Македонија
(Видео) Мицкоски: Бараме да предложиме независен јавен обвинител за борба против мафијата
„Правдата во Македонија е нападната. Селективната правда денеска во Македонија е неправда. Имаме невини луѓе во затвори, луѓе што страдаат поради самоволието на власта и мафијата. Зошто е тоа така? Затоа што во овој хибриден режим, кој го констатираат европски институции, се владее со терор, со притисок и реваншизам. Ништо не се смени за овие 4 години од мафијата. Тие, како и пред 4 години, така и денес ветуваат исти работи. Ќе имало правда, ќе имало ред, ќе имало дисциплина. 4 години живееме во состојба на ‘ќе’. Оваа ‘ќе’ влада живее во очекувањата што ги креира и нема решение за проблемите што денеска се тешка сурова реалност“, изјави лидерот на ВМРО-ДПМНЕ, Христијан Мицкоски, на протестот во Скопје за неправдите, реваншизамот и политичкото насилство.
Според него, една помината ноќ на невин човек во затвор е потешка од 10 години робија на криминалец.

„Во затворите има луѓе што се таму поради политички прогон, а оние за кои Заев велеше дека се криминалци, денес гледаме дека се најблиски до него. Целта е едноставна. Двете мафии, онаа на Заев и онаа што му се покори да му служи, сакаат да има две партии, каде што сложно ќе договараат кога да се смени власта, а тоа е тогаш кога ним им одговара. Но, имаат голем проблем во тој план. ВМРО никогаш, ама баш никогаш, не се покорила и никогаш никој не ја покорил. Кога економијата пропаѓа, кога банка со народни пари, поради пљачката на мафијата, оди во стечај, кога земјоделците протестираат и кога притисоците се засилуваат, а некому не му е јасно зошто ВМРО-ДПМНЕ е тема на владините медиуми, јас ќе ви одговорам – реваншизмот е главен.

Поради сето ова, има гласни медиуми, кои во име на власта ја трујат вистината и затоа има медиумски обрач кој низ розови очила ја сервира грдата, тешка и болна реалност. Оваа Влада сака да ги слушаме со воодушевување и поласканост истите ветувања за правда што 4 години ги дава одново и одново. Тие мислат дека народот има меморија на аквариумска рипка и дека секој миг ни е ново доживување. Каква навреда од овие самобендисани мафијаши! До кога ќе ја чекаме правдата? 30 години на овој народ му поминува во некакво чекање. Доста е веќе со празни ветувања, треба да се дејствува, народот бара дела! Одбиваме да ги потрошиме нашите животи во чекање“, додаде тој.
Според Мицкоски, неправда е кога се тепаат новинари.

„Критичарите на власта добиваат крвава глава само затоа што зборуваат гласно за криминалот на мафијашите и нивните слуги, исто како нив мафијаши. Зарем тоа треба да се премолчи? Еве, помина време да прашам до каде е тепањето на новинарот, ги најдоа ли сторителите? Што е со судските процеси врз новинари или, пак, тужбите што ги добиваат новинарите и медиумите затоа што пишуваат за криминал. Неправда е кога медиуми се напаѓаат, етикетираат, прогласуваат за државни непријатели за да се уценуваат нивните сопственици. Обвинителството молчи што стотици илјади евра остануваат непокриени во извештаите на СДСМ од кампањата, а власта врши прогон кон медиуми и ВМРО-ДПМНЕ за законско рекламирање. Неправда е кога главната обвинителка е главен телохранител на мафијата. Неправда е кога убијците на децата од Смилковското Езеро се на слобода, а уставобранителите во затвор.

Неправда е кога Гордана Јанкулоска ја носат во затвор, а Заев се вози со истиот „мерцедес“ и троши дополнителни 8 милиони евра за набавка на други возила. Во оваа држава владеат законите на криминалците. Разни криминалци се изживуваат и велат: „Ве чекаме во затворите, а таму тешко вам“, но забораваат дека тракалото се врти! Тие не треба да се плашат од одмазда, туку од правда, а таа ќе ги стигне сите порано или подоцна. Неправда е кога луј витон-судството носи трас-трас одлуки, кои ги диктира Заев, а молчи за рекетот, панамските пари и бизнис-зделките на Заев и сомнителен бизнисмен за милионски бизниси во Тетово“, вели лидерот на ВМРО-ДПМНЕ.
