Забава
Зошто се менува бојата на очите кај бебињата
Промената на бојата на очите кај бебињата е феномен кој се јавува во текот на првата година од животот, најчесто во периодот од шестиот до деветтиот месец, а причината лежи во генетиката и количината на меланин, односно пигментот којшто ја одредува бојата.
Кога се раѓаат бебињата, особено оние со посветол тен, нивните очи најчесто се со светла боја, бидејќи имаат многу малку меланин (вид пигмент кој им дава боја на очите, кожата и косата). Според магазинот „Родители“, количината на меланин во ирисот, односно обоениот дел од окото, одредува каква боја ќе имаат очите. По раѓањето, светлината го стимулира производството на меланин, поради што бојата на очи може да потемни или да се промени со текот на времето.
Обично промената може да се забележи во првите 6-9 месеци од животот. За време на неколку недели или месеци, може да забележите дека очите на вашето бебе потемнуваат. Промената е толку постепена што можеби не ја забележувате сè додека еден ден не се разбудат и ве изненадат со друга боја на очи.
До 12 месеци, повеќето бебиња добиваат трајна боја на очите, иако таа кај некои деца може да се промени до шестгодишна возраст, што е доста ретко. Генетиката одредува колку меланин ќе има една личност во своето тело. Во основа, родителската ДНК одредува каква ќе биде нивната боја на очи.
Повеќе гени во телото придонесуваат за неа – дури и ако двајцата родители на детето имаат кафени очи, можно е бебето да заврши со сини очи доколку родителите имаат гени на сини очи некаде во нивната генетски состав. Речиси е невозможно однапред да се предвиди бојата на очи на вашето бебе. Никој, вклучително и лекарот, не може да предвиди каква боја ќе имаат очите кога детето ќе порасне, а не е важно што јаде или прави вашето бебе и на колкава количина светлина го изложувате.
Ако бебето е родено со кафени очи, тоа значи дека тој веќе ја има количината на меланин доделена од генетскиот код, па затоа бојата на очи нема да се промени. Исто така, може да се изостави промената кај посветлите очи.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Забава
Илјадници луѓе го пречекаа Бејби Лазања на плоштадот во Загреб, тој се расплака
По историскиот успех на Евровизија, односно второто место, Бејби Лазања денеска се врати дома.
Тој беше пречекан од илјадници луѓе на плоштадот во Загреб.
Пејачот двапати ја испеа Рим Тим Таги Дим за публиката, а присутните пееја и танцуваа со него. Меѓу нив беше и градоначалникот на Загреб, Томислав Томашевиќ. Во еден момент, Лазања заплака на сцената.
„Лесно ми е мене, важно е луѓето да се среќни“, скромно рече тој, пренесува хрватски „Индекс“:
Тој призна дека не очекувал толку голем одѕив на дочекот.
„Очекував можеби сто луѓе“, додаде.
Бејби Лазања по излегувањето на сцената покрај хрватската делегација изјави дека сè направил сам со тимот, а медиумот потсетува дека Лазања беше резервен избор на ХРТ за Евровизија.
Според гласовите на публиката, хрватскиот претставник победи во Малме.
Забава
(Видео) Koj е Немо – победникот на Евровизија
Благодарение на гласовите од жири комисијата Немо од Шварцарија победи на изборот за песна на Евровизија со песната „Код“.
Немо се опишува себе си како небинарна личност, што значи дека не се декларира како маж или жена, туку како „тие“.
Немо (25) е рапер, пејач и музичар кој свири виолина, пијано и тапани. Досега имаат издадено три албуми, а песната „Du“ беше четврта на швајцарските топ листи во 2017 година.
Швајцарија немаше конкурс за песната да ја испрати на Евросонг, но интерно ја избраа песната ‘Код’. За изборот се пријавиле 472 песни, а жирито го сочинувале најмалку 240 меѓународни членови од публиката и 30 членови на стручно жири од 20 земји.
Критиките по финалето и неговата победа се поделени, а немалку коментираат дека се изненадени од победата и дека повторно жири комисијата ја надгласала публиката која ја избра Хрватска – некрунисаниот морален победник, но има и коментари дека е направен вистински избор, додека хрватската песна е копија на оние на „Рамштајн“.
„Кодот е за патување започнато со сознанието дека не сум ниту маж ниту жена. Пронаоѓањето на себеси беше долг и често тежок процес за мене. Но, ништо не е подобро од слободата што дојде со сознанието дека сум небинарна личност“, вели Немо.
Забава
(Видео) На евровизискиот победник му се скрши трофејот – пари од победата на Евровизија не заработи
Швајцарија е победник на Евровизија 2024 година. Немо го освои трофејот на престижниот музички натпревар со песната „The code“.
Многумина се прашуваат колку заработува победникот на овој музички натпревар, а одговорот е – не забоработува ништо.
Наградата за победникот на Евровизија е стаклен трофеј во форма на микрофон, кој го скрши синоќешниот победникот на Швајцарија.
Во екот на прославата, Немо се спушти на подот и во тој момент се слушна како се крши стакло.
За прв пат во историјата на Евровизија некој го скрши трофејот.
Видеото од овој настан брзо стана вирално.
⚡️During the final performance, the winner, representing #Sweden, #NEMO, broken the crystal #Eurovision2024 trophy. pic.twitter.com/klwexzXT9b
— KyivPost (@KyivPost) May 11, 2024
Немо Метлер на Евровизија ја испеа песната „The Code“, која, како што вели, делумно била инспирирана од реалниот живот. Немо има 25 години и се декларира како небинарна личност, односно како ниту машко ниту женско, туку како „тие“.
„’Кодот’ е за патување кое започна со сознанието дека не сум ниту маж, ниту жена. Да се пронајдам себеси беше долг и често тежок процес, но ништо не е подобро од слободата што дојде со сознанието дека сум небинарна личност“, рече Немо во една прилика и нагласи колку е значајна можноста да се пее на сцената во Малме.
„Неверојатна чест е што можам да ја претставувам Швајцарија на Евровизија. Оваа платформа нуди одлична можност за градење мостови меѓу различни култури и генерации. Затоа, како квир личност, многу ми е важно да се залагам за целата ЛГБТКИА+ заедница“, заклучи Немо.
Финалето на „Евровизија 2024“ се одржа вечерва во Малме, а главен фаворит беше хрватскиот претставник Бејби Лазања со песната „Rim Tim Tagi Dim“, кој заврши на второто место. Бејби Лазања беше победник од гласовите од публиката, но од стручното жири доби само две дванесетки – Кипар и Србија.