Забава
Речиси 30 проценти од Американците практикуваат ДИНК начин на живот
Дали некогаш сте слушнале за кратенката ДИНК? Овој акроним сè повеќе се користи меѓу оние кои живеат или сакаат да живеат модерен живот.
Акронимот DINK е кратенка од англискиот израз dual income, no kids односно на македонски „двоен приход, без деца“. Се однесува на брак или партнерство во кое и двајцата партнери имаат приходи, но немаат деца (ниту пак планираат да имаат). Потеклото на оваа кратенка не е сосема јасно бидејќи тоа не е термин кој често се споменува во поп-културата, но терминот наводно бил измислен во 80-тите, пишува Yahoo.
Порано на многумина им беше сон да се венчаат и да имаат деца, но сè повеќе парови денес одлучуваат да живеат сосема спротивно од тоа. Ваквите парови заработуваат повеќе, не мора да се откажуваат од својот социјален живот, имаат време за себе и за своите хоби, сите пари ги трошат на себе, а притоа имаат и простор за заштеда.
Многу млади парови се откажуваат од намерата да имаат деца. Оваа група ги вклучува т.н. милениумци и генерацијата икс, и наместо да го брка „американскиот сон“, кој вообичаено вклучува брак, деца и пензионерски денови на брод за крстарење, оваа група сака веднаш да ги насочи своите пари и време на луксуз. Доколку имаат деца, сметаат тие, не би можеле да си дозволат патувања, ресторани, дизајнерска облека, скапи автомобили… А маркетиншките кампањи сè
повеќе се насочени кон ДИНК двојките.
Популацијата на парови без деца е драстично зголемена. Според една неодамнешна студија на Истражувачкиот центар Пју, две третини од возрасните Американци немаат деца или не планираат да имаат. Huffington Post спроведе и истражување, според кое 27 отсто од сите американски семејства се ДИНК. Исто така, истражувањата покажуваат дека дури три четвртини од возрасните двојки без деца немаат намера никогаш да имаат деца, а овој тренд продолжува да расте. Во 2019 година, во Германија имало осум милиони парови без деца, а една година подоцна тој број пораснал на 8.62 милиони.
Одлуката на паровите да немаат деца е делумно финансиски условена. Во богатите западни земји, подигнување деца носи финансиски трошоци, а дополнително треба и да се грижите за нив, што некои луѓе го сметаат за недостаток на слобода, социјален живот и професионално самоисполнување.
Но, Џеј Зигмонт, основач на услугата за финансиско планирање Childfree Wealth и автор на книгата Portraits of Childfree Wealth, предупредува дека ако немате деца, тоа не значи дека ќе се збогатите.
„Да бидете без деца не значи автоматски дека сте богати. Разликата е во тоа што ако една личност без дете едвај може да ја држи главата над вода, да има дете, ќе се удави“, рече тој.
Не е ни чудо што ДИНК е сè попопуларен во современото општество и што многумина го нарекуваат „модерна верзија на американскиот сон“. За ваквата перцепција придонесува и начинот на кој ДИНК се прикажуваат во медиумите – како безгрижни, опуштени луѓе кои имаат пари, уживаат во патувањата, пијат коктели и носат дизајнерска облека.
Се разбира, овој начин на живот има и недостатоци. Паровите со деца тврдат дека ДИНК се себични и дека ја пропуштаат големата среќа на животот – сопственото дете. Меѓу минусите е и опасноста од прекумерна потрошувачка. Ако немате деца, помалку сте внимателни со финансиите, што може да доведе до долгови. Во некои земји, самците или двојките треба да плаќаат повисоки даноци. Карли Карамана, репортерка на Yahoo, го живее животот на ДИНК и објаснува како функционира.
