Американската телевизиска мрежа „Ен-би-си“ во понеделникот (10 мај) се откажа од емитување на церемонијата на доделување „Златни глобуси“ во 2022 година по холивудските реакции за етиката и недостатокот на диверзитет на здружението што ги доделува годишните награди за филм и телевизија.

Членовите на Здружението на странски новинари во Холивуд (ХФПА) исто така се обвинувани за давање сексистички и расистички коментари, и барање услуги од познати личности и студија.

Том Круз се придружи на бунтот на стриминг-платформите и филските студија, враќајќи ги трите статуетки „Златен глобус“ што ги освои за своите улоги во „Џери Мегваер“, „Магнолија“ и „Роден на четврти јули“, објавија „Вараети“ и „Дедлајн-холивуд“.

Одлуката на „Ен-би-си“ уследи дури и откако ХФПА се согласи да регрутира повеќе членови афроамериканци и да направи други промени во своите редови во следните 18 месеци.

„Ен-би-си“ првично го поздрави планот, но подоцна соопшти дека ќе почека да види дали реформите функционираат.

„За промени од ваква големина е потребно време и многу работа. Ние сметаме дека на HFPA ѝ треба време да го стори тоа правилно. Поради тоа, Ен-би-си нема да ги емитува Златните глобуси во 2022 година”, се наведува во соопштението на телевизиската мрежа.

„Под претпоставка дека организацијата ќе го спроведе својот план, се надеваме дека ќе бидеме во позиција да го емитуваме шоуто во јануари 2023 година“, додаде Ен-би-си.

Принцот Мајкл од Кент, 78-годишниот прв братучед на кралицата Елизабета Втора е нов предмет на истрага на „Сандеј тајмс“ и „Ченал 4“. Тој е под сомневање дека неговиот кралски статус го користел за лична корист за да обезбеди пристап до тимот на рускиот претседател Владимир Путин.

Истражувачки репортери на весникот се претставиле како јужнокорејски инвеститори во злато и менаџмент консултанти од фиктивна компанија House of Haedong која бара контакти во Кремељ за да го прошири бизнисот во Русија.

Во текот на тајно снимена средба преку „Зум“, братучедот на кралицата им рекол на прикриените новинари односно „потенцијални инвеститори“ дека може да ја искористи својата улога како неофицијален амбасадор на нејзиното височество во Русија за да добие пристап до носителите на одлуки во Кремељ. Тој навел сума од 10.000 фунти на ден како хонорар за неговиот ангажман на „доверливи“ презентации во Кремељ.

Во снимениот разговор, тој им побарал и 200, 000 долари доколку сакаат фиктивната компанија да добие негово кралско одобрување. На крајот на разговорот, тој изјавил дека е среќен што го користи својот дом во палатата Кенсингтон како позадина.

По приказната на „Холивуд репортер“ кога актерот Реј Фишер го обвини режисерот Џос Ведон за расистичко и насилно однесување во текот на снимањето на „Лига на правдата“, сега на површина испливаа нови обвинувања за наводно вознемирување и закани врз актерката Гал Гадот.

Гал тврди дека нејзината кариера била загрозена од режисерот Џос Ведон.

Суперхероината или жена чудо во Wonder Woman работеше со режисерот во 2017 година на „Лига на правдата“. Таа откри дека Ведон ѝ се заканил ќе ѝ наштети на кариерата ако преземе нешто во врска со нејзините тврдења за недолично однесување.

Во интервју за израелскиот портал N12, таа објасни за нејзините интеракции со режисерот и откри што точно ѝ рекол: „Молчи или ќе ти ја уништам кариерата.“

Таа потвдри дека со неа разговарале луѓе кои спровеле темелна истрага.

WarnerMedia претходно соопштија дека завршиле со истрагата и дека се преземени мерки за подобрување на состојбата. Сепак, компанијата одби да образложи какво дејствие е преземено.

Обвинувањата на сметка на Ведон започнаа минатата годинам кога актерот Реј Фишер – кој го глуми Киборг во „Лига на правдата“ – го обвини Ведон за грубо, непрофесионално и целосно неприфатливо однесување.