Легендарниот моден дизајнер Џорџо Армани почина на 91-годишна возраст, а неговиот животен партнер, Лео дел Орко, беше покрај него до самиот крај.

Веста за смртта на Џорџо Армани ја потврди неговата компанија наведувајќи во објава на социјалните мрежи дека Армани „починал мирно, опкружен со своите најблиски“.

Тој цело време бил придружуван од својот партнер Лео дел Орко.

Како почна приказната со Лео?
Армани и Дел Орко се запознале случајно во еден парк во Милано во 70-тите. Дел Орко го шетал кучето на пријател, кое си играло со кучето на Армани. Во тоа време Дел Орко, тогаш 24-годишен, работел како извршен директор за рекламирање, но набргу почнал кариера како индустриски дизајнер, а потоа и како модел за компании со кои Армани соработувал.

Десна рака и клучна поддршка по загубата
Дел Орко ѝ се приклучил на компанијата на Армани во 1977 година, само две години по нејзиното основање. Тој станал клучна фигура, особено откога на Серхио Галеоти, партнер и соработник на Армани во тоа време, му била дијагностицирана СИДА во 1984 година. По смртта на Галеоти една година подоцна, Дел Орко станал најголем поддржувач на Армани, и лично и професионално.

„По смртта на Серхио, тој беше најблиската личност до мене“, изјави Армани за Си-ен-ен во 2022 година. „Тој ми даде неверојатна психолошка, практична и деловна поддршка. Првин Серхио, потоа Лео“.

Со текот на годините Дел Орко беше опишан како десна рака на Армани, а денес тој ја води канцеларијата за машки стил и ги надгледува машките колекции за сите брендови на куќата, вклучувајќи ги „Џорџо Армани“, „Емпорио Армани“ и „Армани ексчејнџ“.

Тој ја покажа својата лојалност и во јуни оваа година кога Армани ја пропушти ревијата за машка облека првпат по 50 години поради болест. Дел Орко го замени и ги увери новинарите по ревијата дека дизајнерот го гледал емитувањето и дека му се допаднала.

Партнерство за цел живот
Иако деталите од нивната романса најчесто ги чувале за себе, Дел Орко ја опишал нивната врска како доживотно партнерство. Самиот Армани потврди во интервју за „Кориере дела сера“ во 2024 година колку многу му значел Лео. Во таа пригода тој покажал дијамантски прстен на левата рака, подарок од Дел Орко.

Кога го прашале за љубовта, дизајнерот признал дека, генерално, бил рамнодушен кон неа, но ги нагласил силните чувства што ги имал кон Дел Орко за кој рекол дека живеел со него со години и дека му била најблиската личност.

Иднината на брендот „Армани“
Пред смртта Армани често зборувал за плановите за наследување, иако никогаш јавно не именувал наследник. Заедно со Дел Орко, кој раководи со машката мода, внуката на Армани, Силвана Армани, која е задолжена за женската колекција, е исто така клучна фигура во компанијата.

„Ја подготвувам мојата иднина со луѓето околу мене“, изјави тој за „Асошиејтед прес“ во 2021 година. Во едно од последните интервјуа, објавено во „Фајненшл тајмс“ кон крајот на август, тој беше уште поконкретен.

„Моите планови за наследување се состојат од постепено префрлање на одговорностите што отсекогаш сум ги извршувал на оние што се најблиски до мене, како што се Лео Дел Орко, членовите на моето семејство и целиот работен тим“.

Тој заклучи велејќи: „Би сакал наследувањето да биде органско, а не момент на прекин“.

фото: принтскрин