Забава
Гласањето е почнато, а кој всушност стои зад манифестацијата „Сајт на годината“?

Гласањето е веќе во тек на www.sajtnagodinata.mk и ќе трае до 4 март, а прогласувањето на победниците во сите категории е на 6 март.
Изборот „Сајт на годината 2021“ се одвива во текот на февруари 2022 година. До пред неколку дена беше активно номинирањето интернет-страници, а сега се гласа за најдобра интернет-страница во дваесетина категории.
Во исчекување на годинешното прогласување на победниците направивме интервју со организаторот на манифестацијата, дигиталната маркетинг-агенција „Медија солутионс“, поточно со Љупчо Ангелов, менаџер на социјални медиуми во „Медија солутионс“.
Кој стои зад изборот Сајт на годината?
Организатор на изборот на Сајт на годината веќе 12 години е дигиталната маркетинг агенција Медиа Солутионс, а зад изборот стојат стотици сајтови кои го збогатиле интернет просторот во Македонија, и илјадници интернет посетители, консументи на содржини и нивни креатори од многу различни аспекти, кои придонеле кон квалитетот на сајтовите и кои гласале низ годините да ги изберат најдобрите.
Која беше идејата за правење на една ваква манифестација и дали сајтовите се стимулирани да учествуваат во изборот? Престиж ли е да се добие титулата Сајт на Годината?
Идејата за организирање на ваква манифестација произлезе од основачите на Медиа Солутионс. Бидејќи Медиа Солутионс е дигитална агенција, таа може да функционира во полн капацитет само во услови на добро развиен интернет простор во Македонија, и добро развиен интернет маркетинг. Целта на оваа манифестација беше преку наградување на најдобрите позитивно да се влијае врз развојот на македонскиот дел од интернетот, и да се подигне на повисоко ниво.
Кои се критериумите за избор и кој се може да учествува? Како оди целиот избор?
Секоја веб страна е уникатна во изгледот, но тоа не е пресудниот елемент. Веб страната треба да е брза и оптимизирана. Навигацијата низ неа треба да биде интуитивна и лесна. Оригиналноста игра огромна улога како и користењето на нови технологии за нејзината изработка. Содржината треба да е корисна и писмена. Што повеќе од овие елементи се опфатени толку страната подобро котира.
Дали се бројат само гласовите од публиката или имате жири комисија?
Даваме ексклузивното право на публиката и посетителите. Сепак тие се оние кои го гледаат и користат финалниот изглед на веб страните. Од секогаш корисниците се најдобриот репер за тоа како е дизајниран продуктот, на изглед, но и во однос на неговата функционалност, заштита, оптимизација и безбедност.
Знаете ли колку нови сајтови никнуваат на годишно ниво во Македонија, и може ли да направите споредба како беше пред 12 години и сега?
Бројот на сајтови кои се креираат на дневно или месечно ниво е голем. Со оглед на тоа што претходните две години поради пандемијата скоро сите компании на некаков начин ги префрлија своите бизниси на интернет, бројот на сајтови е драстично зголемен. Зголемен е и затоа што многу поединци кои претходно не се осмелуваа да започнат свој бизнис или проект сега се осмелија да го направат тоа. Сѐ подостапните CMS системи за изработка на страни придонесоа дури и со многу малку искуство и знаење да се направи солидна веб страна. Заклучокот е дека бројот на веб страни рапидно расте, но прашањето е колку од тие страни се изработени професионално и според висок стандард.
Која е најголемата промена на интернет пазарот во Македонија која можете да ја издвоите?
Како што кажав, префрлањето на бизнисот онлајн е важен акцент во последнава година. Новото пандемско секојдневие наметна нови начини на функционирање и го забрза процесот на дигитализација, а со сето тоа се подигна свесноста за онлајн тргување и направи сериозна промена во однесувањето на интернет корисниците, чијшто број во меѓувреме истотака многу се зголеми. Тоа што до пред некоја година беше незамисливо да се купи или бара на интернет, сега е ставено како прв избор. Со самото тоа што децата почнаа онлајн настава се наметна потреба од дигитално описменување од многу рана возраст и тоа не само со игри туку и информатички содржини и едукација.
Секоја година имате нови категории, кои се новите категории оваа година и зошто се одлучивте за нив?
Оваа година воведовме 4 нови категории. Тоа се: Најпопуларна е-атлета – еСпортот како една од најпопуларните нови професии во светот доведе и во Македонија да се појават професионални играчи од светски ранг, Најпопуларен Јутјубер – најактивните креатори на содржини во моментот имаат прегледи повеќе од било кој друг традиционален медиум, Најпопуларен онлајн/хибриден настан – минатите две години се одржаа повеќе настани кои според обемот и големината надминаа настани во живо и Најдобра автоматизирана алатка/чет бот – најновиот тренд на комуникација со клиенти преку чет ботови кои се доведуваат до таква совршеност што корисниците немаат претстава дека разговараат со алгоритам.
Да се навратиме на претходните години, која манифестација ја паметите како нешто посебно, и дали има некои победници кои можете да ги издвоите ( нешто специфично за нив и сл.)
