Забава
Грешки во готвењето може да ја направат вашата храна токсична, предупредуваат експертите

Кога станува збор за готвењето, некои луѓе се гордеат со тоа дека се врвни готвачи, други горат сè што ќе допрат, а преостанатите се некаде помеѓу. Без разлика во која група припаѓате, постојат грешки во приготвувањето, кои всушност може да ја направат храната помалку здрава за јадење.
Светската здравствена организација (СЗО) наведува дека храната што содржи штетни бактерии, вируси, паразити или контаминанти може да предизвика над 200 болести.
Еве што советуваат здравствените експерти за да се заштитите од инфекција.
Една од најчестите причини за труење е салмонелата, која заразува над 91.000 луѓе годишно во Европа. Постојат и други предизвикувачи, како што се Campylobacter, Escherichia coli, Clostridium perfringens и Listeria monocytogenes.
Што, всушност, се случува? Бактериите што ги внесуваме преку храната се лепат на цревниот ѕид, каде што бргу се размножуваат или произведуваат токсини во храната, кои може да предизвикаат труење по ингестијата. Ова доведува до разни дигестивни проблеми, од гадење и повраќање до дијареја и стомачни грчеви. Понекогаш симптомите може да бидат потешки и може да предизвикаат трајни последици врз здравјето.
Со цел да се намали појавата на овие болести, во Европската Унија функционира систем за безбедност на храна, кој е еден од најбезбедните во светот и на кој работат многубројни експерти од цела Европа.
Бактериите салмонела најчесто се наоѓаат во јајцата, непастеризираните млечни производи и суровото месо. Затоа овие производи треба да се подготвуваат на температури над 70°C за да се отстранат опасните микроорганизми преку термичка обработка. Експертите предупредуваат дека на ова мора да обрнеме особено внимание ако готвиме за трудници, деца или постари лица бидејќи овие групи се почувствителни поради нивниот послаб имунитет.
Научниците исто така истакнуваат колку е важно правилно да се чува храната, во согласност со упатствата на пакувањата. Температурата во фрижидерот треба да се одржува под 5°C бидејќи повисоките температури го зголемуваат ризикот од развој на бактерии.
А што се однесува до маслиновото масло, експертите велат дека треба да се чува во темни шишиња, затворени и подалеку од топлина, а објаснуваат и зошто: „Маслиновото масло има многу хлорофил, кој е чувствителен на светлина. Ако го ставите хлорофилот на светло, тој ќе се претвори во други состојки, кои не ги сакате во вашето маслиново масло, а ќе се уништат и антиоксидансите што ги содржи“.
Поради напорниот распоред, често го бараме најбрзиот начин за одмрзнување на храната, па затоа ја одмрзнуваме на собна температура, а понекогаш и во топла вода. Но, научниците, користејќи го примерот на замрзнатите ракчиња, истакнуваат дека најдобар начин е да ги одмрзнете во фрижидер неколку часа пред да ги готвите. „Полека ќе се одмрзнува, што ќе го намали ризикот од добивање некои болести што се пренесуваат преку храната“, советуваат експертите за безбедност на храна.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Забава
Адвокатот на принцот Хари се повика на нови докази