Мицкоски вели дека судството и Обвинителството се инструменти на мафијата, затоа нема никаква реакција. Мафијата е мафија зашто судството и Обвинителството се клекнати на колена.
„Затоа, како прво, бараме тоа што беше ветување дадено од мафијата кога таа беше во опозиција, иако и по овие брутално покрадени талибански избори, тие требаше да останат во опозиција, но набргу ќе бидат во опозиција, бараме: овие мафијаши да си го исполнат ветувањето и да дадат можност опозицијата да предложи независен и непристрасен јавен обвинител, кој ќе го исече од корен криминалот, почнувајќи од првото дело, па завршувајќи сè последното, без разлика на политичката припадност. Ова не би требало да биде пречка за Заев зашто истото тоа го предлагаше пред да дојде на власт и пред мафијата да ја окупира државата“, вели тој.
Понатаму, се бара итно да се спречи реваншизмот, да престанат реваншизмот, притисоците и политичките етикетирања во администрацијата, војската, Министерството за внатрешни работи. На сите на кои им е нанесена неправда, без оглед на припадноста и политичката ориентација, ВМРО-ДПМНЕ им нуди бесплатна правна помош. Државава во моментот е без комисија за заштита од дискриминација. Затоа, се бара најитно да се формира оваа комисија и да се донесе новиот закон за заштита од дискриминација.

„Сите предмети што се познати во јавноста, каде што е почувствувано неправда, притисок, уцена и реваншизам, каде што правдата не е заштитена, сите предмети за криминал за кои власта сега молчи ќе бидат отворени и предмет на ревизија, а исто така ќе биде предмет на анализа и зошто не се постапувало, а требало да се постапува.
Полна е устата со владеење на правото. Не може во Македонија да владее правото ако не се открие по чиј налог и чија наредба беа снимени незаконско прислушувани илјадници наши сограѓани. Мора да се знае и за тоа некој да сноси одговорност, тој што ја дал таа наредба. Не може да има владеење на правото ако не се открие кој и зошто ги полнеше кутиите на референдумот, па имавме избирачки места со одѕив поголем од 99 %. Не може да има владеење на правото ако не се открие кој ги слушаше обвинителите и судиите. Сетете се само, некако како јавноста да подзаборави на ова слушање на обвинителите и судиите, што се обелодени на крајот од 2018 година.
Не може да има владеење на правото ако не се откријат имињата на сите оние што се инволвирани во „Рекет 1“, „Рекет 2“, и тоа од прв до последен да одговараат за она што го сториле.
Не може да има владеење на правото ако не се открие и форензички испита телефонот на Бојан Јовановски да видиме со кого комуницирал, за кои цели комуницирал и која била намерата на таа комуникација и таа преписка. За кого се градени старски домови, кој и зошто бирал локации и зошто токму во тие општини се избрани тие локации“, рече Мицкоски.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Јаневска: Секоја успешна образовна приказна започнува со наставник кој верува во ученикот
На денешната панел-дискусија во Прилеп, дел од кампањата „Магијата е во знаењето“, од различни перспективи се зборуваше за суштината на наставничката професија и за тоа што навистина значи да се биде добар учител.
Наставник што верува во секое дете, што станува глас на охрабрување, водич низ секојдневието и сојузник во учењето, токму такви примери беа во фокусот на денешната панел – дискусија што се одржа во Прилеп, во рамки на националната кампања „Магијата е во знаењето“, која ја спроведува Министерството за образование и наука.
Панел-дискусијата со наслов „Добриот наставник прво е пријател, па потоа учител – Магијата на ‘Добро утро, деца’“ собра наставници, стручни лица, родители и претставници на академската заедница, кои од различни перспективи зборуваа за суштината на наставничката професија и за тоа што навистина значи да се биде добар учител.
Во своето обраќање, министерката за образование и наука проф. д-р Весна Јаневска, ја нагласи исклучителната улога на наставниците не само како пренесувачи на знаење, туку и како личности што со својата посветеност, емпатија и личен пример оставаат неизбришлива трага во животите на младите.
