Индискиот бизнисмен Шанкар Курхаде рече дека платил околу 3.550 евра за златна маска направена по мерка којашто треба да го заштити од коронавирусот. Потребни биле осум дена да се направи маска над која е ставено 60 грама злато, рече Курхаде, кој живее на западниот дел на Индија.

„Тоа е тенка маска со мали пори за да можам да дишам“, рече тој за АФП, но призна дека сè уште не е сигурен дека таквата маска може да го заштити од вирусот, поради што презел и други заштитни мерки.

Шанкар Курхаде има 49 години, а кога излегува, сака да стави накит тежок околу еден килограм. Околу вратот носи златен ланец, носи нараквици и прстен на секој прст на десната рака.

Индиецот, кој поседува фабрика за градење на хангари, рече дека дошол до идеја да направи златна маска откако гледал извештај за човек кој за себе направил сребрена маска.

„Луѓето сакаат да се сликаат со мене затоа што се импресионирани кога ја гледаат златната маска којашто ја носам на пазарот“, додаде тој.

Во Индија задолжително е да се носи заштитна маска на јавни места во борбата против коронавирусот. Во таа земја, вирусот зарази 650.000 луѓе, од кои починале повеќе од 18.600.

Тамара Еклстон (37) е пресреќна поради приновата во нивното семејство. Нејзиниот татко Берни Еклстон (89) и сопругата Фабијана Флоси (44) станаа родители на момчето Ас.

„Не можеме да бидеме посреќни, ова се посебни моменти. Убаво е да се има брат откако цело време бевме семејство на девојчиња“,  коментираше Тамара за „Дејли мејл“.

Берни и Фабијана во април објавија дека очекуваат бебе. Малиот Ас е 65 години помлад од првата ќерка на Берни, Дебора, која ја доби со својата прва сопруга Ајви Бамфорд.

„Беше лесно. Породувањето траеше 25 минути. Фала му на Бога“, рече Фабијана за германските медиуми. Берни додаде дека е горд.

Покрај Тамара и Дебора, Берни е татко и на ќерката Петра (31). Тамара и Петра ги доби во брак со хрватската манекенка Славица Радиќ (62).

Берни се запозна со Фабијана пред многу години, но на почетокот биле пријатели и имале професионална врска. Тие се венчаа во 2012 година.

Посетителите на плажа во Јужна Каролина присуствувале на речиси неверојатен настан – тие виделе орел што грабнал ајкула од океанот, а потоа без никаков проблем летнал со неа.

Видеото, кое се шири на социјалните мрежи, прикажува орел што се спушта на површината на океанот, ја зграпчува ајкулата со канџи и потоа лета преку плажата.

Жената која ја снимила сцената изјави дека ајкулата била голема околу два метра и дека орелот летал со неа без никаков проблем, како да е мала, златна рипка.

Капачите на популарната плажа во Јужна Каролина биле со часови во шок, пренесува порталот Б92.