Приватните истражители дадоа нови и уверливи докази за нелегални активности на весниците „Дејли мејл“ и „Мејл он сандеј“, изјави во судот адвокатот на војводата од Сасекс.
Случајот за повреда на правото на приватност се фокусира на наводите за широко распространети незаконски дејства што ги нарачале новинари во 90-тите и во 2000-тите.
„Асошиетед њузпејперс“, издавачот на двата весника, ги негира наводите и вели дека седумте тужители – меѓу кои се принцот Хари, сер Елтон Џон и бароницата Дорин Лоренс – чекале предолго за да тужат.
Нивниот адвокат го отфрли аргументот.
Тужби за нарушување на приватноста би требало да бидат поднесени во рок од шест години, но адвокатот Дејвид Ширборн рече дека неговите клиенти не биле во можност да ги докажат своите наводи додека приватните истражители не ги откријат нивните активности, што ја поттикнало сегашната правна постапка.
Давајќи еден пример, тој рече дека актерката Лиз Харли не знаела дека нејзиниот телефон бил прислушуван сè додека приватен истражител не дал изјава како сведок во која детаљно опишал што се случило во 2021 година.
Издавачот се обидува да го отфрли случајот тврдејќи дека на тужителите им истекло времето.
Принцот Хари повторно беше во судот во четвртокот за завршни поднесоци во правната битка за тоа дали наводите за прислушување телефони, хакирање и фалсификување лични податоци ќе резултираат со судски процес.
Меѓу неговите колеги тужители се и сер Елтон Џон и неговиот сопруг Дејвид Фурниш, актерот Сејди Фрост, и поранешниот пратеник на либералдемократите, сер Сајмон Хјуз.
Откако заврши четиридневното прелиминарно сослушување, судијата Џастис Никлин рече дека ќе ја донесе својата пресуда што е можно побргу.
Принцот Хари неделава беше во Лондон за да сведочи во судската постапка што тој ја поведе против издавачот на двата весника.
На четвртиот ден од прелиминарното сослушување во лондонскиот Кралски суд на правдата адвокатскиот тим на „Асошиетед њузпејперс“ повторно го повика судијата да го отфрли случајот. Тужениот демантира какво било ангажирање приватни истражувачи за поставување уреди за прислушување во автомобили и пристап и снимање приватни телефонски разговори.
Забава
Пит Дејвидсон жали што е попознат по љубовните врски отколку по својата кариера

Пит Дејвидсон се отвори за својот љубовен живот во текот на детаљното интервју за Real Ones во поткастот на Џон Бернтал објавен во четвртокот.
29-годишниот комичар во интервјуто што се одржа во дворот со Џон (46) говореше за интересот на јавноста за неговиот личен живот и за врските од висок профил.
„Мислам дека се случи да станам попознат пред работата. Јас секогаш работев. Јас сум во моите доцни 20-ти и нормално е да излегувам со разни девојки и поради некоја причина тоа е многу лудо и интересно за луѓето“, рече Пит во интервјуто.
„И сето ова не е толку интересно. Речиси половина живот сум во шоу-бизнисот, околу 14-15 години и на национална телевизија. Во период од 12 години излегував со 10 девојки, не мислам дека тоа е толку лудо“, рече Пит. „Но, на некои луѓе им изгледа многу интересно“.
„Овие личности сум ги запознал на работа. Работев во еден од петте холивудски епицентри, каде што запознаваш луѓе. Работев со нив и бев во нивна близина“, рече Пит.
Осум сезони, од 2014 до 2022 година, Пит беше член на актерската екипа во маратонското хумористично шоу „Сатрдеј најт лајф“, кое се емитува на Ен-би-си секоја сабота.
Ким Кардашјан и Пит почнаа врска во октомври 2021 година откако реалната ѕвезда се појави во ТВ-шоуто и споделија бакнеж на екранот.
Аријана Гранде беше водител гостин во неговата емисија во март 2016 година, а почнаа да се забавуваат во мај. Аријана му беше и свршеница.
Пит исто така се забавувал со комичарката Карли Аквилино, Кези Дејвид – ќерка на Лери Дејвид, актерката Кејт Бекинсејл, Маргарет Квали, Каја Гербер, Фиби Диневор и Емили Ратајковски. Најновата романса е со Чејс Суи Вондерс.
Забава
Лана дел Реј се сврши со музички менаџер

Лана дел Реј наводно е свршена со Еван Виникер.
Пејачката на хитот Video Games (37) поттикна шпекулации за свршувачка со музичкиот менаџер и музичар (40) кога беше видена како носи голем дијамантски прстен на настанот „Жените во музиката“ во организација на „Билборд“ (Billboard Women in Music).
„Билборд“ сега објави дека се свршени велејќи дека изворите им рекле: „Честитки пристигнуваат за Лана и Еван“.
Порталот открива: „Иако парот успешно ја чуваше својата врска во тајност, тие беа забележани во јавност неколкупати во текот на изминативе месеци, вклучително и на фестивалот ‘Малибу чили кукоф’, а во ресторанот „Папи енд Хариет“, Калифорнија, претходно овој месец се фотографираа со фановите“.
Додека Лана – чие вистинско име е Елизабет Грант – го издаде својот деветти студиски албум, Did You Know There’s a Tunnel Under Ocean Blvd, на 24 март, Еван, кој свиреше во бендовите „Стил трејн“ и „Фан“, беше зафатен барајќи вокал изведувач.