Лето. Море, сонце, смеа до доцна во ноќта, коса мокра од солена вода и топол песок под нашите нозе – не е ни чудо што оваа сезона ни е толку пријатна!

Но, зад тоа летно расположение лежи моќна научна вистина: летото навистина го менува мозокот, телото и душата – и тоа на подобро.

Сончевата светлина како природен антидепресив
Нема подобар начин да се разбудите кога сончевите зраци ќе пробијат низ ролетните. Науката вели – тоа не е случајност! Сончевата светлина го стимулира производството на серотонин, хормонот на среќата, и го регулира мелатонинот, хормонот на спиењето.

Овие две моќни супстанции заедно влијаат на подобра концентрација, подобар квалитет на спиење и секако – позитивно расположение.

Витамин Д – „витаминот на сонцето“ за ментална рамнотежа
Летото не само што ни дава бронзен тен на кожата, туку и витамин Д, кој директно промовира добра хормонска рамнотежа и ја зачувува функцијата на мозокот. Освен што ја подобрува меморијата и фокусот, овој витамин игра важна улога и во менталното здравје.

Лековитата моќ на водата
Постои причина зошто сите сонуваме за плажа – близината на вода го намалува стресот и го зголемува чувството на мир. Истражувањата во Велика Британија покажаа дека луѓето се најсреќни во „сините зони“ – во близина на морето, реките или езерата.

Затоа не е ни чудо што сурферите се секогаш толку опуштени – тие буквално лебдат во својата терапија.

Назад кон природата
Летото нè носи на отворено – без разлика дали е во шума, плажа или градски парк, времето поминато во природа е докажано дека ја намалува анксиозноста и го подобрува расположението. И таа врска со природата не мора да заврши кога ќе заврши август – продолжете со навиката и во есен!

Дружење = здравје
Летото е сезона на спонтани собири, скари, вечерни излегувања и продолжени кафиња со пријатели. А социјалните врски се клучни за долг и среќен живот – тоа е докажано во најдолгото истражување за среќата. Квалитетните врски со луѓето околу нас нè штитат подобро од кој било додаток.

Но летото не е „најубавото време од годината“ за секого
Важно е да се знае – некои луѓе не се чувствуваат најдобро во текот на летото. Високите температури, притисокот од социјалните очекувања, нереалните стандарди од социјалните мрежи – можат да предизвикаат стрес, вознемиреност или чувство на неприпадност.

Затоа – не заборавајте ја емпатијата. Некој можеби претпочита да ужива во тишината на климатизирана просторија и книга, отколку на забава под палми – и тоа е сосема во ред.

Летниот „зен“ не е мит, туку природна реакција на телото на светлина, поврзаност и релаксација. Затоа, искористете го летото мудро – сончајте се (умерено), сакајте, смејте се и грижете се за себе. Нека вашиот летен ден биде не само убав – туку и лековит.