Силно сме посветени на развојот на меѓусебната соработка во областа на одбраната што е показател за довербата која е изградена помеѓу нашите две пријателски земји, заклучија министерот за одбрана Владо Мисајловски и неговиот колега, министерот за одбрана на Босна и Херцеговина, Зукан Хелез на денешната средба во Министерството. Средбата се реализира во рамки на официјалната посета на босанската делегација предводена од министерот за одбрана Хелез, на Министерството за одбрана.

Министерот Мисајловски порача дека најважното за двете земји е безбедноста и стабилноста на регионот, укажувајќи на тоа дека „тоа е апсолутен приоритет, имајќи предвид дека без тоа не можеме да разговараме за развој на ниту една друга област, вклучувајќи ја и економијата.“

Мисајловски додаде дека земјава е целосно подготвена да ја поддржи Босна и Херцеговина во процесот на интеграција во НАТО, при што потенцираше дека „нашите две земји се пријателски и мора да се поддржуваат и да си помагаат во остварувањето на целта – подобро утре на нашите граѓани.“

Во однос на придонесот во ЕУ мисијата АЛТЕА во Босна и Херцеговина, Мисајловски ја потврди нашата посветеност, информирајќи дека во моментов дел од оваа операција се 33 македонски припадници.

Во пресрет на посетата на Воената академија каде денеска двајцата министри ќе присуствуваат на првиот академски час, Мисајловски рече дека вклучувањето на повеќе питомци од Босна и Херцеговина во новата класа на Академијата е „јасен показател за нашите искрени намери во градењето партнерства и за тоа дека взаемната доверба е на највисоко ниво – од нашата понуда за школување, до вашиот интерес нам да ни ја доверите одговорноста да ги креираме идните лидери на вооружените сили на Босна и Херцеговина.“

Министерот Хелез се заблагодари за школувањето на питомци од Босна и Херцеговина на Воената академија и за придонесот на македонскиот контингент во мисијата на Европската Унија во Босна и Херцеговина. Министерот се осврна и на интеграцијата во Европската Унија, за која порача дека е исклучително важна за нашите две земји.

На средбата, министрите разговараа и за соработка во доменот на наменската индустрија, како и користењето на полигонот „Криволак“ кој е значаен капацитет на македонската Армија.

Во Министерството за одбрана, освен средбата на двајцата министри, реализирана беше и средба на двете делегации, на која присуствуваше и началникот на Генералштабот, генерал-мајор Сашко Лафчиски.

Венко предлага ,,црвени линии“ за заштита од францускиот предлог, кој пред една година го прогласи за победа, изјави Антонијо Милошоски, член на ИК на ВМРО-ДПМНЕ.

„Денес темата на оваа прес-конференција е ставот на Венко Филипче, претседателот на СДСМ за францускиот предлог и за резолуцијата која што тој ја нуди, со наводно патриотски црвени линии. Првата констатација е дека Венко Филипче ја менува својата политика и позиции во зависност од потребите на својот финансиски и политички ментор, Зоран Заев, а се во нивен заеднички интерес да се задржат на чело на СДСМ. На прес-конференција на 1 октомври 2024 година, Венко Филипче изјави дека францускиот предлог е победа и голем успех на нашата дипломатија. Парадоксот е толку голем, што денес една година потоа, Филипче изјавува дека се потребни црвени линии и резолуција за заштита од оваа негова во наводници прогласена дипломатска победа. Дали Венко Филипче лажеше 2024 година кога кажа дека дипломатијата победила со прифаќањето на францускиот предлог или лаже денес кога нуди предлог резолуција со црвени линии за заштита од истиот француски предлог којшто е целосно во корист на источниот сосед“, праша Милошоски.

Според него, ваквите изјави и изменети ставови на Филипче, не се порака до македонските граѓани, туку се порака до соседна Бугарија, бидејќи, како што кажа, Венко Филипче се надева дека источниот сосед или некој меѓународен актер ќе му помогне да дојде на власт, или барем да ја задржи водечката позиција во СДСМ, бидејќи знае дека нема поддршка од македонските граѓани, а нема поддршка ниту од најголемиот дел од симпатизерите или членовите на СДСМ.

