Забава
(Видео) Првиот човек кој го прелета светот со жирокоптер

Британскиот авантурист Џејмс Кечел (37) е првиот човек кој го обиколил светот со жирокоптер, летало кое претставува еден вид комбинација од хеликоптер и авион.
Тој со ова мало летало, чија кабина е целосно отворена, прелетал 24.000 наутички милји.
Кечел од Велика Британија полетал во март, ги преминал Европа, Русија и пристигнал во САД преку Канада.
View this post on Instagram
Месецов се вратил во Британија од каде го почнал ова необично патешествие.
Жирокоптер е вид летало кое лебди со помош на ротирачко крило – ротор.
Роторот не е постојано директно поврзан со моторот на леталото, а на земја придвижувањето на роторот се иницира со „предротација“ каде погонот се добива од моторот, кој преку редуктор е поврзан за потисна елиса што на леталото му овозможува да постигне доволна брзина.
Оваа брзина е клучна за постигнување на доволен број вртежи на роторот, а во текот на летот од струењето на воздухот доаѓа до појава на авторотација.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Забава
Ози Озборн се враќа дома за последно збогум, погребна поворка низ Бирмингем

Обожавателите утре ќе имаат можност да му оддадат последна почит на легендата на хеви-метал музиката, Ози Озборн, кога поворката ќе патува низ неговиот роден град Бирмингем. Телото на пејачот на „Блек сабат“ ќе биде вратено за поворка што ќе се движи по Брод стрит во центарот на градот од 13 часот в среда“, објави Би-би-си.
Погребното возило ќе ги мине мостот „Блек сабат“ и клупата на која илјадници обожаватели оставија пораки и положија цвеќе. Градоначалникот на Бирмингем, Зафар Икбал, рече: „Ќе оддадеме последна почит на една од најголемите живи легенди на Бирмингем“.

Клупата на мостот „Блек сабат“, која обожавателите од целиот свет ја затрупаа со цвеќе и пораки
Озборн почина на 76-годишна возраст на 22 јули.
Неговата смрт е на помалку од три недели по учеството, заедно со своите колеги од бендот, на прошталната свирка на „Блек сабат“, „Назад кон почетокот“. Десетици музичари, вклучувајќи членови на „Металика“ и на „Аеросмит“, настапија на концертот во Вила „Парк“.
Погребната поворка, која е планирана пред приватниот погреб на Озборн, ќе му овозможи на неговото семејство да ги види многуте спомени што ги оставиле неговите лојални обожаватели оддавајќи му почот.
Локалните музичари од „Бостин брас“ ќе ја придружуваат поворката. Опишувајќи го како син на Бирмингем, Икбал рече: „Тој го стави Бирмингем на мапата. Тој го стави Астон на мапата“.
Луѓе од далечни места, како Мексико, САД и Полска, оттогаш патуваат во градот за да додадат на морето цвеќиња и пораки на мостот „Блек сабат“.
„Брод стрит“ ќе биде затворен за сообраќај од 7 часот в среда, а трамваите и автобусите ќе бидат пренасочени во текот на денот и ќе бидат повторно отворени што е можно побргу по настанот, изјави портпаролот на градскиот совет.
Забава
Животни навики што го зголемуваат ризикот од деменција

