Македонија
Отфрлена кривичната пријава на судијката Лидија Неделкова против тројца членови на Судскиот совет

Скопското обвинителство ја отфрли кривичната пријава поднесена од поранешната претседателка и актуелна судијка во Врховнот суд Лидија Неделкова против претседателот на Судскиот совет, Киро Здравев, и двајца членови на Советот. Неделкова смета дека членовите на Советот ја злоупотребиле службената положба при одлучувањето за нејзиното разрешување.
„Пријавителката во кривичната пријава наведе дека пријавените, во својство на службени лица, во периодот од септември 2020 до јануари 2021 година ја злоупотребиле службената положба при одлучувањето и гласањето на седница на Сускиот совет на која се разгледувал извештај за утврдување одговорност на судијката на Врховниот суд. Тие наводно ги пречекориле границите на своето службено овластување со намера потешко да ги повредат правата на оштетената, а притоа од лични и политички причини вршеле влијание и врз другите членови на Судскиот совет при одлучувањето. Така, предлогот на Комисијата која го разгледувала извештајот и предложила запирање на постапката против судијката на Врховен суд го вратиле на доработка, потоа избрале нов член во Комисијата и одлучувале без да ја известат оштетената за резултатите од гласањето и за дополнително спроведените дејствија. На 19.1.2021 година Комисијата, без никакви дополнително утврдени околности, донела предлог-одлука за разрешување на судијката во Врховен суд“, соопшти Обвинителството.
Од анализа на хронологијата на целокупното постапување произлегло дека Судскиот совет на седницата одржана на 29.9.2020 година расправал по извештајот на Комисијата со кој се предлага запирање на постапката против оштетената.
Но, при гласањето не било постигнато потребното двотретинско мнозинство за одлуката да помине, па согласно член 60-д од Законот за изменување и дополнување на Законот за Судскиот совет било оценето дека е потребна доработка на предметот и списите биле вратени на Комисијата. Изборот на нов член на предметната комисија бил извршен со ждрепка, согласно член 56 став 3 од Законот за изменување и дополнување на Законот за Судскиот совет.
„Од записниците се констатира дека една од пријавените членови на Судскиот совет воопшто не се јавила за збор при расправата за извештајот, додека другата пријавена се јавила за збор и дала образложено мислење за кое не може да биде повикана на одговорност, имајќи ги предвид правата и обврските на членовите на Судскиот совет пропишани со закон. Комисијата за утврдување одговорност на судија одржала ново советување и гласање на 18.01.2021 година, но до Советот сè уште не доставила извештај со предлог-одлука“, се наведува во соопштението.
Од тие причини надлежниот јавен обвинител одлучил дека во дејствата на пријавените не се содржани елементи на кривично дело кое се гони по службена должност.
Неделкова против ова решение има право на жалба во рок од осум дена до Вишото јавно обвинителство Скопје.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Крајна фаза од реконструкцијата на улицата Радушка во Ѓорче Петров

Реконструкцијата на улицата „Радушка“ во Ѓорче Петров која сега изгледа модерно и безбедно за сите корисници е во завршна фаза, известува општината.
„Станува збор за поставување ново асфалтно-бетонско покритие на 1.110 од вкупно 2.200 метри од улицата, поточно од гробиштата до ул.„Црногорска“ во вредност од 25 милиони денари (со вклучен ДДВ), средства од општина Ѓорче Петров.
На оваа улица, досега, изградена е нова фекална и атмосферска канализација, што значително ја подобрува инфраструктурата, направен е нов тротоар од една страна од улицата за поголема безбедност на пешаците, додека онаму каде што немаше осветлување, поставени се нови светла, кои ја зголемуваат безбедноста во вечерните часови“, соопшти општината.
„Во оваа фаза на проектот вложени се значајни средства од општина Ѓорче Петров, и покрај сите предизвици, резултатите се очигледни – една поинаква, модерна и безбедна улица за сите нас.
Со завршувањето на овие 1.110 метри, целосно ќе се заврши реконструкцијата на улицата. Ова е само дел од напорите за подобрување на инфраструктурата и квалитетот на живот во нашиот град. Работиме напоредно на сите сфери кои се исклучиво од интерес на граѓаните и јавното добро“, додаваат од општина Ѓорче Петров.
Македонија
(Видео) ЦУК: Отстранета опасноста на мостот на Пчиња кај селото Бадар

Центарот за управување со кризи (ЦУК) информираше дека добиле известување од повеќе граѓани дека обилните врнежи од дожд во претходните денови предизвикале зголемување на нивото на водата во речното корито на реката Пчиња. Притоа, големиот доток на вода во речното корито, попатно низводно нанел пообилна количина дрвна маса и истите вршата притисок на столбовите, заедно со водата, на мостот, пред влезот на селото Бадар во Општина Петровец.
„Покрај со јавувања на 112 во ЦУК, со допис до ЦУК граѓаните укажуваат дека мостот е поприлично стар и веќе некои од столбовите се закосени, со што постоеше голема веројатност поради големиот притисок од водата и насобраната дрвна маса околу столбовите, истите да се срушат.
Секторот за операции и координација при ЦУК со допис ги извести надлежните институции, Општина Петровец и АД Водостопанство за преземање на мерки и активности за надминување на настаната состојба и отстран8ување на опасноста. Денеска, од Општина Петровец и АД Водостопанство сме известени дека од нивна страна е ангажирана соодветна механизација и дрвјата се исчистени од речното корито“, соопшти ЦУК.
Македонија
Зошто не е проширена истрагата за Кочани, прашуваат од СДСМ

И покрај тоа што поминаа речиси четири недели од трагедијата во Кочани, јавноста сè уште нема добиено одговори на клучните прашања: кој е одговорен за пожарот што се случи во „Пулс“ и кој е одговорен за серијата безбедносни пропусти, велат од СДСМ.
Сè уште, како што додаваат, нема проширување на истрагата за безбедносните пропусти направени на кобната ноќ, ниту пак на оние што ѝ претходеле.
„Не е повикан ниту еден актуелен функционер на распит, не е отворена постапка за никого од МВР, ОВР Кочани, СВР Штип или БЈБ кои денот на трагедијата, 16 март, биле на позиции.
Зошто не се повикуваат оние кои биле на позиции кобната ноќ?
Зошто не е проширена истрагата за Кочани иако јавно беше најавено дека ќе се случи“, прашуваат од оваа партија.
Според СДСМ, не смее да има заштитени. Одговорност, подвлекуваат мора да има, од највисоките па до најниските нивоа.
„Ова не е политичко прашање. Ова е прашање на правда, доверба и достоинство.
Граѓаните, семејствата на жртвите, сите, имаат право на вистина. Имаат право да знаат што точно се случи и кој ќе понесе одговорноост“.
СДСМ, нагласуваат, ќе продолжи да инсистира на целосна, транспарентна и неселективна истрага.