Забава
(Фото) Не е вештачка интелигенција: вилата на карпа навистина постои и се наоѓа над Макарска, во сопственост е на контроверзното семејство Петровиќ

Деновиве, фотографии од прекрасна вила над Макарската ривиера се шират на социјалните мрежи. Фотографиите изгледаат толку нереално што многумина помислија дека е вештачка интелигенција. Но, не е, вистинска е. Тоа е луксузниот комплекс Кук Оаза, сместен на карпа над Макарска.
Комплексот се состои од пет вили, но најголемо внимание привлече вилата Кук, која изгледа како да извира од карпата. „Кралицата на ‘Кук оазата’ е спектакуларната вила Кук, која привлекува внимание со својата фантастична изведба и грандиозен изглед. Вилата Кук е архитектонско чудо кое ви го одзема здивот“, се наведува на веб-страницата на комплексот.
„Како да излегува од карпа“
„Величествено дизајнираната вила изгледа како да излегува од карпата, која ја обвила во својата силна и моќна прегратка. Оваа хармонија на бои, материјали и текстури е толку беспрекорна што, кога човек ќе погледне по нејзините елегантни линии, тешко е да се разликува каде завршува карпата, а каде почнува вилата“, објаснуваат тие.
Комплексот вклучува и тениско и кошаркарско игралиште со поглед на море.
Проектот Вила Кук е создаден во 2021 година, а концептуалниот дизајн го изработи архитектката Бранка Јурас.
Како што објавија хрватските медиуми, имотот е во сопственост на Мирјана Петровиќ, сопруга на Блажo Петровиќ, контроверзен претприемач кој има заеднички бизнис со Зоран Припуз. Петровиќ моментално е на судење во случајот против поранешна судијка, која е обвинета за примање поткуп од 15.000 евра за да донесе ослободителна пресуда во негов случај.
Мирјана Петровиќ е сопственик на земјиштето на кое се градат луксузните вили, а воедно и инвеститор. Петровиќ е директор и основач на неколку компании, од кои едната е Кук Оаза во Макарска, која е основана во 2020 година, а се занимава со изнајмување и управување со сопствени недвижности и има исто име како и вилите што се издаваат под наем.
Блажо Петровиќ е често име во црните хроники од крајот на 1990-тите во Хрватска, кога државата, по убиство во центарот на Загреб, почна да се справува со криминалните кланови. Петровиќ беше обвинет во случајот „мала криминална организација“, но беше ослободен од обвиненијата тогаш.
Тој постојано е доведуван во контекст на сомневања поврзани со купопродажба на разни земјишта. Исто така, е гонет за даночно затајување, перење пари, нелегално градење и корупција. Петровиќ е апсен неколку пати под сомнение за неколку кривични дела.
Фото: принтскрин
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Забава
Откриена причината за смртта на Халк Хоган

Page Six ексклузивно ја откри официјалната причина за смртта на Халк Хоган.
Легендарниот професионален борач починал од акутен миокарден инфаркт, познат и како срцев удар. Документите, исто така, открија дека Хоган тајно се борел со леукемија, состојба која досега не била јавно позната.
Според Канцеларијата на медицинскиот испитувач на округот Пинелас, срцевиот удар бил предизвикан од ненадејно блокирање на протокот на крв во срцевиот мускул, што предизвикало оштетување на ткивото. Во документот, објавен од Page Six, исто така се наведува дека Хоган имал историја на атријална фибрилација (AFib), состојба која се карактеризира со неправилно и брзо отчукување на срцето.
Најголемото изненадување во извештајот на медицинскиот испитувач беше информацијата дека поранешната суперѕвезда на WWE, роден како Тери Болеа, страдал од хронична лимфоцитна леукемија (CLL) – вид на рак кој ги зафаќа белите крвни зрнца. Неговата смрт беше прогласена за природна смрт.
Халк Хоган доживеа срцев удар во својот дом во Клирвотер, Флорида, на 24 јули. Тој беше итно префрлен во болницата Мортон Плант, каде што беше прогласен за мртов. Почина на 72-годишна возраст.
Забава
Мухамед е најпопуларното име за момчиња во Англија, втора година по ред

Објавени се најпопуларните имиња за бебиња родени во Англија и Велс во 2024 година, при што Мухамед е најпопуларното машко име втора година по ред, додека Ноа и Оливер го зазедоа второто и третото место, исто како и во 2023 година.
Според Би-Би-Си, Оливија и Амелија ги зазедоа првите две места за девојчиња трета година по ред, додека Исла падна од третото место и беше заменета со Лили.
Листата ја објави Канцеларијата за национална статистика (ONS), која ја составува листата врз основа на податоци од матичните книги на родени.
Новите имиња што влегоа во првите 100 за девојчиња се Елоиз, Нора, Мила, Роза, Атена, Сара и Зои. Новите имиња за момчиња се Остин, Натан, Вини и Јахја.
Мухамед го задржа првото место како најпопуларно машко име, со 5.721 бебиња што го добија ова име. Ова име е најпопуларно во пет од деветте региони на Англија.
Други варијации на името, исто така, се најдоа на листата: Мохамед се најде на 21-во место со 1.760 момчиња, а Мохамад на 53-то место со 986.
Забава
Ќерката на Мајкл Џексон откри дека ја раскинала свршувачката со познатиот актер: „Ова се солзи на раскин“

Парис Џексон, 27-годишната ќерка на легендарниот крал на поп-музиката, Мајкл Џексон, и американскиот актер Џастин Лонг ја раскинале свршувачката по три години врска.
Веста ја сподели самата Парис на социјалната мрежа „Икс“, каде што напиша: „Ова се солзи на раскин. Повторно сите се провлекувате“.
Инаку, пејачката во декември преку „Инстаграм“ ја објави свршувачката со Лонг, но објавата подоцна беше избришана. Во јуни, во интервју за „Аксес Холивуд“, изјави дека подготовките за свадбата се во полн ек.
„Фустанот е во изработка, местото е избрано, а датумот го одреди астролог – затоа што сум од Лос Анџелес“, рече таа.
Да потсетиме, Парис пред неколку дена беше снимена како расплакана шета сама на улиците на Малибу.
Исто така, минатиот месец беше критикувана бидејќи настапила на концерт закажан токму на денот на годишнината од смртта на татко ѝ. Во обраќање на социјалните мрежи објасни дека таа нема влијание врз распоредот на турнејата бидејќи не е главна изведувачка.
„Тоа што настапувам на тој ден не значи дека сум заборавила. Никој не треба да ми кажува како да тагувам“, порача таа тогаш.