Македонија
ВМРО-ДПМНЕ нема да го поддржи законот за поништување на лустрацијата

„Партијата на аболицираниот Зоран Заев сега прави аболиција на кодошите“, изјави на прес-конференција во Собранието пратеникот Зоран Илиоски од пратеничката група на ВМРО-ДПМНЕ, по повод законот за поништување на лустрацијата, кој денеска е ставен пред членовите на собраниската Комисија за политички систем и односи меѓу заедниците.
ВМРО-ДПМНЕ оценува дека законот е во целосна спротивност на европските вредности и демократските принципи и затоа нема да го поддржат.
„Со СДСМ, Македонија стана единствена држава во Европа во која нема лустрација на кодошите на комунистичкиот режим, кои цели кариери изградија врз база кодошење на македонските патриоти, но и недолжни граѓани. Република Македонија е единствена држава во Европа во која кодошите на комунистичкиот режим кои местеа луѓе и уништуваа човечки судбини, наместо осуда, за тоа ќе добијат и пари од државата“, рече Илиоски.
Според ВМРО-ДПМНЕ, СДСМ им овозможува на десетици кодоши кои зацрниле цели семејства сега да добијат пари од буџетот, кој го полнат децата на некогашните нивни жртви. Илиоски вели дека во ЕУ не се оди со остатоците од комунизмот преобразени во демократи.
„Македонија наместо европска држава станува како Северна Кореја каде со декрет на Заев се простува тоа што го правеле соработниците на тајните служби“, вели пратеникот.
Владата на крајот на декември минатата година го утврди текстот на предлог-закон за огласување ништовност и поништување на правни акти, дејствија, мерки и правни последици од постапките за лустрација.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Андоновска: ВМРО-ДПМНЕ ги трансформира општините и создава иднина дома

Викторија Андоновска oд ВМРО-ДПМНЕ изјави дека градоначалниците на оваа партија во изминатите четири години ја оправдале довербата на граѓаните и со посветена работа успеале да ги трансформираат општините.
Таа нагласи дека локалната власт предводена од владејачката структура ги вратила општините на вистинскиот пат по блокирани сметки и големи финансиски проблеми.
Според податоците што ги презентираше, од 2021 година до денес се изградени и реконструирани над 770 километри патишта во вредност од 100 милиони евра, поставени 138.000 метри водоводна и канализациона мрежа и изградени 12 пречистителни станици. Повеќе од 400 училишта се реконструирани и модернизирани со услови за едносменска настава, а учениците од прво до петто одделение во дел од општините добија бесплатна храна и летување. Дополнително, на училиштата се поставени фотоволтаици, а во делот на социјалната заштита беа реконструирани 70 детски градинки и изградени нови, со инвестиции над една милијарда денари.
Андоновска потсети дека во последните 15 месеци централната власт вложила 500 милиони евра во капитални проекти за локален развој преку два јавни повици, на кои општините поднеле стотици апликации.
Македонија
Османи: Обвинувањата за коалиција со Левица се очајнички обиди

Кандидатот за градоначалник на Чаир од ДУИ, Бујар Османи, ги оцени како очајнички обвинувањата дека ДУИ наводно има коалиција со Левица. Тој изјави дека ваквите конструкции се обид на ВЛЕН да подготви оправдување за можен изборен пораз.
Османи нагласи дека ДУИ настапува обединето преку Националната алијанса за интеграција, која, според него, ја претставува волјата на мнозинството Албанци.
Тој порача дека изборите на 19 октомври се „судир меѓу два концепта – достоинството на Албанците или нивната подреденост“, и најави дека ДУИ ќе продолжи со позитивна и програмска кампања.
Македонија
Меџити најави изградба на Територијална противпожарна станица во Чаир

Кандидатот за градоначалник на Општина Чаир од редовите на ВЛЕН, Изет Меџити, денеска ја најави изградбата на нова Територијална противпожарна станица во срцето на општината.
„Брзата интервенција спасува животи. Оваа станица не е луксуз, туку животна потреба и директна инвестиција во безбедноста и благосостојбата на граѓаните,“ изјави Меџити.
Проектот предвидува модерен објект од 750 м², три противпожарни возила и 12 професионални пожарникари, обучени за интервенции на секој терен.
Меџити им се заблагодари и на членовите на Доброволното противпожарно друштво „Бајрам Мифтари“, кое со години претставува важен столб на јавната безбедност во Чаир и пошироко.
„Чаир заслужува модерна инфраструктура и сигурни услуги. Оваа станица значи повеќе спасени животи, помалку штети и поголема институционална одговорност,“ заклучи тој.