Победник на првиот Сајт на годината во 2010 беше kajgana.com, сајт кој опстојува и се подобрува низ годините. Минатата година, која беше по сите основи нестандардна, година на тешка пандемија, победи сајт кој не е сајт туку Фејсбук група – Ковид19 искуства и совети, која одигра незаменлива улога во првата година од пандемијата, преку здружување, вмрежување и меѓусебна помош на нејзините членови и одреден број на лекари.
Како го гарантирате фер натпреварувањето на оваа манифестација?
Секој корисник мора да гласа со уникатна мејл адреса. Секако дека големината на медиумот има огромна улога во тоа колку корисници ќе гласаат, и лобирањето на сајтовите кај своите читатели да гласаат игра голема улога при освојувањето на местата, вклучително и на најпрестижната награда Сајт на годината 2021.
Какви се плановите за во иднина? Може ли та манифестација да прерасне во престижен настан како Оскари на пример?
Манифестацијата е еден вид оскари за веб сајтови. „Гламурот“, ако може така да се нарече, кој успеавме да го постигнеме пред пандемијата беше на завидно ниво и за многу попопуларни манифестации. Низ текот на годините имавме видни личности кои беа дел од доделувањето. Луѓе како тогашните Претседатели на државата, министри, заменици министри, Претседателот на ИАБ Европа ја поддржаа и препознаа оваа манифестацијата како сериозен акцелератор за подигнување на квалитетот на веб страните и веб културата во Македонија.
И на крајот сакам да ги повикам интернет посетителите од Македонија, кои се денес практично сите граѓани на државата, да го дадат својот глас за своите омилени сајтови и преку тоа да придонесат кон подобар, поубав, поквалитетен, понепристрасен, поедукативен и позабавен интернет во Македонија.
Гласањето е веќе во тек на www.sajtnagodinata.mk и ќе трае до 4-ти март, а прогласувањето на победниците во сите категории е на 6 март.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Забава
Донатела Версаче изгледа подобро од кога било

Познатата италијанска дизајнерка Донатела Версаче ги изненади своите обожаватели со својата најнова објава на социјалните мрежи.
70-годишната дизајнерка со години ги поттикнува шпекулациите за својот изглед, иако јавно призна дека користи ботокс.
На фотографијата направена на зајдисонце Донатела позира во бел фустан со светки истакнувајќи ѝ ја нејзината вита фигура, но и свежиот тен. Многумина веднаш забележаа дека горната усна ѝ изгледа значително потенко, а образите помалку отечени во споредба со претходните фотографии.
За да ја објасни можната заднина на оваа промена, Анастасија Колес, основач на дерматолошка клиника во Лондон, го сподели своето експертско мислење со „Дејли мејл“.
View this post on Instagram
„Невозможно е да се каже што направила на лицето или не без да ја видите лично. Врз основа на фотографиите, нејзините усни изгледаат помали од порано, што може да се должи на голем број причини. Се чини дека во минатото имала трајни филери, веројатно силиконски, во комбинација со хијалуронски филери нанесени на нив. Ако хијалуронскиот филер се растворил или природно се разградил, тоа би можело да го објасни губењето на волуменот“, рече таа.
„Првичното зголемување на усните може да се должи и на силиконот во комбинација со ефектот на фејслифтинг, каде што кожата е многу цврсто повлечена кон страните на лицето. Нејзината вилица исто така изгледа дефинирано, што може да биде резултат на дермални филери за подобрување на структурата или третмани за затегнување на кожата“, додаде таа.
Донатела веќе привлече внимание минатата година на премиерата на мјузиклот „Ѓаволот носи Прада“. На настанот, на кој присуствуваа многу познати личности, Донатела, напишаа многумина, изгледаше подобро од кога било.
Забава
Сурови вистини за бракот за кои никој не зборува

Постојат многу работи што ќе се променат кога ќе одлучите да стапите во брак, па затоа би било добра идеја да бидете подготвени за нив однапред.
Советите за успешен брак честопати се сведуваат на познати мантри – комуницирајте отворено, не одете во кревет лути и одржувајте ја страста жива.
И додека овие совети се важни, паровите што се заедно со децении често споменуваат нешто друго – лекции што не се пријатни, но се клучни за трајна и длабока врска.
Подолу ви донесуваме три неочекувани, но искрени вистини за бракот, кои може да ви помогнат вашата врска да остане силна во добри и во лоши времиња.
1. Само искреноста не е доволна
„Бидете искрени!“, често е златното правило за добар брак. Но, искреноста, без сочувство, лесно може да се претвори во грубост со изговор.
Паровите што се заедно со години знаат дека поентата не е само во тоа што го кажувате, туку и како го кажувате. Вистината, изговорена без оглед на емоциите на другата личност, може да стане оружје, а не мост.
Студија од 2019 година покажа дека брачното задоволство не е само поврзано со позитивните емоции, туку и со тоа како ги доживуваме заедно.
Ова вклучува меѓусебна грижа, емоционално усогласување и невербални знаци, како тон на гласот, контакт со очите и говор на телото.
