Македонија
Европската комисија најави помош од 3.3 милијарди евра за Западен Балкан

Европската комисија објавува над 3.3 милијарди евра финансиска поддршка обезбедена заедно со Европската инвестициска банка во корист на граѓаните на Западен Балкан. Овој пакет на поддршка има за цел да одговори на итните здравствени и последователни хуманитарни потреби прeдизвикани од пандемијата на Ковид-19, како и да го помогне социјалното и економското закрепнување.
Освен засилената поддршка, Комисијата во својот придонес, пред состанокот на лидерите од ЕУ-Западен Балкан, на 6 мај 2020 исто така дава преглед на општите параметри за долгорочна поддршка која ќе биде претставена наесен во форма на економски и инвестициски план за регионот.
Претседателката на Европската комисија, Урсула фон дер Лејен, рече: „Имаме посебна одговорност да им помогнеме на нашите партнери во Западен Балкан во оваа пандемија, затоа што нивната иднина е јасно припаѓа во Европската Унија. ЕУ обезбедува значителен финансиски пакет, кој ја потврдува силната солидарност. Заедно ќе ја надминеме оваа криза и ќе закрепнеме. И, уште повеќе, ќе продолжиме да го поддржуваме регионот, вклучувајќи ги реформите потребни на европскиот пат, бидејќи закрепувањето ќе биде ефикасно само доколку земјите продолжат да ги исполнуваат нивните обврски“.
Комесарот за соседска политика и проширување, Оливер Вареји, искоментира: „Европската Унија реагираше брзо и сеопфатно да го поддржи Западен Балкан во справување со пандемијата на Ковид-19, преку неспоредлива финансиска помош, како и пристап до бројни иницијативи на ЕУ. А, нашата работа ќе продолжи додека подготвуваме економски и инвестициски план за регионот, за справување со тешките социо-економско последици од кризата, модернизација на економиите во регионот, поддршка на реформите и да почнеме да го затвораме јазот во однос на развојот и на тој начин создавајќи побрзо конкретни придобивки за луѓето“.
Поддршка од ЕУ за Западен Балкан во справување со коронавирусот
Пакетот за финансиска поддршка на ЕУ вредна над 3.3 милијарди евра вклучува пренамена на средства од Инструментот за претпристапна помош од 38 милиони евра итна поддршка за здравствениот сектор, особено преку испорака на основни производи неопходни за спасување животи, како на пример лична заштитна опрема, маски и вентилатори, 389 милиони евра за потребите на социјалното и економското закрепнување и други 455 милиони евра вреден пакет за економски заживување на регионот во тесна соработка со меѓународните финансиски институции, како и предлог за 750 милиони евра на макро-финансиска помош и 1.7 милијарда евра пакет на финансиска помош преку Европската инвестициска банка.
ЕУ обезбедува и непосредна хуманитарна помош за ранливи бегалци и мигранти во висина од 4,5 милиони евра и 8 милиони евра за итни потреби на мигранските кампови ширум регионот.
Како резултат на епидемијата на коронавирусот, Западен Балкан го активира Механизмот за цивилна заштита на Унијата (УЦПМ) и веќе почна да добива помош во вид на опрема и репатријација на граѓани од земјите членки на УЦПМ и од државите учеснички. Освен тоа, со оглед на нивната европска перспектива, ЕУ ги третира земјите од Западен Балкан како привилегирани партнери, давајќи им пристап до бројни иницијативи и инструменти резервирани за земјите членки на ЕУ. Ова вклучува, на пример, заедничка набавка на медицинска опрема, изземање на регионот од правилата на ЕУ за одобрување извоз на опрема за лична заштита, осигурување брз проток на основните производи низ копнените граници преку т.н. „зелени ленти“, и обезбедување од страна на ЕУ материјал за тестирање за да се осигура точно фунционирање на тестовите за коронавирус во Западен Балкан. Регионот е поврзан и со работата на релевантните здравствени тела.
Во иднина – план за економска и инвестициска обнова
На Западен Балкан ќе му треба постојана поддршка за да се справи со последиците од пандемијата откако ќе заврши првичната криза. Наесен Европската комисија ќе претстави Економски и инвестициски план за регионот за да ја поттикне долгорочната обнова, да го зајакне економскиот раст и да ги поддржи реформите неопходни за напредок по патот кон ЕУ.
Освен тоа, планот ќе вклучи и значаен инвестициски пакет за регионот. За периодот 2021-2027 година, Комисијата предложи вкупна сума од 14,5 милијарди евра за Претпристапниот инструмент 3, од кои најголем дел се наменети за Западен Балкан. Комисијата предвидува удвојување на грантовите кои се доделуваат преку Инвестициската рамка за Западен Балкан и значително зголемување на финансиските гаранции за поддршка на јавни и приватни инвестиции во регионот преку наменски гаранциски инструмент кој е дел од Инвестициската рамка за Западен Балкан.
Зелената транзиција и дигиталната трансформација ќе играат централна улога во покренувањето и модернизирањето на економиите во Западен Балкан. Инвестирањето во чисти и дигитални технологии и капацитети, заедно со циркуларната економија, ќе помогне да се отворат нови работни места и да се постигне раст. Поддршка ќе се обезбеди и за да се подобри конкурентноста на економиите во Западен Балкан, за тие подобро да се поврзат и во рамките на регионот и со ЕУ, и да му се помогне на Западен Балкан да се подготви за дигиталната ера. Силен акцент ќе се стави на транспортните и енергетските врски, кои се клучни за економскиот развој на регионот, но и на ЕУ.
Работење на фундаменталните реформи
Закрепнувањето од сегашната криза ќе се оствари само ако партнерите продолжат да ги исполнуваат нивните определби за реформи и да покажуваат видливи резултати во нивното спроведување. Ова е клучно за остварување на европската перспектива. Освен постојани економски реформи, ова бара посилен фокус на владеењето на правото, фунционирањето на демократските институции и јавната администрација.
Шефовите на држави и влади на ЕУ и од Западен Балкан ќе одржат на 6 мај 2020 година лидерски состанок ЕУ-Западен Балкан за да се осврнат на заедничките предизвици. Првично замислен како самит во Загреб, овој состанок ќе се одржи во форма на видеоконференција. Денешните предлози се придонес на Комисијата кон разговорите и заклучоците на претстојниот состанок.
Глобалниот одговор на ЕУ на пандемијата на коронавирусот го следи пристапот „Тим Европа“, комбинирајќи ресурси од ЕУ и од нејзините земји членки и финансиски институции, особено Европската инвестициска банка и Европската банка за обнова и развој. Заедно со нашите партнери се осигуруваме дека значајните средства кои веќе им се доделени на земјите од Западен Балкан се наменети да им помогнат во справувањето со последиците од пандемијата. Во исто време, билатерална помош обезбедуваат и земји членки на ЕУ во форма на финансиски средства или донации на производи.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Земјотресот на Света Гора почувствуван и во Македонија

