Македонија
(Видео) Специјалните полициски единици добија модерен оперативен штаб во Ѓорче Петров

Министерот за внатрешни работи Оливер Спасовски се обрати на денешната церемонија по повод пуштањето во употреба на реновираниот објект на Полицискиот центар „Ѓорче Петров“, на која учествуваше и амбасадорката на САД, Кејт Мари Брнз.
„Станува збор за важна донација од Европската команда на Армијата на САД, во вредност од околу 475 илјади долари која е реализирана преку ИЦИТАП програмата, Меѓународна програма за поддршка во обука во доменот на кривични истраги при Владата на САД, а добиена преку Амбасадата на САД. Со неа Специјалните полициски единици во полицискиот центар ‘Ѓорче Петров’ добија реновиран модерен објект за сместување на полициски службеници од нашата држава, но и од целиот регион, кои учествуваат во обуки и вежби за организирана борба против недозволената трговија со наркотици“, рече министерот Спасовски.
Тој нагласи дека со овој проект полицискиот центар „Ѓорче Петров“, кој е и оперативен штаб на Единицата за брзо распоредување при БЈБ, ќе има дополнителен инпут и во зголемувањето на полициската интероперабилност во регионот, бидејќи овие професионалци од повеќе земји – Албанија, Србија, Хрватска, Косово, БиХ, Бугарија, Грција – работат заедно во борбата за сузбивање на меѓународните криминални групи инволвирани во трговијата со наркотици.
Спасовски упатувати благодарност до ИЦИТАП програмата при Амбасадата на САД во земјава, кои како партнер и силен поддржувач, изминативе години несебично инвестирале во осовременување на капацитетите на МВР, преку бројни донации во разновидна техничка помош, но и во стручна, професионална и техничка едукација и обука на полициските службеници од повеќе организациони единици.
За амбасадорката Брнз овој модерен објект ќе значи поддршка за интерните обуки на специјалните единици во државата, но ќе придонесе и за продлабочување на регионалната соработка со соседните и партнерските држави на Балканот.
Таа потсети дека Специјалната антитерористичка единица веќе заврши интензивна и ригорозна специјалистичка обука во Германија заедно со специјалните единици на САД, со цел подготовка за урбани операции во најтешките и најсложени мисии, при што на полициските службеници кои учествуваа на обуката им додели сертификати.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Дел од Карпош и Аеродром денеска без струја

Од ЕВН Македонија АД известуваат дека денеска без електрична енергија ќе останат:
– во периодот од 08.30 до 15.30 часот, корисниците од улицата Франце Прешерн, општина Карпош;
– во периодот од 09.00 до 13.00 часот, корисниците од улиците Симеон Кавраков, Петар Ацев и Анастас Митрев, општина Аеродром.
Македонија
Сончево со умерена облачност, попладне нестабилно со пороен дожд и грмежи

Сончево со мала до умерена облачност. Ќе дува умерен, а во северните делови засилен северен ветер, кој ќе предизвика опаѓање на дневната температура за 3 до 5 степени. Попладне ќе има локален развој на нестабилна облачност со пороен дожд и грмежи. Минималната температура ќе биде во интервал од 12 до 19, а максималната ќе достигне од 27 до 36 степени.
Во Скопје, сончево со мала до умерена облачност. Ќе дува умерен, а попладне засилен северен ветер. Минималната температура ќе се спушти до 17, а максималната ќе достигне до 32 степена.
Времето во наредните денови
Од денеска до среда во попладневните часови ќе има развој на нестабилна облачност со локален пороен дожд и грмежи. Потоа ќе преовладува претежно стабилно време, а дневните температури ќе бидат без промени.
Македонија
(Фото) Успешна евакуација на повредено лице со хеликоптер на Армијата

Вчера, во попладневните часови, по добиено барање од Центарот за управување со кризи (ЦУК), Армијата на Република Северна Македонија, поради сериозноста на повредите и непристапниот терен, изврши итна медицинска евакуација со хеликоптер од вВИНГ, на лице кое паднало во провалија во близина на Ливадичко Езеро, Шар Планина.
Повреденото лице, при падот, се здобило со скршеници на раката, ногата и колкот, како и со обилно крварење, поради што било во критична состојба. На лице место интервенираше екипаж- тим на парамедици, кои и покрај непристапниот терен успешно го извлекоа и имобилизираа повредениот.
„Армијата во координација со ЦУК и здравствените установи изврши успешна медицинска евакуација и го предаде повреденото лице на екипа од итната медицинска помош, по што истото беше транспортирано на понатамошен болнички третман.
Армијата на Република Северна Македонија, заедно со останатите институции во државата продолжува да дејствува во интерес на граѓаните, обезбедувајќи навремена и професионална поддршка“, се наведува во соопштението на Генералштабот на Армијата