Двојката е во врска од 2019 година, но нивното пријателство датира повеќе од една деценија.

Кијану Ривс сподели редок увид во својата врска со Александра Грант.

58-годишната акциона ѕвезда неодамна во интервју за магазинот „Пипл“ се потсети на последниот момент на блаженство, како што рече, со 49-годишната уметница. „Пред неколку дена со мојата душичка“, рече Ривс за својата партнерка, со која е во врска четири години. „Бевме во кревет. Бевме поврзани. Се смеевме, смеевме и се кикотевме. Се чувствувам одлично. Беше навистина убаво да сме заедно“, рече тој.

Слаткиот миг понуди увид во и онака многу приватната врска на Ривс и Грант. Двојката излезе во јавноста со својата романса кога прошетаа на црвениот тепих фатени за рака на гала-свеченоста „ЛАКМА уметност и филм“ (LACMA Art + Film) во ноември 2019 година.

Од тогаш беа видени заедно во Берлин, потоа на пазарување во Њујорк, а присуствуваа и на премиера на мјузикл на Бродвеј.

Последен пат беа видени заедно во јавност во јуни 2022 година во Лос Анџелес додека присуствуваа на гала-настанот МОКА во Музејот на современата уметност.

Додека ѕвездата на „Матрикс“ и визуелната уметница ја официјализираа својата врска пред речиси четири години, нивното пријателство датира повеќе од една деценија.

Двајцата соработуваа на книгата „Ода на среќата“ од 2011 година и „Сенка“ од 2016 година, чиј автор е Ривс, а илустратор Грант.

Кога станува збор за непишаното правило дека жените треба да ја скратат косата по одредена возраст, време е да се исфрли застарената книга со правила, вели Кетлин Берд-Мареј.

„Татко ми – поморски офицер – велеше дека должината на косата на жената треба да биде пропорционална со ширината на нејзините колкови. Тој, за жал, одамна почина, но порано сакаше да ја бодри мајка ми (која ја обожаваше) со насмевка секогаш кога ќе видеше дека малку претерала со кратење на фризер. Во реалноста, тој ги сакаше фризурите на својата сопруга и трите ќерки, мешавина од кратки и долги, и се ужасеше ако некоја од нас земеше метро-лента за да види дали косата ни е пропорционална (со колковите)“.

А сепак правилата и понатаму опстојуваат, тврдоглаво, а вниманието што го доби долгата сребрена коса на Хелен Мирен во Берлин неодамна нè потсети дека старата премиса – дека жените на одредена возраст не треба да носат долга коса – нема место во нашиот современ народен јазик, а камоли во денешниот фризерски салон. Присутните беа воодушевени кога Мирен се сврте и одмавна со косата преплавена со самодоверба и доза ароганција.

Па, дали, конечно, тргнавме понатаму? „Мислам дека жените се многу повеќе во склад со своите потреби и желби отколку што некогаш биле“, вели Џоел Гонкалвес, уметнички директор на популарниот лондонски салон Nicola Clarke at John Frieda. „Дури и во споредба пред 20 години, помалку им пречи притисокот од врсниците и се многу посамоуверени да прават со косата она што ним им се допаѓа“.

Сепак, мора да знаете како да ја носите. Храброста што е потребна да се свртите и замавнете со косата на црвениот тепих целосно зависи од актерката, но долгата коса сама по себе е изјава. И можеби затоа расте нејзината популарност – намерна игра на зборови – барем според неофицијалното истражување што го спроведов кај „Џон Фрида“, каде што тие објавија пораст на оние над 50 што сакаат да експериментираат со својата коса, која во повеќето случаи е долга.

„Долгата коса по одредена возраст ви дава присутност наместо невидливост. Станува особина исто толку карактеристична како оние други маркери на кои се потпираме со цел да спречиме, свесно или на друг начин, да бидеме игнорирани“, објаснува британски „Вог“.

Криминалците секогаш гледаат да ја избегнат раката на правдата, а често се случува нивното бегство и криење да станат вирален хит на социјалните мрежи благодарение на нивната бизарност или генијалност. Токму затоа еден човек од Британија стана вистински светски хит и тоа поради начинот на кој се обиде да се скрие од полицијата.

Етмонд Лика (32), по потекло од Албанија, е уапсен во пошироката област на Ливерпул, во областа Киркдејл, откога се обидел да побегне од полициска патрола. Но, пред овој настан тој за влакно избегнал апсење качувајќи се на покривот од куќата во која го барале. Во таа пригода се скри над светларникот лежејќи на покривот.

Во еден момент до прозорецот дошол полицаец и ја свртел главата лево-десно обидувајќи се да види дали Лика е можеби таму. Она што не го знаеше е фактот дека тој беше буквално над него, со грбот до покривот.

Токму во тој момент додека Лика лежеше на покривот, а полицаецот гледаше, се создаде речиси нереална слика, која стана глобален хит набргу откако полицијата ја објави.

Лика на крајот беше уапсен и осуден на две години и четири месеци под обвинение дека се занимавал со одгледување, производство и продажба на марихуана. На суд призна сè за што беше обвинет.