„Не ме сфаќајте погрешно, јас и мојот сопруг сакаме деца и имаме одлични односи со многу помлади членови на поширокото семејство и децата на блиските пријатели. Всушност, со дополнителното време што го имаме, бидејќи немаме свои деца, имаме можност да создадеме посебни врски со децата на нашите пријатели“, рече таа и додаде: „Мојот сопруг и јас ја делиме љубовта кон патувањето и можеме да патуваме добар дел од годината, барем еднаш месечно, со наши пари. Едноставно кажано: го сакаме животот што го живееме и одлично се забавуваме. Се чувствуваме исполнети во секоја смисла на зборот.“
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Забава
Претставничката на Израел по Евровизија: Би било лага ако кажам дека беше лесно
Еден Голан, претставничката на Израел на овогодишниот избор за песна на Евровизија, се огласи на „Инстаграм“ по завршувањето на натпреварот.
„Од каде да почнам? Прво би сакала да кажам дека сум горда на тоа колку далеку стигнавме. Благодарна сум за привилегијата да ја претставувам мојата земја, особено во овие тешки времиња. Од моментот кога го почнавме ова патување, нашата цел отсекогаш беше да го споделиме силниот глас на Израел на една од најголемите сцени. Би било лага ако кажам дека беше лесно, но вашата поддршка и љубов ми дадоа сила да продолжам и да ја дадам најдобрата изведба што можеше“, напиша таа.
„Би сакала да им се заблагодарам на сите што ме поддржаа од целиот свет, на мојата земја, на членовите на делегацијата и на моето семејство, кои едвај чекам да ги видам и гушнам. И секако, благодарам на сите што гласаа бидејќи Благодарение на вас, моето учество на натпреварот за песна на Евровизија го посветувам на гласовите што не можеме да ги слушнеме – киднапираните. Очајнички чекаме да се вратите дома“, рече таа.
За потсетување, Израел на овогодинешниот Евросонг заврши на петтото место со 375 гласови, од кои 323 од публиката. Учесничката се соочи со свирежи за време на нејзиниот настап поради војната во Газа, а непосредно пред одржувањето на натпреварот пред арената имаше големи пропалестински протести.
Забава
Илјадници луѓе го пречекаа Бејби Лазања на плоштадот во Загреб, тој се расплака
По историскиот успех на Евровизија, односно второто место, Бејби Лазања денеска се врати дома.
Тој беше пречекан од илјадници луѓе на плоштадот во Загреб.
Пејачот двапати ја испеа Рим Тим Таги Дим за публиката, а присутните пееја и танцуваа со него. Меѓу нив беше и градоначалникот на Загреб, Томислав Томашевиќ. Во еден момент, Лазања заплака на сцената.
„Лесно ми е мене, важно е луѓето да се среќни“, скромно рече тој, пренесува хрватски „Индекс“:
Тој призна дека не очекувал толку голем одѕив на дочекот.
„Очекував можеби сто луѓе“, додаде.
Бејби Лазања по излегувањето на сцената покрај хрватската делегација изјави дека сè направил сам со тимот, а медиумот потсетува дека Лазања беше резервен избор на ХРТ за Евровизија.
Според гласовите на публиката, хрватскиот претставник победи во Малме.
Забава
(Видео) Koj е Немо – победникот на Евровизија
Благодарение на гласовите од жири комисијата Немо од Шварцарија победи на изборот за песна на Евровизија со песната „Код“.
Немо се опишува себе си како небинарна личност, што значи дека не се декларира како маж или жена, туку како „тие“.
Немо (25) е рапер, пејач и музичар кој свири виолина, пијано и тапани. Досега имаат издадено три албуми, а песната „Du“ беше четврта на швајцарските топ листи во 2017 година.
Швајцарија немаше конкурс за песната да ја испрати на Евросонг, но интерно ја избраа песната ‘Код’. За изборот се пријавиле 472 песни, а жирито го сочинувале најмалку 240 меѓународни членови од публиката и 30 членови на стручно жири од 20 земји.
Критиките по финалето и неговата победа се поделени, а немалку коментираат дека се изненадени од победата и дека повторно жири комисијата ја надгласала публиката која ја избра Хрватска – некрунисаниот морален победник, но има и коментари дека е направен вистински избор, додека хрватската песна е копија на оние на „Рамштајн“.
„Кодот е за патување започнато со сознанието дека не сум ниту маж ниту жена. Пронаоѓањето на себеси беше долг и често тежок процес за мене. Но, ништо не е подобро од слободата што дојде со сознанието дека сум небинарна личност“, вели Немо.