Свет
(Видео) Трамп го призна поразот, најави мирна тразиција на власта

Американскиот претседател во заминување, Доналд Трамп, призна дека Џо Бајден ќе биде следниот претседател на САД по насилниот упад на неговите приврзаници во зградата на Конгресот. Според АП, Трамп, кој во четвртокот наутро сè уште неосновано тврдеше дека изборите се украдени, синоќа објави дека ќе се фокусира на непречената и мирна транзиција на власта кон администрацијата на Бајден.
„Конгресот ги потврди резултатите. Новата администрација ќе биде инаугурирана на 20 јануари. Сега сум фокусиран на обезбедување непречен и мирен трансфер на власта. Овој момент бара зараснување на раните и помирување“, рече Трамп на видеото објавено на „Твитер“. Тој го осуди насилството велејќи дека бунтовниците го извалкаа седиштето на американската демократија. Сепак, тој не зборуваше за неговата улога во поттикнување насилство, пренесува АП.
„Вечно ми е чест да служам како ваш претседател. Им кажувам на сите прекрасни приврзаници дека знам оти сте разочарани, но исто така сакам да ви кажам дека нашето извонредно патување штотуку почнува“, рече Трамп.
Портпаролката на Трамп, Кејли Мекенени, претходно изјави дека целата Бела куќа го осудува насилството што се случи во американскиот Конгрес во средата и рече дека оние што го прекршиле законот треба да бидат кривично одговорни.
„Ние го осудуваме тоа – претседателот и оваа администрација – на најсилен можен начин“, рече Мекенени пред новинарите на брифингот за печатот во Белата куќа. „Тоа е неприфатливо и оние што го прекршија законот треба да бидат гонети“, додаде таа.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
Израелски војници забележани во градот Газа

Палестински очевидци тврдат дека во градот Газа забележани се израелски војници.
Според нив израелските војници биле забележани во населбата Сабра, во близина на зграда во која порано се наоѓало училиште.
Израелските војници наводно се заблежани во градот Газа откако израелскиот премиер Бенјамин Нетанјаху одобри план за преземање на градот, во кој живеат околу еден милион луѓе.
Израелската армија не ги коментираше палестинските наводи, истакнувајќи оти не ги открива позициите на своите војници.
Претходно Израел соопшти дека планира да евакуира околу еден милион жители од градот пред офанзивата, која се очекува да почне најрано во септември.
Свет
Зеленски вели дека постои вистинска можност да заврши војната во Украина

Претседателот на Украина, Володимир Зеленски синоќа најави дека следните денови ќе бидат готови безбедносните гаранции за неговата земја.
Тој, по телефонскиот разговор со премиерот на Холандија, Дик Шуф, на платформата Икс објави дека „во моментот тимови на Украина, САД и европските партнери работат на решение“.
Според Зеленски постои „вистинска можност да се заврши оваа војна“, додавајќи дека Украина е „подготвена за конструктивни чекори што можат да доведат до вистинскиот мир“.
– Русија од своја страна не покажува намера за мир и продолжува да ги гранатира нашите градови. Сите сигнали што доаѓаат од Москва овие денови ги толкуваме на ист начин. Ни треба притисок за промена на нивниот став, како и состанок на највисоко ниво за да се разговара за сите прашања, посочи Зеленски.
Свет
Северна Кореја тестираше нови ракети

Северна Кореја вчера истрела два нови противвоздушни проектили за уништување на различни воздушни цели, меѓу кои дронови и крстосувачки ракети. Тестирањето на новото оружје го надгледуваше севернокорејскиот лидер Ким Џонг-ун.
Како што јави Корејската централна новинска агенција (КЦНА) новото оружје има „супериорна борбена способност“ и користи „единствена технологија“.
Тестирањето на ново оружје се одвива во време на зголемени тензии со Јужна Кореја. Официјален Сеул вчера соопшти дека на 19 август јужнокорејски војници отвориле предупредувачки оган кон припадници на севернокорејската армија, кои накратко навлегле во Демилитаризираната зона.
Исто така во регионот се одржува заедничка воена вежба помеѓу Јужна Кореја и САД, а за утре е предвидена средба на американскиот претседател Доналд Трамп со новоизбраниот јужнокорејски претседател Ли Џае-мунг.