Силниот земјотрес на Света Гора почувствуван и во југоисточниот дел на Македонија.
„Телеметриската сеизмолошка мрежа на Република Северна Македонија, на сеизмолошките станици инсталирани ширум нашата територија, одржувани од Сеизмолошката опсерваторија при Природно-математичкиот факултет во Скопје, денес 7 јуни 2025 година регистрираа серија на земјотреси чии епицентри потекнуваат од соседна Република Грција.
Според досегашните податоци со кои располага опсерваторијата, почувствуван е земјотресот во 14 часот и 46 минути чиј епицентар се наоѓа 290 km југоисточно од Скопје, со Рихтерова локална магнитуда M L 5.2.
Земјотресот беше почувствуван во југоисточниот дел на Републиката со интензитет од III степени според Европската макросеизмичка скала“, известија од Сеизмолошката опсерваторија.
Македонија
АХВ го одбележа 7 Јуни – Светски ден на безбедна храна

Aгенцијата за храна и ветеринарство и оваа година се приклучи и ја поддржува глобалната иницијатива и го одбележа 7 јуни, Светски ден на безбедна храна. Со едукативен и спортско рекреативен настан наменет за граѓаните и децата, денес, во паркот Авионче во скопската населба Ново Лисиче на присутните им беа поделени едукативни флаери за безбедноста на храната, а за најмалите се одржаа спортско-рекреативни игри преку кои се афирмираше безбедноста на храната и нејзиното значење.
На 10 јуни, во вторник, со поддршка и во соработка со Европската агенција за безбедност на храната – ЕФСА, Агенцијата за храна и ветеринарство ќе одржи настан за подигнување на јавната свест за безбедноста на храната на која ќе учествуваат реномирани претстставници од EFSA, од научните и други институции поврзани со прашпања кои се однесуваат на производството на храна и нејзината безбедност.
Годинашното мото на Светскиот ден на безбедна храна – 7 јуни е „Науката во акција“ и тоа денес не потсетува на важноста на науката како основна алка од синџирот на безбедна храна. Едноставно, тоа е дел без кој не се може и кој ги создава основите за креирање на политиките за безбедност на храната од страна на институциите, како што е и Агенцијата за храна и ветеринарство.
Преку едукативниот спортско рекреативен настан кој се одржа денес и настанот кој во соработка со EFSA ќе се одржи во вторник, АХВ и годинава активно работи на подигнување на свеста на граѓаните за важноста на безбедноста на храната и за превенирање и управување со ризиците со цел унапредување на нивното здравје.
Македонија
(Видео) Василевски: Нула нови градинки за 4 години во Аеродром, околу 700 деца чекаат за запишување секоја година

Изминаа речиси 4 години откако ВМРО-ДПМНЕ ја освои локалната власт. И По 4 години, ВМРО-ДПМНЕ во Општина Аеродром не изгради ниту една од ветените 4 нови градинки, рече денеска на прес-конференција Бојан Василевски, ОО СДСМ Аеродром.
„Овиe градинки беа првиот од 7-те топ приоритети на Муцунски и Митески во програмата со кои ја освоија довербата на нашите сограѓани од Аеродром. Митески и Муцунски ветија целосно нови градинки во Острово, Мичурин, Лисиче и Долно Лисиче, но еве, четири години подоцна, ниту една од овие ветени градинки до денес не е ни започната со градба“, вели Василевски.
Според него, околу 700 дечиња годишно се на листа за чекање за упис во градинка, заради недостатокот на места во градинките во Аеродром.
„ВМРО-ДПМНЕ во Аеродром покажа целосна незаинтересираност за решавање на овој проблем. Единствениот објект на градинка кој се гради во моментов во Стар Аеродром е со 70.000.000 денари, средства обезбедени од Владата на СДСМ во 2024 година. Само за споредба, кога со Општина Аеродром управуваше СДСМ се изградија 2 нови градинки со вкупен капацитет од 400 деца. Целосно нов објект Црвенкапа во Стар Аеродром со капацитет од 200 деца и целосно нов објект Буба Мара во Ново Лисиче со капацитет од исто така 200 деца“, кажа Василевски.