Дури и во конфликт, паровите што остануваат емоционално поврзани имаат поголема веројатност да имаат посреќни бракови.
Затоа искреноста во здравите врски доаѓа со доза грижа – не е важна само содржината, туку и начинот на кој ја искажувате.
Еве како изгледа нежната искреност во пракса:
Создадете чувство на сигурност, а не на инфериорност – наместо да кажете: „Секогаш сте неодговорни со парите!“, кажете: „Се грижам за нашата финансиска состојба. Можеме ли да направиме буџет заедно?“
Изберете го вистинскиот момент – ако вашиот партнер штотуку се вратил дома од работа исцрпен, почекајте уште малку со важни теми; сериозните разговори имаат поголема веројатност да успеат во моменти на мир и поврзаност, како прошетка или опуштено попладне.
Користете искреност за да се поврзете, а не критикувајте – не мора да кажете сè што ќе ви падне на ум; наместо „Секогаш си на телефон!“, обидете се со „Ми недостигаат нашите разговори. Можеме ли да јадеме без екран вечерва?“
Бруталната искреност може да ви ја смири совеста, но нежната искреност ја зајакнува вашата врска. И тоа е она што го држи бракот заедно.
2. Понекогаш ќе мора да се откажете од дел од себе
Во тешките периоди во животот многу парови сфаќаат дека за да преживеат, треба да променат одредени делови од себе – оние што повеќе не му служат на заедничкото ние.
Студија од 2018 година следела 169 пара во текот на првите 18 месеци од бракот и открила дека промените во личноста, како што се намалувањето на раздразливоста или зголемувањето на совесноста, може значително да го зголемат задоволството од бракот.
Не е толку важно кој сте биле на почетокот на врската, туку дали сте подготвени да растете заедно.
Еве што тоа значи во пракса:
Откажувањето од улогите што создаваат дистанца – да се биде осамен волк, перфекционист или оној што е секогаш во право – често е само форма на самоодржување; кога ќе ги пуштиме тие маски, отвораме простор за блискост.
Менување на навиките што ја попречуваат љубовта – за некои тоа значи откажување од чести состаноци и алкохол, за други тоа значи учење да се решаваат конфликти без обвинување; ова не се присилни промени, туку заеднички одлуки.
Избор на интимност пред егото – ова значи слушање дури и кога не ви се сака, извинување без „но“, барање помирување, дури и кога сè уште боли.
Паровите што преживуваат не се плашат од промените – тие ги прифаќаат. Бидејќи бракот не е само заедничко стареење, туку и заедничко растење.
3. Ќе се каете за некои стари верзии на вашата врска
Она за што ретко се зборува е – тагата во бракот. Дури и најсреќните парови минуваат низ фази на жалење за она што било – спонтаноста пред децата, леснотијата на смеата пред животните грижи, младоста и безгрижноста што некогаш ја делеле.
Оваа тага може да се појави во разни форми:
Ви недостигаат старите верзии еден од друг – можеби вашиот партнер повеќе не пишува песни на полноќ, туку си легнува рано – но тој станал стабилен, сигурен и топол; сепак, чувствувате како да копнеете по верзија од него што сè уште постои, но повеќе не е иста.
Ви недостига она што бевте – можеби порано бевте забавни, енергични и ентузијастични, а сега ви недостига тоа; ова чувство може да биде придружено со солзи, тишина или необјаснета тага.
Процесот на лекување не почнува со заборавање, туку со признавање на овие чувства. Гледањето стари фотографии, потсетувањето со вашиот партнер или заедничкотото негување спомени може да помогне. Бидејќи растот вклучува промена – и секоја промена остава нешто вредно зад себе.
Забава
Правете редовни прегледи: четири промени во градите што не треба да ги игнорирате

Секоја промена на вашите гради може да биде знак за рак, па ако забележите нешто, не одложувајте одење на лекар.
За многумина од нас, нашите гради се едноставно таму, поради што често ги игнорираме. Сепак, важно е да се грижите за нив и да ги следите сите промени што ќе ги забележите. Ова е единствениот начин секогаш да бидете еден чекор понапред кога станува збор за вашето здравје.
Грутка во дојка
Мека маса што се движи под кожата најверојатно е циста исполнета со течност. Ако грутката е цврста, може да биде бенигна, но сепак треба да се консултирате со вашиот лекар.
Осип на вашите брадавици
Траги од каснување, црвенило или осипи што не исчезнуваат по неколку недели може да бидат знак за некоја форма на рак на дојка.
Набрчкана кожа на вашите гради
Ако ткивото се набрчка како кора од портокал, тоа може да биде знак за блокирани лимфни јазли, што укажува на воспалителен рак на дојка.
Бенка или белег што ја менува бојата или обликот
Ракот на кожата најчесто се јавува на нозете, но градите исто така можат да бидат цел на оваа болест. Обрнете внимание на асиметриите, неправилните рабови на бенката, варијациите во бојата и дали таа расте и се шири.
Покрај редовните прегледи на градите што ги правите сами, не заборавајте да го потсетите вашиот гинеколог да ги прегледа и вашите гради кога одите на годишен преглед!