Забава
Гласањето е почнато, а кој всушност стои зад манифестацијата „Сајт на годината“?

Гласањето е веќе во тек на www.sajtnagodinata.mk и ќе трае до 4 март, а прогласувањето на победниците во сите категории е на 6 март.
Изборот „Сајт на годината 2021“ се одвива во текот на февруари 2022 година. До пред неколку дена беше активно номинирањето интернет-страници, а сега се гласа за најдобра интернет-страница во дваесетина категории.
Во исчекување на годинешното прогласување на победниците направивме интервју со организаторот на манифестацијата, дигиталната маркетинг-агенција „Медија солутионс“, поточно со Љупчо Ангелов, менаџер на социјални медиуми во „Медија солутионс“.
Кој стои зад изборот Сајт на годината?
Организатор на изборот на Сајт на годината веќе 12 години е дигиталната маркетинг агенција Медиа Солутионс, а зад изборот стојат стотици сајтови кои го збогатиле интернет просторот во Македонија, и илјадници интернет посетители, консументи на содржини и нивни креатори од многу различни аспекти, кои придонеле кон квалитетот на сајтовите и кои гласале низ годините да ги изберат најдобрите.
Која беше идејата за правење на една ваква манифестација и дали сајтовите се стимулирани да учествуваат во изборот? Престиж ли е да се добие титулата Сајт на Годината?
Идејата за организирање на ваква манифестација произлезе од основачите на Медиа Солутионс. Бидејќи Медиа Солутионс е дигитална агенција, таа може да функционира во полн капацитет само во услови на добро развиен интернет простор во Македонија, и добро развиен интернет маркетинг. Целта на оваа манифестација беше преку наградување на најдобрите позитивно да се влијае врз развојот на македонскиот дел од интернетот, и да се подигне на повисоко ниво.
Кои се критериумите за избор и кој се може да учествува? Како оди целиот избор?
Секоја веб страна е уникатна во изгледот, но тоа не е пресудниот елемент. Веб страната треба да е брза и оптимизирана. Навигацијата низ неа треба да биде интуитивна и лесна. Оригиналноста игра огромна улога како и користењето на нови технологии за нејзината изработка. Содржината треба да е корисна и писмена. Што повеќе од овие елементи се опфатени толку страната подобро котира.
Дали се бројат само гласовите од публиката или имате жири комисија?
Даваме ексклузивното право на публиката и посетителите. Сепак тие се оние кои го гледаат и користат финалниот изглед на веб страните. Од секогаш корисниците се најдобриот репер за тоа како е дизајниран продуктот, на изглед, но и во однос на неговата функционалност, заштита, оптимизација и безбедност.
Знаете ли колку нови сајтови никнуваат на годишно ниво во Македонија, и може ли да направите споредба како беше пред 12 години и сега?
Бројот на сајтови кои се креираат на дневно или месечно ниво е голем. Со оглед на тоа што претходните две години поради пандемијата скоро сите компании на некаков начин ги префрлија своите бизниси на интернет, бројот на сајтови е драстично зголемен. Зголемен е и затоа што многу поединци кои претходно не се осмелуваа да започнат свој бизнис или проект сега се осмелија да го направат тоа. Сѐ подостапните CMS системи за изработка на страни придонесоа дури и со многу малку искуство и знаење да се направи солидна веб страна. Заклучокот е дека бројот на веб страни рапидно расте, но прашањето е колку од тие страни се изработени професионално и според висок стандард.
Која е најголемата промена на интернет пазарот во Македонија која можете да ја издвоите?
Како што кажав, префрлањето на бизнисот онлајн е важен акцент во последнава година. Новото пандемско секојдневие наметна нови начини на функционирање и го забрза процесот на дигитализација, а со сето тоа се подигна свесноста за онлајн тргување и направи сериозна промена во однесувањето на интернет корисниците, чијшто број во меѓувреме истотака многу се зголеми. Тоа што до пред некоја година беше незамисливо да се купи или бара на интернет, сега е ставено како прв избор. Со самото тоа што децата почнаа онлајн настава се наметна потреба од дигитално описменување од многу рана возраст и тоа не само со игри туку и информатички содржини и едукација.
Секоја година имате нови категории, кои се новите категории оваа година и зошто се одлучивте за нив?
Оваа година воведовме 4 нови категории. Тоа се: Најпопуларна е-атлета – еСпортот како една од најпопуларните нови професии во светот доведе и во Македонија да се појават професионални играчи од светски ранг, Најпопуларен Јутјубер – најактивните креатори на содржини во моментот имаат прегледи повеќе од било кој друг традиционален медиум, Најпопуларен онлајн/хибриден настан – минатите две години се одржаа повеќе настани кои според обемот и големината надминаа настани во живо и Најдобра автоматизирана алатка/чет бот – најновиот тренд на комуникација со клиенти преку чет ботови кои се доведуваат до таква совршеност што корисниците немаат претстава дека разговараат со алгоритам.
Да се навратиме на претходните години, која манифестација ја паметите како нешто посебно, и дали има некои победници кои можете да ги издвоите ( нешто специфично за нив и сл.)
Победник на првиот Сајт на годината во 2010 беше kajgana.com, сајт кој опстојува и се подобрува низ годините. Минатата година, која беше по сите основи нестандардна, година на тешка пандемија, победи сајт кој не е сајт туку Фејсбук група – Ковид19 искуства и совети, која одигра незаменлива улога во првата година од пандемијата, преку здружување, вмрежување и меѓусебна помош на нејзините членови и одреден број на лекари.
Како го гарантирате фер натпреварувањето на оваа манифестација?
Секој корисник мора да гласа со уникатна мејл адреса. Секако дека големината на медиумот има огромна улога во тоа колку корисници ќе гласаат, и лобирањето на сајтовите кај своите читатели да гласаат игра голема улога при освојувањето на местата, вклучително и на најпрестижната награда Сајт на годината 2021.
Какви се плановите за во иднина? Може ли та манифестација да прерасне во престижен настан како Оскари на пример?
Манифестацијата е еден вид оскари за веб сајтови. „Гламурот“, ако може така да се нарече, кој успеавме да го постигнеме пред пандемијата беше на завидно ниво и за многу попопуларни манифестации. Низ текот на годините имавме видни личности кои беа дел од доделувањето. Луѓе како тогашните Претседатели на државата, министри, заменици министри, Претседателот на ИАБ Европа ја поддржаа и препознаа оваа манифестацијата како сериозен акцелератор за подигнување на квалитетот на веб страните и веб културата во Македонија.
И на крајот сакам да ги повикам интернет посетителите од Македонија, кои се денес практично сите граѓани на државата, да го дадат својот глас за своите омилени сајтови и преку тоа да придонесат кон подобар, поубав, поквалитетен, понепристрасен, поедукативен и позабавен интернет во Македонија.
Гласањето е веќе во тек на www.sajtnagodinata.mk и ќе трае до 4-ти март, а прогласувањето на победниците во сите категории е на 6 март.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Забава
Откриена причината за смртта на Халк Хоган

