Свет
Полицијата намамила манијак да пешачи 500 километри за да се сретне со 14-годишно девојче

Маж пешачел 500 километри од предградието на Индијанаполис во Висконси, за да се сретне со девојче за кое верувал дека има 14 години и со кое разговарал на „Фејсбук“, соопшти американското обвинителство.
Наместо тоа, 32-годишниот Томи Ли Џенкинс, всушност, разговарал со полициски инспектор кој работи на интернет-злосторства против децата, се вели во соопштението од канцеларијата на јавниот правобранител на САД во источниот округ Висконсин.
Тој е обвинет за употреба на компјутер за да се обиде да убеди, принуди или привлече малолетничка да се вклучи во незаконска сексуална активност, велат од канцеларијата. Тој се соочува со казна затвор од 10 години до доживотен затвор доколку биде осуден.
„Нашата нација се соочува со епидемија на сексуална злоупотреба на деца, при што интернетот им олеснува на предаторите да комуницираат со децата во целата земја“, се вели во изјавата на адвокатот на Соединетите Американски Држави, Метју Д. Кругер, и се додава: „Министерството за правда е посветено на соработка со федерални, државни и локални агенции за спроведување на законот за агресивно гонење на сексуалната злоупотреба на децата“.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
Тајлер Робинсон – од стипендист со блескава иднина до осомничен за убиството на Чарли Кирк

Тајлер Робинсон (22) од Јута, кој некогаш важел за одличен ученик и добитник на претседателска стипендија на Универзитетот „Јута стејт“, денес е главен осомничен за убиството на десничарскиот активист Чарли Кирк.
По успешното завршување на средно образование во 2021 година, Робинсон добил четиригодишна стипендија и бил сметан за примерен студент. Но, по само еден семестар ја напуштил академијата и подоцна се запишал на „Дикси Техникал Колеџ“ како електричар-приправник.
Истрагата за убиството открила пушка со чаури на кои биле гравирани пораки – од антифашистички слогани и стихови од „Бела чао“ до интернет мемиња. Семејството признало дека во последно време станал политички поактивен и отворено критичен кон Кирк.
Пријателите и соседите сепак го опишуваат како тивок, повлечен и голем љубител на видео игри, без претходни проблеми со законот. Робинсон бил уапсен откако неговиот татко го препознал на фотографиите објавени од полицијата и го убедил да се предаде.
Свет
Орбан до Западот: Не примаме наредби од неизбрани бирократи, одговараме само пред нашиот народ

Унгарскиот премиер Виктор Орбан изјави дека неговата земја веќе три и пол години ја плаќа цената на војната во Украина, и покрај тоа што, како што рече, „тоа не е нашa војна“.
Тој нагласи дека западните лидери се обидуваат уште подлабоко да ја вклучат Унгарија во конфликтот, но дека Будимпешта ќе продолжи да се спротивставува.
„Ќе го браниме нашиот народ, нашата слобода и ќе тежнееме кон мир,“ порача Орбан преку платформата Икс.
Тој додаде дека Европската унија е создадена да им служи на суверените нации, а не да владее со нив. „Брисел не ја контролира Унгарија. Не примаме наредби од неизбрани бирократи, одговараме само пред нашиот народ. Време е работите да се исправат,“ изјави Орбан.
Свет
Се откачи жичница во Русија, повеќе од 30 евакуирани, има загинати

На планината Елбрус, во руската република Кабардино-Балкарија, се случи несреќа со жичница при што загинаа три лица, а повеќе од 30 беа евакуирани, соопштија локалните власти.
Според првичните информации, загинале жител на Кабардино-Балкарија, жена од Дагестан и маж од Москва. Несреќата настанала кога сајлата излетала од валјак на еден од носачите.
Во моментот на инцидентот, на жичарата имало 37 луѓе, од кои 35 биле успешно евакуирани.