Регион
Црна Гора повторно прогласи епидемија на целата територија

Црногорскиот кризен центар за инфективни болести донесе одлука повторно да прогласи епидемија на новиот коронавирус во целата земја и да воведе задолжително носење маски на отворено и во затворено, освен на плажите и во националните паркови.
До синоќа епидемијата во Црна Гора беше прогласена во пет општини на северот на земјата. Во вториот бран на епидемијата на коронавирусот во Црна Гора вкупно 2.045 луѓе се разболеле, а 26 починале. Статистички гледано, бројот на заболени во Црна Гора на 100.000 жители е 305, а според тој параметар, таа земја е на врвот на листата на земји во регионот.
Поради ваквата епидемиолошка состојба, црногорскиот Институт за јавно здравје ѝ предложи на црногорската влада да прогласи состојба на епидемија на заразна болест во целата земја и заштитна мерка за задолжително носење заштитни маски.
„Носењето заштитни маски од полноќ е задолжително во цела Црна Гора, вклучително и за деца на возраст над седум години, освен на плажите и во националните паркови, држење физичко растојание и претходно пропишани мерки. Собирањето е исто така ограничено на максимум 40 лица на отворени јавни места, а на 20 лица во затворено“, соопшти црногорската влада.
Мерките за забрана за работа на ноќни и диско-клубови и организирање свадби, дипломски, роденден и други приватни прослави се продолжени до 6 август. Претходно, работата на угостителските објекти во централниот, најнаселен дел од земјата, беше ограничена до 22 часот, а на приморјето работното време на кафулињата и рестораните е до полноќ.
Во пет општини на северот, каде што претходно беше прогласена епидемија на коронавирусот, продолжена е мерката за целосна забрана за работа на угостителските активности.
Вториот бран на инфекција во Црна Гора почна на 14 јуни, а оттогаш бројот на заразени трипати се зголеми во однос на првиот бран кога 324 лица се заразиле со коронавирус во Црна Гора за два и пол месеца.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Регион
Црв од шест сантиметри отстранет од очниот капак на пациент во БиХ

Црв од шест сантиметри е отстранет од постар пациент, а фотографијата ја објави познат доктор од Бања Лука, Бојан Козомара.
„Вака изгледа црв штотуку отстранет од очниот капак на постар пациент. Постапката ја изврши мојата драга колешка Тамара“, напиша тој на X.
Ovako izgleda crv upravo odstranjen iz kapka pacijenta starije životne dobi.
Zahvat izvršila moia draga kolegica Tamara… pic.twitter.com/6EK3CrhCE3
— Bojan Kozomara (@KozomaraBojan) September 17, 2025
Според него, црвот, најверојатно, потекнува од куче.
„Ќе го помилувате кучето кое има јајца од глисти, а потоа ќе се фатите за окото“, напиша тој во коментар објаснувајќи ја ситуацијата, објавува Nezavisne.com.
Фото: принтскрин
Регион
Татко си го прегазил малолетниот син со автомобил во градината: трагедија во БиХ

Шеснаесетмесечно момче е убиено во Брчко, БиХ, кога било прегазено од автомобил управуван од неговиот татко, потврди полицијата во тој град.
Трагедијата се случила вчера, а полицијата известила дека 30-годишен маж со иницијали Ј.Х. случајно го прегазил детето во градината на семејната куќа во населбата Церик.
„Таткото го донел детето во тешка состојба и врз него била извршена реанимација. Веднаш потоа, полициски службеници излегле на местото на настанот и ги презеле сите мерки и дејствија во нивна надлежност за да ги утврдат сите околности“, изјави портпаролката на полицијата на округот Брчко, Џевида Хукичевиќ.
„Таткото го спуштил детето за да се подготви за работа“
Агенцијата Фена денес ги објави сведоштвата на соседите кои рекле дека таткото го држел детето во раце, а потоа го оставил во градината за да се подготви за работа.
Полицијата добила пријава за трагедијата од локалната амбуланта, каде што веднаш било однесено тешко повреденото момче, но не можело да се спаси.
Соседите рекле дека го познавале Ј.Х. како вреден татко на пет деца кој се грижи за своето семејство работејќи тешка физичка работа.
Фото: принтскрин
Регион
(Фото) Грција пронајде богатство од потонатиот брод „Британик“, сестрински брод на „Титаник“

Грчките власти објавија дека се пронајдени вредни артефакти од остатоците од бродот „ХМХС Британик“, повеќе од еден век откако сестринскиот брод на познатиот „Титаник“, потона во Егејското Море за време на Првата светска војна, објави Би-би-си.
Иако операцијата за вадење беше спроведена во мај, веста беше објавена дури сега, кога Министерството за култура на Грција откри детали за пронајдените предмети. Сложената операција за извлекување ја спроведе тим од 11 професионални нуркачи, а проектот го организираше британскиот историчар Сајмон Милс, основач на Фондацијата „Британик“.
Богатства извлечени од морското дно
Меѓу предметите извлечени на површината се бродското ѕвонче за набљудување, навигациска светилка на левата страна од бродот, двоглед, керамички плочки од турските бањи и разновидна опрема од кабините од прва и втора класа.
Пронајдените артефакти веднаш беа заштитени во контејнери и исчистени од морски организми, по што беа префрлени во лаборатории за подводни антиквитети во Атина, каде што ќе продолжи процесот на нивна конзервација. Вреди да се напомене дека некои предмети идентификувани во оригиналниот план не можеа да се извлечат поради нивната лоша состојба и локација на остатоците од бродот.
По завршувањето на работите, предметите ќе бидат изложени во новиот Национален музеј на подводни антиквитети во Пиреја, како дел од изложбата посветена на Првата светска војна.
„Британик“ беше третиот пароброд од класата Олимпик на компанијата „Вајт Стар Лајн“, покрај познатите „РМС Титаник“ и „РМС Олимпик“. За време на војната, бродот беше преземен од британската морнарица за да служи како болнички брод.
На 16 ноември 1916 година, „Британик“ налета на германска мина во близина на грчкиот остров Кеа и потона за помалку од еден час. Од 1.065 лица на бродот, 30 ги загубија животите кога два чамци за спасување беа вовлечени во пропелерите на бродот, кои сè уште работеа.
фото: принтскрин