Борбите меѓу побунетите милиции на шиитското племе Хути и војниците лојални на поранешниот претседател Салех, од една страна, и приврзаниците на јеменскиот претседател во егзил Хади, кои добиваат поддршка од воздушните напади на арапската сунитска коалиција предводена од Саудска Арабија, во неделата се водеа најжестоко во четирите големи градови во јужниот дел на земјата, каде што според непотполните податоци на двете страни имало најмалку 60 загинати.

Најтешките борби се водат во Аден и Таез, град кој досега релативно беше поштеден од судирите, но во кој милициите на Хутите отворија ново боиште. Станува збор за трет по големина јеменски град, кој е стратешки важен поради одбрана на вториот по големина Аден, каде наидоа на поголем отпор отколку што се надеваа, по релативно лесното освојување на престолнината Сана и на Аден. Посилни судири има во Атака, главен град на покраината Шабва, како и во Далех, во јужен Јемен.

Челникот на шиитското движење Ансаралах, Амбдел Малик ал-Хуси преку телевизиско обраќање од главниот град Сана побара од жителите на јужните покраини да се обединат во борбата против Ал Каеда на Арапскиот полуостров, која исто така контролира голем области во Јемен.

„Ние не сме окупатори и подготвени сме на соработка со жителите на југот заедно да ја разбиеме Ал Каеда и да ја отфрлиме надворешната агресија“, истакна водачот на шиитските бунтовници, кои го контролираат северот од Јемен.

Според него, благодарејќи на воздушните удари на Саудиска Арабија, терористите ги зацврстиле своите позиции во југоисточната покраина Хадрамаут и преставуваат закана а остатокот од Јемен. Ал-Хуси е убеден дека „целта на нападите (од Саудиска Арабија) е да му се предаде целиот Јемен на Ал Каеда. Лидерот на шиитските бунтовници истакна дека “пред сите Јеменци се поставува задачата да се обединат и да се борат против овој заговор“.

Говорот на водачот на шиитска милиција Ансаралах следеше веднаш по соопштението на партијата Генерален народен конгрес, на соборениот во 2012 година претседател Али Абдулах Салех, во кое се бара извршување на Резолуцијата 2216 на Советот за безбедност на ОН, која повикува на прекин на огнот во Јемен и обновување на дијалогот под закрила на ОН. Резолуцијата бара од побунетите Хути да се повлечат од престолнината Сана, да го положат оружјето кои го заробија од владините војски.

Командантот на големата воена област во Јемен, на кој е половината од границата со Саудиска Арабија, во неделата му изрази поддршка на претседателот Хади, што значи дека на страна на приврзаниците на претседателот во егзил и коалицијата што ја водат Саудијците, ќе се додадат најмалку 15.000 војници во пустинските и ридските предели.

„Бригадниот генерал Андулрахман ал-Халили од Првата воена област денеска ја објави својата поддршка за уставната законитост, која ја претставува претседателот Хади“, изјавил преку локалното радио неименуван јеменски функционер.,

Инаку мнозинството од припадниците на јеменската армија му се лојални на соборениот претседател Салех кој последните месеци стапи во сојуз со побунетите Хути, кои од крајот на минатата 2014 година се побунија против претседателот Хади кого го обвинија дека не презема никакви мерки за да го спречи напредувањето на Ал Каеда.

Коалицијата на сунитските арапски земји коишто го поддржуваа претседателот Абд Раба Мансур Хади, најавија дека следните неколку денови ќе достават хуманитарна помош преку поморски пат. Целата сума за таа помош, 274 милиони долари токму колку што побараа минатата седмица Обединетите нации, ќе ги плати самата Саудиска Арабија./крај/мф/сн

Извор: Макфакс