола се хоспитализирани 81 пациент позитивен и суспектен на КОВИД-19. Во болницата во Штип се хоспитализирани 65 пациенти. На инфективното одделение во Тетово има 44 пациенти, во Велес се лекуваат 65 болни, а во Куманово 111 пациенти позитивни и суспектни на КОВИД 19. Во ковид центарот во Охрид има хоспитализирано 105 пациенти, во Прилеп 126, во ковид центарот во Гостивар 61, а во Струга 39 болни. Во болницата во Струмица хоспитализирани се 71 пациент, во Кочани 24, во Кичево 20, Кавадарци 46, во Гевгелија 17 лица, а во Дебар 9 позитивни и суспектни на корона вирусот. Имајте предвид дека бројките се менуваат од час во час, според направените приеми и исписи на пациенти.

Во тек на денот се прават и исписи на оздравени пациенти со што ќе се ослободат дополнителни легла.

Инаку, сите одделенија на клиничките болници располагаат со болнички места до кои има довод на кислород. Министерството за здравство е во постојан контакт со сите болници и доколку има потреба, капацитетите на ковид одделенијата ќе бидат дополнително проширени.

Денеска во Гевгелија започна поставувањето на модуларната болница, а во текот на следната недела монтажа на објектите ќе започне во Струмица, Куманово, Струга и Кичево.

Од Министерството за здравство велат дека во сите општини забрзано се работи на активностите за реализација на проектот.

„Интензивно се работи на подготовки на терен, се расчистуваат локациите, локалните јавни претпријатија обезбедуваат приклучоци, стручните служби на единиците на локална самоуправа даваат максимална поддршка за што поскора реализација на проектот од Светската банка. Генерално, активностите во сите општини течат согласно утврдениот план и динамика. Општината Битола и јавните претпријатија го уредуваат просторот и го подготвуваат теренот за поставување на три модуларни болници со капацитет од 100 болнички кревети и три тријажни центри. Во моментов, во Битола се бетонираат бетонските подлоги за поставување на модуларните болници“, информираат од Министерството за здравство.

Во Штип теренот е подготвен за бетонирање на подлогата, инсталациите се донесени до точките за приклучни места. Oд Министерството за здравство информираат и дека денеска во Струга завршува бетонирањето на бетонската подлога, а сите инсталации се спроведени. Велат дека со забрзана динамика се работи на теренот во Гостивар, Кичево, Прилеп и Кавадарци. Во Кочани теренот е спремен и ќе започне бетонирање на подлогата.

Во Дебар и Тетово во тек се припремните работи.

Во Општина Охрид, посочи министерството, забрзано се работи на обезбедување на пристапни патеки и спроведување на инсталации, додека јавните претпријатија и општина Велес работат на расчистување на теренот и поставување на инсталации, имајќи во предвид дека локацијата е специфично поставена на терен во пад. Во Ресен се работи на планирање на локацијата.

Министерството за здравство упатува благодарност до градоначалниците на 16 -те општини и до нивните јавни претпријатија за максималниот ангажман, кои се ставија целосно во функција на здравствениот систем.

Крајните рокови за пуштање во употреба на сите модуларни ковид центри истекуваат за три месеци. Но, како ќе завршува монтажата, така ќе пристига и потребната опрема и инвентар за целосно опремување, што ќе значи и сукцесивно пуштање во употреба.

Секој регионален ковид центар ќе има приемен и тријажен оддел, целосно опремена лабараторија, целосно опремени болнички соби и сите други помошни простории за персонал и пациенти.

Градоначалникот на Општина Илинден, Жика Стојановски и министерката за труд и социјална политика, Јагода Шахпаска ја пуштија во употреба новоизградената детска градинка во населено место Миладиновци, која е клон на ЈОУДГ „Гоце Делчев”.

Вкупната инвестиција за реализација на овој капитален проект којшто општина Илинден го реализира во соработка со Министерството за труд и социјална политика изнесува 33 милиони денари, од кои од буџетот на општина Илинден се обезбедени 27 милиони денари за фазите: архитектура, изградба на новиот објект и обезбедување на комплетна инфраструктура, хортикултурно и партерно уредување како и асфалтирање на паркинг просторот пред градинката.

За опремување на занималните, просториите и кујната во детската градинката, како и поставување на машинска опрема за греење и ладење на објектот, Министерството за труд и социјалана политика обезбеди средства во висина од 6 милиони денари.

Поздравувајќи ги присутните и посакувајќи им успешна работа на вработените, министерката Јагода Шахпаска истакна дека предучилишното образование претставува темел врз кој младата детска личноаст се гради во иден ученик во основно, средно училиште, во академски граѓанин. Затоа, ни е важно секое дете, истакна министерката.

Градоначалникот на општина Илинден, Жика Стојановски, за време на отворањето на градинката истакна дека локалната самоуправа е истрајна во намерата да им обезбеди на најмладите граѓани најдобри можни услови за раст и развој и да обезбеди среќно детство. Затоа, како што кажа тој, Општината одлучи сите свои расположливи средства да ги насочи кон решавање на проблемот со недостаток на капацитет на постојниот објект на детската градинка „Гоце Делчев“ во Илинден.

Градинката е високо енергетски ефикасен објект во кој е инсталиран систем за греење и ладење со топлински пумпи кој ги задоволува највисоките стандарди. Објектот на новата градинка се простира на површина од 540 м2, располага со 4 занимални и има капацитет да згрижи 90 деца. Во насока на почитување на протоколите во овој период градинката ќе згрижува 75 деца.

Во три занимални ќе бидат згрижени деца на возраст од 2 до 6 години додека во една занимална ќе бидат згрижени најмалите дечиња на возраст од 9 месеци до 2 години што значи воведување на јасли. Со новоизградената градинка ќе се овозможи ослободување на просторни капацитети во постоечката детска градинка „Гоце Делчев“ во Илинден, која е со капацитет за згрижување на 450 деца на возраст од 2 до 6 години, такашто се создадени услови за згрижување на деца од јаслена возраст и во оваа градинка.