„Секоја успешна образовна приказна започнува со наставник кој верува во ученикот. Кога едно дете ќе почувствува дека некој со внимание го гледа, го слуша и верува во неговиот потенцијал, тогаш се случува вистинска промена. Нашата мисија е да го зајакнеме системот кој ги препознава и цени наставниците, а преку оваа кампања, сакаме не само да ја потврдиме нивната важност, туку и да го вратиме достоинството на професијата што ја гради иднината“, истакна Јаневска.
Министерката потенцираше дека со потпишувањето на спогодбата со СОНК, Владата обезбеди гаранција за континуиран годишен раст на платите на наставниците, кој ќе биде реален и ќе зависи од степенот на инфлација. Додаде и дека овозможен е кариерен развој на наставниците и стручните соработници преку повиците за напредување во звања ментор и советник не само во основните, туку за прв пат годинава и во средните училишта.
Проф. д-р Данче Сивакова Нешковски, декан на Педагошкиот факултет во Битола, рече дека добриот наставник е оној кој пред сѐ умее да слуша, да разбере и да создаде врска со секое дете, а дури потоа да предава.
Наставниците и стручните лица од основните и средните училишта во Прилеп говореа за секојдневните предизвици во работата, но и за моментите кои им се показател дека нивниот труд прави разлика. Родителите истакнаа дека вистинскиот наставник е оној што детето го гледа како сојузник, а училиштето како средина што го поддржува и инспирира детето.
Денешната панел-дискусија е дел од националната кампања „Магијата е во знаењето“, во чии рамки се реализираат низа активности, од јавни настани и тематски собири, до едукативни видеа, интерактивни работилници и вклучување на широк круг чинители од образовниот и општествениот живот.
Преку овие активности, се настојува да се создаде поширока општествена поддршка и разбирање за значењето на наставничката улога. Фокусот е ставен на тоа наставниците да добијат поголема видливост, почит и поддршка, како луѓе кои секојдневно вложуваат знаење, труд и посветеност во воспитувањето и образованието на новите генерации и кои претставуваат двигатели на напредокот на секое општество.
Македонија
И меѓународната заедница гледа со неверување дека некој во 21 век може да се однесува така, рече Мицкоски по повиците за етничко гласање во вториот круг
Претседателот на ВМРО-ДПМНЕ, Христијан Мицкоски, денеска од Брвеница испрати порака дека сите кои работат за иднината на државата имаат негова и владина поддршка, без оглед на етничката, верската или политичката припадност. Ова се случува откако кандидатот на Коалицијата „Вреди“ за градоначалник на Брвеница, Хаќим Рамадани рече дека заедно со кандидатите на ДУИ бараат гласови за општините каде во втор круг се тркаат Македонци и Албанци, за да се знае кој е газда.
„Секој кој зборува за иднината на Македонија е добредојден мој соговорник, а тие што шират поделби, особено етнички, не му мислат добро ниту на Македонецот, ниту на Албанецот, ниту на било кој друг наш сограѓанин“, изјави Мицкоски.
Тој истакна дека со жалење го слушал сето она што противкандидатот на Јовица Илиевски во Брвеница го кажувал во една , како што ја нарече, егзалтирана состојба.
„Не знам дали беше тоа специфичен момент за него, но мислам дека направи голема грешка. Направи голема грешка пред се за кандидатите, од истата онаа коалиција за која тој настапува. Замислете што ќе се случува сега во Струга, во Дебар и во одредени други општини, така што толку себичен потег од политичар до сега поновата историја Македонија не видела“, рече Мицкоски.
Додаде дека ваквата реторика стигнала и до влијателни претставници на меѓународната заедница, така што и тие гледаат со големо жалење и со неверување на она што го слушаат, дека некој во 21 век може да користи таков речник.
Мицкоски истакна и дека Владата предводена од ВМРО-ДПМНЕ вложува подеднакво во сите општини, без оглед на политичката или етничката структура на локалните власти.