Уште едно извонредно претставување на македонските средношколци – информатичари, како продолжение на уште една успешна година за Македонија на олимпијадите по информатика.

На 32-рата по ред Балканска олимпијада по информатика (БОИ 2025), која од 25-ти септември до 1-ви октомври се одржува во Удине, Италија, нашите ученици постигнаа нов значаен успех. Македонскиот тим на овој престижен меѓународен натпревар во програмирање, составен од учениците Дамјан Давков од Штип, Леонид Цуклев од Гевгелија, Виктор Максимоски од Гостивар и Владимир Грчев од Кочани, предводени од лидерите, д-р Емил Станков и Благојче Павлески од Факултетот за информатички науки и компјутерско инженерство (ФИНКИ), освои еден златен и два бронзени медали. Заедно со овие три, македонските ученици на меѓународните информатички олимпијади во текот на 2025 година досега освоија вкупно два златни, два сребрени, четири бронзени медали и четири олимписки пофалници – резултат достоен за респект, недостигнат и од многу поголеми држави од Македонија.

Балканската олимпијада по информатика (БОИ) е врвниот натпревар во програмирање за средношколци од земји кои се наоѓаат на или околу Балканскиот полуостров. Секоја земја – членка на БОИ заедницата учествува со тим составен од 4 натпреварувачи, избрани преку годишните национални натпревари во програмирање, како и лидер и заменик лидер на тимот. Учениците се натпреваруваат во решавање на алгоритамски проблеми во два натпреварувачки дена.

Главен организатор на овогодинешната БОИ е Националната асоцијација за натпреварувачко програмирање на Италија, со поддршка на Италијанската асоцијација за информатика и автоматско пресметување. На годинешното издание на БОИ учествуваат вкупно 48 од најдобрите средношколци во областа на компјутерските науки од следните земји: Албанија, Босна и Херцеговина, Бугарија, Кипар, Грција, Италија, Македонија, Молдавија, Романија, Србија, Словенија и Турција. Дополнително, како претставници на земји-гости на БОИ, во неофицијална конкуренција учествуваат и 18 ученици од Швајцарија, Украина, Саудиска Арабија и Киргистан. Во ваква силна конкуренција, златниот медал за Македонија го освои Дамјан Давков, а бронзените медали ги освоија Владимир Грчев и Леонид Цуклев. Четвртиот наш натпреварувач Виктор Максимоски исто така освои признание, олимписка пофалба.

Нашиот тим за БОИ 2025 беше избран преку целогодишен циклус натпревари, којшто редовно се организира од Здружението на информатичарите на Македонија (ЗИМ), а оваа година се одржуваше по 36-ти пат. И оваа година, циклусот натпревари беше организиран со поддршка на Факултетот за информатички науки и компјутерско инженерство, како и неколку општествено одговорни компании.

Во изјавата на Претседателот на Здружението, проф. д-р Миле Јованов се вели: „Секогаш сум среќен кога целогодишниот труд на нашите натпреварувачи вродува со плод. Дамјан и Леонид се ученици од Математичко информатичката гимназија во Скопје, кои штотуку запишаа четврта година, а Владимир како ученик кој само што заврши основно образование успеа да се пласира во овој повисок натпреварувачки ранг. Дамјан со неговиот медал и резултат застана пред 64 други учесници од олимпијадата, а Владимир го делеа само 5 поени (од можни 600) од освојување на сребрен медал. Целогодишниот труд и на членовите од Здружението, професорите и студентите од ФИНКИ, во организацијата на натпреварите и на подготовките на најдобрите ученици е исто така валоризиран со овие резултати. Искажувам благодарност за здружението Бистри умови и општина Кочани за поддршката во организирањето на подготовките, како и на компанијата Сорсикс која и сега го поддржа нашето патување во Италија.“

Следната, 33-та по ред, Балканска олимпијада по информатика (БОИ 2026), ќе се одржи идната година во Црна Гора. Последен настан пак, кој претстои до крајот на оваа година за македонските ученици – информатичари, е Јуниорската балканска олимпијада по информатика (ЈБОИ 2025), која ќе се одржи од 24-ти до 30-ти октомври во Ларнака, на Кипар.