Page Six ексклузивно ја откри официјалната причина за смртта на Халк Хоган.
Легендарниот професионален борач починал од акутен миокарден инфаркт, познат и како срцев удар. Документите, исто така, открија дека Хоган тајно се борел со леукемија, состојба која досега не била јавно позната.
Според Канцеларијата на медицинскиот испитувач на округот Пинелас, срцевиот удар бил предизвикан од ненадејно блокирање на протокот на крв во срцевиот мускул, што предизвикало оштетување на ткивото. Во документот, објавен од Page Six, исто така се наведува дека Хоган имал историја на атријална фибрилација (AFib), состојба која се карактеризира со неправилно и брзо отчукување на срцето.
Најголемото изненадување во извештајот на медицинскиот испитувач беше информацијата дека поранешната суперѕвезда на WWE, роден како Тери Болеа, страдал од хронична лимфоцитна леукемија (CLL) – вид на рак кој ги зафаќа белите крвни зрнца. Неговата смрт беше прогласена за природна смрт.
Халк Хоган доживеа срцев удар во својот дом во Клирвотер, Флорида, на 24 јули. Тој беше итно префрлен во болницата Мортон Плант, каде што беше прогласен за мртов. Почина на 72-годишна возраст.
Забава
Мухамед е најпопуларното име за момчиња во Англија, втора година по ред

Објавени се најпопуларните имиња за бебиња родени во Англија и Велс во 2024 година, при што Мухамед е најпопуларното машко име втора година по ред, додека Ноа и Оливер го зазедоа второто и третото место, исто како и во 2023 година.
Според Би-Би-Си, Оливија и Амелија ги зазедоа првите две места за девојчиња трета година по ред, додека Исла падна од третото место и беше заменета со Лили.
Листата ја објави Канцеларијата за национална статистика (ONS), која ја составува листата врз основа на податоци од матичните книги на родени.
Новите имиња што влегоа во првите 100 за девојчиња се Елоиз, Нора, Мила, Роза, Атена, Сара и Зои. Новите имиња за момчиња се Остин, Натан, Вини и Јахја.
Мухамед го задржа првото место како најпопуларно машко име, со 5.721 бебиња што го добија ова име. Ова име е најпопуларно во пет од деветте региони на Англија.
Други варијации на името, исто така, се најдоа на листата: Мохамед се најде на 21-во место со 1.760 момчиња, а Мохамад на 53-то место со 986.
Забава
Ќерката на Мајкл Џексон откри дека ја раскинала свршувачката со познатиот актер: „Ова се солзи на раскин“

Парис Џексон, 27-годишната ќерка на легендарниот крал на поп-музиката, Мајкл Џексон, и американскиот актер Џастин Лонг ја раскинале свршувачката по три години врска.
Веста ја сподели самата Парис на социјалната мрежа „Икс“, каде што напиша: „Ова се солзи на раскин. Повторно сите се провлекувате“.
Инаку, пејачката во декември преку „Инстаграм“ ја објави свршувачката со Лонг, но објавата подоцна беше избришана. Во јуни, во интервју за „Аксес Холивуд“, изјави дека подготовките за свадбата се во полн ек.
„Фустанот е во изработка, местото е избрано, а датумот го одреди астролог – затоа што сум од Лос Анџелес“, рече таа.
Да потсетиме, Парис пред неколку дена беше снимена како расплакана шета сама на улиците на Малибу.
Исто така, минатиот месец беше критикувана бидејќи настапила на концерт закажан токму на денот на годишнината од смртта на татко ѝ. Во обраќање на социјалните мрежи објасни дека таа нема влијание врз распоредот на турнејата бидејќи не е главна изведувачка.
„Тоа што настапувам на тој ден не значи дека сум заборавила. Никој не треба да ми кажува како да тагувам“, порача таа тогаш.