Свет
Нов пресврт, царините на Трамп остануваат во сила

Царините што ги воведе администрацијата на Доналд Трамп, а кои претходно оваа недела беа укинати од Трговскиот суд на САД, привремено ќе бидат вратени додека трае жалбената постапка низ судскиот систем, одлучи Сојузниот жалбен суд.
Одлуката доаѓа откако панел од тројца сојузни судии заклучи дека Трамп ги надминал своите овластувања со воведувањето на глобалните царини, повикувајќи се на закон што овозможува итни мерки во надворешнотрговската политика.
На почетокот на годината Трамп воведе универзална царина од 10 отсто за речиси сите увозни производи. Најави уште повисоки стапки за земји како Мексико, Канада и Кина. Ги прошири таканаречените индустриски тарифи со дополнителни 25 отсто за челик, алуминиум и автомобили.
Трговскиот суд пресуди дека претседателот нема законско овластување да наметнува огромни тарифи врз основа на Законот за меѓународни економски овластувања за вонредни состојби (IEEPA). Пресудата не вклучува индустриски царини, кои почиваат на друга правна основа.
Белата куќа веднаш поднела жалба, а Апелациониот суд за Федералното подрачје одобри привремено задржување на пресудата:
„Барањето за привремено одлагање се уважува до степен до кој пресудите и трајните забрани на Стопанскиот суд се привремено прекинати до дополнително известување, додека овој суд го разгледува жалбениот предмет“, се вели во одлуката.
Тоа значи дека тарифите на Трамп остануваат во сила додека трае процесот на жалба.
Иако привременото враќање на тарифите е победа за Белата куќа, правната битка е далеку од завршена. Одлуката на судот за привремената суспензија не го прејудицира конечниот исход, но му дозволува на Трамп да задржи инструмент за трговски притисок додека трае правниот процес.
Питер Наваро, еден од најблиските економски советници на претседателот Доналд Трамп, ја коментираше оваа одлука набргу по нејзиното донесување и рече – „Трифната агенда на Трамп не успорува, без оглед на правните пречки“.
Говорејќи откако Апелациониот суд привремено ги врати тарифите претходно укинати од Трговскиот суд, Наваро рече дека Белата куќа е подготвена да оди пред Врховниот суд за да ја брани уставноста на своите трговски политики.
„Подготвени сме да одиме понатаму во ланецот“, рече Наваро, јасно укажувајќи дека Врховниот суд останува клучна фаза во одбраната на овластувањето на претседателот да наметнува тарифи.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
Израелскиот министер: Ако ајатолахот беше на нишан, ќе го елиминиравме

Израелскиот министер за одбрана Израел Кац откри во интервју за „Канал 13“ дека Израел имал намера да го елиминира врховниот лидер на Иран, ајатолахот Али Хамнеи, но дека таа можност никогаш не се појавила.
„Да беше на нишан, ќе го елиминиравме. Сакавме да го елиминираме Хамнеи, но немаше оперативна можност“, рече Кац.
На прашањето дали Израел побарал американско одобрение за таква акција, Кац одговори: „Не ни треба дозвола за тие работи“.
Минатата недела, Ројтерс, повикувајќи се на двајца американски функционери, објави дека американскиот претседател Доналд Трамп ставил вето на израелскиот план за атентат врз иранскиот ајатолах.
Трамп подоцна го нарече ајатолахот „лесна цел“ во објава на неговата социјална мрежа Truth Social.
„Знаеме точно каде се крие таканаречениот „врховен лидер“. Тој е лесна цел, но таму е безбеден – сè уште нема да го отстраниме (убиеме)! Но, не сакаме ракети испукани врз цивили или американски војници. Нашето трпение е при крај. Ви благодариме за вашето внимание!“, напиша тој во таа пригода.
Свет
Шефoт на МААЕ: Центрифугите во нуклеарниот комплекс Фордо повеќе не се во функција