„Покажавме со инвестиции и договори од половина милијарда евра во сите општини – без разлика дали се леви или десни, провладини или опозициски. Така се гради соживот, така се гради заедничка држава. Со поделби може само да уназадуваме“, рече тој.
Рамадани претходно најави дека во вториот круг ќе соработува со ДУИ, партијата за која „Вреди“ не штеди зборови во партиските соопштенија дека е криминална, поразена и на дното на бунарот, само со цел да се поразат кандидатите на ВМРО-ДПМНЕ, и покрај тоа што се коалициони партнери во Владата. Рамадани рече дека општините како Кичево, Брвеница и Тетово, каде што се мнозинство Албанците, треба да ги води Албанец, што во јавноста денес беше оценето како шовинистичка реторика.
Тензиите меѓу коалициските партнери почнаа уште пред неколку дена, кога лидерот на „Влен“, Билал Касами, во интервју за албанската телевизија Сири најави дека во вториот круг во Кичево ќе го поддржат кандидатот на ДУИ, Фатмир Дехари, а не кандидатот на ВМРО-ДПМНЕ, Александар Јовановски, само затоа што е Албанец.
Мицкоски тогаш остро реагираше, истакнувајќи дека политиката не смее да се темели на етнички поделби и шовинизам, туку на вредности и заедништво.
„Сите што се надеваат дека со етноцентрични теми ќе добијат нешто во политиката нека го погледнат примерот на падот на ДУИ – тоа е лекција за сите. Поддршката треба да се гради врз вредности, а не низ призмата на етничка припадност“, изјави тогаш Мицкоски.
ВМРО-ДПМНЕ во првиот круг немаше свои кандидати во неколку општини – меѓу нив Тетово, Чаир, Сарај и Струга – токму за да ја поддржи коалицијата „Вреди“ и нејзините кандидати.
„Понекогаш додека ги реализиравме овие стратешки цели крваревме како ВМРО-ДПМНЕ и поднесовме жртва. Не беше лесно да се гледаат нашите сопартијци како остануваат без кандидати, но тоа беше дел од поширокиот стратешки договор. Ние не бараме ништо за возврат, само почит за жртвата што сме ја дале за други“, изјави Мицкоски во неодамнешното обраќање.
Во вториот круг на локалните избори на 2 ноември, ВМРО-ДПМНЕ и „Вреди“ ќе се најдат во директна трка во неколку општини, меѓу кои Брвеница, Долнени.
И додека лидерот на ВМРО-ДПМНЕ ја брани позицијата на својата партија како носител на стабилност и меѓуетничко единство, „Влен“ се’ уште јавно не се произнесе за настапот на Рамадани.
Македонија
(Видео) Филипче најави политички и кадровски промени во СДСМ
Претседателот на СДСМ,Венко Филипче, во изјава за медиумите по првиот круг од локалните избори истакна дека партијата бележи раст во повеќе општини, но и дека има места каде резултатите се послаби, што, како што рече, е јасен показател за тоа што треба да се менува.
„Јас лани ја затекнав партијата во навистина тешка и лоша состојба, после еден пораз со разлика од 300.000 гласови. Во изминатата година и пол интензивно работев во сите општински организации, со илјадници членови – преку директни контакти, средби и состаноци“, изјави Филипче.
Тој посочи дека СДСМ има избрани градоначалници во дел од општините, како и 16–17 општини во кои партијата влегува во втор круг, каде е забележан значаен раст на поддршката.
„Во некои општини бројот на гласови е зголемен за 40–50 отсто, а некаде гласовите се дури и дуплирани, што значи дека работата дала ефект. Но, има и општини, особено скопски, каде што тоа не се случи“, рече тој.
Филипче оцени дека овие избори се добар показател за насоката во која треба да се движи партијата во иднина.
„Очигледно е дека во дел од општините е потребна уште поинтензивна работа. Овие избори се јасен сигнал како треба да се поставиме и како да функционираме во следниот период“, додаде тој.
Во завршницата од изјавата, Филипче најави и кадровски и политички промени по завршувањето на изборниот процес.
„Ќе има политички и кадровски промени во раководството на партијата – за што јавноста ќе биде навремено информирана“, истакна претседателот на СДСМ.

