Македонија
Украдени автомобили се регистрирале во Скопје како увезени, меѓу обвинетите и лице од МВР
Поднесено е обвинение против две лица, од кои едното се товари за кривично дело – измама, додека другото лице е обвинето за продолжено кривично дело – Злоупотреба на службена положба и овластување поради регистрација на украдени автомобили со лажни документи.
Првиот обвинет на 16.06.2021 година, користејќи лажен идентитет и лична карта на туѓо име, склучил договор за наем на автомобил Mercedes benz s300 bluetec hybrid со рентакар агенција од Белград, Републка Србија. Лажно прикажал дека има намера автомобилот да го врати за еден месец, иако немал намера да го изнајми, туку да го одземе и за друг да прибави противправна имотна корист во значителна вредност. Возилото под наем, преку Косово и Македонија, на 21 јуни го однел на непозната локација во Бугарија.
На 10 јули, возилото со променет идентификационен број, се појавило повторно во земјава кога преку станица за технички преглед биле доставени документи за негова регистрација. Вториот обвинет во својство на службено лице – референт за управни работи на Одделение за управни работи – Скопје при МВР, поттикнат со умисла од лице кое до овој момент е недостапно на органите на прогонот, овозможил регистрација на возилото врз основа на некомплетна и лажна документација. Тој веднаш изготвил сообраќајна дозвола и издал регистарски таблици за возилото без да ги провери потеклото и сопственоста, вистинитоста на документите за увозно царинење и записите за техничка исправност на автомобилот, како и без да побара и обезбеди потврда од системот на Интерпол дали возилото е предмет на потрага. Со ова обвинетиот на поттикнувачот му обезбедил противправно да се стекне со значителна имотна корист во проценета вредност од 49.850 евра, соопшти Обвинителството.
При спроведувањето на истражната постапка се утврди дека истото службено лице, поттикнато од другиот обвинет и од лицето кое е недостапно да органите на прогонот, во периодот од август 2020 година до крајот на јуни 2021 година во шест други наврати овозможил регистрација на вредни автомобили во земјава, без никаква или врз основа на лажна документација.
На овој начин тој на другите двајца им овозможил противправно да станат сопственици на автомобили Fiat 500 Abarth, Renault Megane 1.6 GT, BMW X5 XDrive30D, Mercedes Benz GLE 350D 4Matic, Toyota RAV4 и Porshe Cayenne Diesel. За регистрација на возилата со изменети идентификациски броеви била приложувана фалсификувана документација дека се набавени во странство, иако всушност тие биле предмет на потрага во различни европски земји. По извршената регистрација во Скопје, автомобилите биле препродавани на трети лица, со што продавачите оствариле противправна имотна корист проценета на вкупна вредност од 218.368 евра.
За третото пријавено лице кое поттикнувало извршување на кривичните дела и кое е недостапно на органите на прогонот, постапката е во прекин до неговото пронаоѓање и лишување од слобода.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Следува период на стабилно и релативно топло време за овој период од годината
Времето утре ќе биде сончево со мала до умерена локална облачност. Ќе дува слаб до умерен, а долж Повардарието засилен ветер од северен правец.
Минималната температура ќе биде во интервал од 9 до 18, а максималната ќе достигне од 19 до 26 степени.
Во Скопје сончево со мала до умерена облачност. Ќе дува умерен ветер од северен правец. Минималната температура ќе се спушти до 14, а максималната ќе достигне до 25 степени.
Следува период на стабилно и релативно топло време за овој период од годината.
Македонија
Сиљановска Давкова се обрати на Свечената академија по повод 11 Октомври – Денот на народното востание
Претседателката Гордана Сиљановска Давкова денеска се обрати на свечената академија по повод 11 Октомври – Денот на народното востание, што под нејзино покровителство се одржа во Музејот на македонската борба за самостојност.
„Во историјата на секој народ постојат периоди на големи премрежја што можат да се пребродат само со храбри одлуки. Таков мрачен период беше Втората светска војна, кога речиси цела Европа беше под фашистичка окупација, и кога Хитлер и неговите сојузници изгледаа незапирливи и непобедливи. Во такви услови, на 11 октомври 1941-та, македонскиот народ посегна по непресушното човеково право на отпор против опресијата, неправдата и окупацијата и храбро, без колебање, ја избра вистинската страна во најголемата војна во историјата на човештвото. 11 октомври е меѓникот што ја одреди нашата иднина, денот кога ние храбро и одлучно се вклучивме во антифашистичката коалиција на слободољубиви и правдољубиви народи.
Херојската борба против фашизмот нè сплоти, нè прероди и ни даде легитимитет како народ да се самоопределиме и да создадеме слободна македонска држава на Првото заседание на АСНОМ. Како еден од најголемите демократски триумфи на човештвото, антифашизмот ни овозможи на историската сцена да настапиме рамноправно и со чиста совест да учествуваме во обновата на разрушениот свет. Не случајно, македонската држава за која копнееја Илинденците и за која се изборија антифашистите, трае веќе 80 години. Нејзината сегашност и нејзината иднина се сраснати со нејзиното минато“, рече Сиљановска Давкова.
„Нас никој не нѐ ослободи. Сами се ослободивме со помош на над 110-илјадната Народноослободителна војска на Македонија. Нам никој не ни ја подари државата. Сами се изборивме за неа. За нас, антифашистичката беше и истовремено и народноослободителна војна во која дадовме 24.000 жртви.
Затоа, ние не смееме да дозволиме историски ревизионизам и релативизирање на народноослободителната и антифашистичка борба, бидејќи со тоа би се поткопале илинденските и антифашистичките темели врз кои е изградена македонската држава. Со тоа би се обезвреднила жртвата на илјадници млади борци кои несебично гинеа за слободата и правдината. Ние тоа не смееме да го дозволиме“, изјави Сиљановска Давкова.
Во рамки на Свечената академија настапи Воениот оркестар на Армијата со сплет на македонски патриотски и партизански песни.
Македонија
Ахмети со чешкиот амбасадор Лудва: Земјата се оддалечува од Европа, да се вратиме на правец кон Брисел
Претседателот на Демократската унија за интеграција, Али Ахмети, во Тетово се сретна со чешкиот амбасадор во Скопје, Јарослав Лудва.
Претседателот Ахмети и амбасадорот Лудва главно разговараа за интеграцијата на земјата во обединета Европа и петте приоритети кои ги објави Ахмети.
„Уставните измени и продолжувањето на европскиот пат е приоритет над приоритетите на Ахмети, Демократската унија за интеграција и Албанците, но тоа треба да биде приоритет за сите.
Ветингот за политичари, судии и обвинители со меѓународен мониторинг, проверка на богатството и имотот ма сите носители на јавни функции, истрагата за приватизацијата и олигархијата креирана од тој процес, се предуслови за неселективно владеење на правото и стопирање на политички лов на вештерки со партиска пропаганда“, соопшти ДУИ.
„ДУИ не е заинтересирана да биде дел од владата, но ќе продолжи да алармира дека на власта и недостасува етнички легитимитет и тоа ги прави владините одлуки моноетнички.
Претпочитаните и преференцијални Албанци предизвикуваат непоправливи последици
Северна Македонија е мултиетничка земја и има потреба од хармонија меѓу двете мнозински заедници, Албанците и Македонците. Взаемното почитување е почетна точка за стабилност, стабилност, безбедност и одржлива иднина на земјата.
Системското кршење на Охридскиот договор од страна на Владата и Уставниот суд е неприфатливо и е алармантно за општеството и мултиетничкиот карактер на државата“, се додава во соопштението на ДУИ.