Генералниот директор на Меѓународната агенција за атомска енергија (МААЕ), Рафаел Гроси, изјави дека нуклеарната програма на Иран претрпе огромна штета по неодамнешните напади од страна на САД и Израел, пренесува Анадолија.
„Нападите што започнаа на 13 јуни предизвикаа значителна физичка штета на три главни локации: Натанц, Исфахан и Фордо, каде што Иран ги концентрираше поголемиот дел од своите активности за збогатување и конверзија на ураниум“, изјави Гроси за француското радио RFI.
Тој нагласи дека има и други локации кои не биле погодени, но тврди дека штетата е исклучително значајна. „Вистина е дека, со оглед на намалените капацитети, ќе биде многу потешко за Иран да продолжи со темпото со кое работел досега“, истакна тој.
Додаде дека добро ја познава ситуацијата на одредени локации, но повтори дека е потребно инспекторите да излезат на местото на настанот, што не е лесно. Тој особено истакна дека центрифугите на локацијата Фордо повеќе не се во функција.
„Не можеме целосно да процениме, ниту некој може со сигурност да ја каже точната големина на штетата. Но, веќе знаеме дека, со оглед на моќта на тоа оружје и техничките карактеристики на центрифугите, тие повеќе не се во функција. Ова се машини кои бараат прецизно позиционирање, има ротори, делови, па штетата мора да биде целосна“, објасни тој.
Запрашан за одлуката на Иран да ја суспендира соработката со МААЕ, Гроси изрази голема загриженост и рече дека Иран не може еднострано да ја суспендира соработката.
„Присуството на агенцијата во Иран не е чин на добра волја. Тоа е меѓународна обврска. Иран е потписник на Договорот за неширење на нуклеарно оружје и како таков мора да биде предмет на инспекцискиот систем“, рече тој.
Додаде дека ако Иран одбие пристап до инспекторите, апсолутно ќе има последици. На крајот, Гроси рече дека останува разумен и реалистичен, со надеж дека е можно дијалогот да се обнови и инспекциите да продолжат.
Свет
Автобус полн со ученици падна од патот во река во Англија

Утрово околу 10:07 часот, училишен автобус на „Блустар“ што превезувал ученици од средното училиште „Бартон Певерил“ излетал од патот и паднал во реката во Истли. Во моментот на несреќата, во возилото имало 20 лица, односно 19 ученици и возач. Пет лица се хоспитализирани, од кои две со сериозни, но стабилни повреди.
„Сè уште не е познато зошто автобусот излетал од патот. Истрагата е во тек“, рече инспекторот Енди Тестер од полицијата во Хемпшир.
„Можам само да замислам какво застрашувачко искуство мора да било ова за децата и возачот“.
Според изјавите на службите за итни случаи, „бројни ресурси, две хеликоптерски единици, пет амбулантни возила и технички екипи за спасување беа веднаш испратени на терен“. Неколку лица, вклучувајќи го и возачот, беа привремено заробени во возилото, но сите беа успешно евакуирани.
Некои ученици успеаја сами да излезат од превртениот автобус, додека други чекаа помош. Околу 14 лица со полесни повреди беа прегледани и згрижени на лице место. „Беше многу хаотично, но сите служби реагираа брзо и професионално“, рече еден од присутните спасувачи.
Средното училиште Бартон Певерил веднаш отвори информативен центар за родители во The Hub во Бишопстоук и ги повика да не доаѓаат директно на местото на настанот. „Ги молиме родителите за трпение додека не се стабилизира ситуацијата“, соопшти училиштето преку социјалните мрежи.
Полицијата го затвори патот за истрага и отстранување на возилото, а се очекува сообраќајниот дел да остане затворен до пладне. Во спасувањето беа вклучени противпожарни екипи од неколку блиски градови, а граѓаните беа апелирани да ја избегнуваат областа додека трае интервенцијата.