Стареењето носи со себе многубројни стравови, но еден особено се издвојува – губење на меморијата.
Можноста да ги заборавиме сопствената адреса, лицата на најблиските или како да ги извршуваме наједноставните задачи влева страв во коските кај многу луѓе. Тој страв дури има и име: деменција.
Деменцијата е општ термин за состојби што предизвикуваат сериозен когнитивен пад до тој степен што влијаат на секојдневниот живот. Иако некои луѓе се генетски посклони, експертите истакнуваат дека одредени животни навики исто така може значително да го зголемат ризикот.
Важно е да се напомене дека менувањето на овие навики не е гаранција против деменција, но носи многубројни други придобивки за целокупното здравје.
Игнорирање на влијанието на храната врз мозокот
Старата поговорка – она што е добро за срцето е добро и за мозокот – сè уште важи. Експертите нагласуваат дека исхраната игра клучна улога во зачувувањето на когнитивните функции. Тие препорачуваат медитеранска исхрана, богата со здрави масти, посно месо, интегрални житни зрна, овошје и зеленчук. Таканаречената диета УМОТ, која нагласува бобинки, лисстест зелен зеленчук, риба и маслиново масло, е храна за која е докажано дека е добра за здравјето на мозокот.
Игнорирање на постојните здравствени проблеми
Хроничните болести, како дијабетес, висок крвен притисок и висок холестерол, се познати фактори на ризик за деменција. Редовното и сериозно лекување на овие состојби, особено оние од васкуларна природа, е клучно за намалување на ризикот. Ова ја штити вашата циркулација и осигурува дека вашиот мозок добива доволно крв и кислород,- што е клучно за спречување на васкуларната деменција, една од најчестите форми на болеста.
Недостиг на квалитетен сон
Мозокот се поправа за време на длабокиот сон. Потоа се чисти од бета-амилоид, токсичен протеин кој придонесува за Алцхајмеровата болест. Затоа е важно да се добие доволно квалитетен, реставративен сон. Апнејата при спиење, која често не се препознава кај постарите возрасни лица, може драстично да го намали квалитетот на вашиот одмор. Лековите за спиење може да ги нарушат и природните циклуси на спиење на вашето тело, што значи дека вашето тело не го добива потребниот одмор за консолидирање на спомените.
Занемарување на пријателите и на семејството
Социјалната поврзаност е исклучително важна за менталното здравје. Осаменоста, изолацијата и депресијата негативно влијаат не само на когнитивната функција туку и на стапките на смртност. Некои експерти предупредуваат дека осаменоста кај постарите лица е речиси исто толку опасна како и умереното пушење. Одржувањето социјални контакти, без разлика дали преку разговор, слушање или заеднички активности, го одржува умот активен и ангажиран.
Прекумерно пиење алкохол
Постојат сè повеќе докази дека алкохолот е штетен за здравјето – од оштетување на црниот дроб до зголемен ризик од рак, а особено е штетен за мозокот. Како што старееме, нашиот црн дроб потешко го обработува алкохолот, а тоа е директен токсин, кој, меѓу другото, може сериозно да го наруши сонот. Експертите советуваат дека ако сте загрижени за вашата меморија, намалувањето на алкохолот треба да биде еден од првите чекори.
Избегнување физичка активност
Активниот начин на живеење е клучен за здравјето на мозокот. Ова не значи само одење во сала за вежбање, туку и секојдневни активности, како што е одење наместо возење. Препораката за постари лица е 30 минути аеробни вежби пет дена во неделата. Вежбањето го подобрува кардиоваскуларното здравје, што директно влијае на здравјето на мозокот. Важно е да се почне со вежбање на време долго пред да се појават какви било когнитивни промени.
Заштита од повреди на главата
Повредите на главата се поврзани со поголем ризик од деменција. Иако можеби немаат големо влијание врз нивото на популацијата, кај лицата што доживуваат тешка повреда на главата ризикот може значително да се зголеми. Затоа експертите даваат едноставен, но важен совет: ако возите велосипед, секогаш носете кацига. Тоа е мала претпазливост што може да има големо влијание.
Игнорирање на симптомите на депресија
Депресијата, дури и во својата најблага форма, може да ги наруши сите навики што се клучни за когнитивното здравје – од дружење и физичка активност до правилна исхрана и грижа за себе. Затоа лекувањето на депресијата е исклучително важно и може да биде еден од начините за подобрување на когнитивното стареење и намалување на ризикот од деменција.
Деменцијата не е ничија вина
Иако бројот на луѓе со деменција се зголемува, ова делумно е затоа што луѓето живеат подолго. Добрата вест е дека ризикот од развој на болеста, всушност, малку се намалил на одредени возрасти, веројатно благодарение на подобрата грижа за кардиоваскуларното здравје. Денес постојат и лекови што може да го забават напредувањето на Алцхајмеровата болест, најчестата форма на деменција.
Сепак, важно е да се нагласи дека некои луѓе ќе развијат деменција поради генетика или други фактори на кои не може да влијаат. Не е фер да се очекува таквите луѓе да живееле погрешно. Промената на животните навики значи да се направи сè што е во наша моќ за да се намали ризикот, но без да се чувствуваме виновни ако болеста се појави.
Забава
Емили Ратајковски и официјално се разведе од 10 години постариот актер

По речиси три години од почетокот на разводот, манекенката Емили Ратајковски (34) и актерот Себастијан Бер-Меклард (44) сега се официјално разведени, открива „Дејли мејл“.
Според судските документи, одлуката за развод е донесена на 22 јули во Врховниот суд на Њујорк, со што Емили и Себастијан се законски разведени. Истиот ден е поднесена наредба во врска со здравственото осигурување на нивниот син, но бидејќи евиденцијата за развод во таа држава е затворена за јавноста, деталите се непознати.
Разводот бил финализиран кон крајот на минатата година кога адвокатот на познатиот модел ги поднел сите потребни документи – вклучувајќи предлог-пресуда и договор за старателство. Сепак, судот потоа ја вратил пресудата на ревизија.
Емили поднесе барање за развод во септември 2022 година, четири години по венчавката. Тие се разделија неколку месеци претходно, во јули, а разделбата наводно била предизвикана од неверството на Себастијан.
Двојката има син, Силвестер Аполо Бер, кој е роден во март 2021 година. Момчето живее со Емили, но го гледа својот татко неколкупати неделно.
Во интервју за поткастот Going Mental, Емили призна дека долго време се двоумела дали да го прекине бракот.
„Долго време немав храброст да си заминам. Бев многу несреќна“, искрено рече таа. „И физички го чувствував стресот – имав 45 килограми веднаш по породувањето. Не се чувствував добро“.
Таа исто така зборуваше за тоа како се обидела да најде помош – пиела антидепресиви, но чувствувала дека проблемот не е во неа. „На крајот, научив дека треба да ги слушам сопствените инстинкти“, додаде таа.
Во интервју за „Вог Австралија“ минатиот ноември Ратајковски откри дека размислува да напише книга за разводот надевајќи се дека ќе ги сруши општествените стереотипи.
„Неверојатно е што нема повеќе книги за неуспешните први бракови. Се пишува многу за разводите кога децата се возрасни, но речиси ништо за жените што се разведуваат во своите 30-ти години“, рече таа.
Таа додаде дека сè повеќе жени избираат да се разведат денес затоа што повеќе не се економски зависни од своите партнери.
„Светот се промени. Многу жени заработуваат исто толку или повеќе од своите партнери, а истовремено го преземаат поголемиот дел од емоционалната и од физичката работа дома“.
За разлика од Емили, Себастијан целосно се повлече од јавноста, особено откога две тинејџерки изнесоа сериозни обвинувања – тие тврдат дека тој ги злоупотребувал и сексуално ги експлоатирал преку „Инстаграм“.
Емили, од друга страна, ужива во новата фаза од својот живот. По разводот, таа беше поврзувана со низа познати мажи – од комичарот Ерик Андре, преку пејачот Хари Стајлс, со кого беше видена како се бакнува на улиците на Токио во март 2023 година, до диџејот Орази Рисп, францускиот актер Стефан Бак и музичарот Шабузи.