Регион
Вучиќ по повод 17 години од интервенцијата на НАТО: Србија не заборава, но простува
Српскиот премиер Александар Вучиќ во четвртокот по повод 17 години од бомбардирањето на НАТО изјави дека Србија никогаш нема да ја заборави агресијата на Североатланската алијанса во 1999-та година и жртвите која таа ги даде, но и дека земјата простува бидејќи мора да живее и да гледа кон иднината, пренесуваат српските медиуми.
„Тагата, жалоста и солзите не смеат да нѐ одведат во бес и мразење. Останува предупредувањето и за нас и за нив. За крвта мораат да кажат дека била крв, а не колатерална штета. Србија памети и никогаш не заборава, но мора да живее и да гледа кон иднината. Не можеме да го промениме тоа што се случи, ниту да го вратиме времето, но не можеме да останеме заковани во минатото“, рече Вучиќ во Варварин за време на комеморацијата.
Српскиот премиер додал дека Србија пред 17 години била на спротивната страна во однос на 19 големи земји кои ја нападнале, но дека денес сите се на истата бидејќи Србија дава сѐ од себе поради помирувањето и поради тоа што „ова е во интерес на српскиот народ и неговата иднина“.
Според Вучиќ, Србија денес има пријатели на истокот, а со партнерите на западот стои рамо до рамо. Тој додал дека земјите кои пред 17 години ја нападнале Србија, денес се на удар на тероризмот и дека никој не може нив подобро да ги разбере од Србија.
Градоначалникот на општината Варварин, Зоран Миленковиќ, чија ќерка Сања загинала за време на бомбардирањето на мостот во ова место, оценил дека агресијата на НАТО била „незапаметено злосторство на една голема сила која сакала да покаже како сурово се казнува непослушноста на српскиот народ“.
Венци на Голема Морава, покрај српскиот премиер, положиле и претседателот на Република Српска, Милорад Додик, членовите на семејствата на настраданите, како и претставниците на општината Варварин. Авионите на НАТО на 30-ти мај 1999-та година испалија четири проектила во мостот на Голема Морава во Варварин, а во тогашниот напад загинаа десет лица, додека десетици други беа повредени./крај/мф/бс
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Регион
Маж во Тузла ги убил сопругата и двете деца
М.Ч. синоќа во Тузла ги убил сопругата и двете малолетни деца, а потоа си го одзел животот скокајќи од 14 кат од зграда.
Маж се самоуби синоќа околу 21 часот и 15 минути, а денеска полицијата во станот го пронашла телото на неговата 34-годишна сопруга и децата на возраст од две и девет години.
Според неофицијалните информации кои ги објавија сараевските медиуми, мажот работел како медицински техничар во Германија, а во Тузла пристигнал пред неколку дена.
Истражните екипи денеска пронајдоа секира во станот во населбата Ступине во Тузла, со која наводно ги убил сопругата и децата.
Портпаролот на обвинителството во Тузла, Адмир Арнаутовиќ изјави дека ќе бидат издадени наредби за обдукција на телата на загинатите за да се утврдат точните причини за смртта.
Ќе биде издадена наредба за биолошко вештачење, ДНК анализа, како и други истражни дејствија и вештачења, со цел да се утврдат сите околности поврзани со овој настан, вклучително и начинот и начинот на трите убиства“, рече Арнаутовиќ.
Регион
Вучиќ изрази сочувство за смртта на Раиси
Претседателот на Србија, Александар Вучиќ, изрази сочувство до народот и владата на Иран во врска со смртта на претседателот на таа земја, Ебрахим Раиси.
„Изразувам сочувство до народот и владата на Исламската Република Иран за смртта на претседателот Ебрахим Раиси, искрен и доследен пријател на Србија“, напиша Вучиќ на својот профил на мрежата Х.
Хеликоптерот со Раиси и министерот за надворешни работи Хосеин Амир-Абдолахиан се урна во неделата во северозападниот дел на Иран, во областа Верзеган, а покрај двајцата загинаа уште шест лица.
Регион
18-годишник е уапсен бидејќи го запалил хрватското знаме и го споделил на социјалните мрежи
Осумнаесетгодишник е уапсен во Славонија бидејќи на 1 мај го запалил хрватското знаме во шумата кај Трпија.
Како што дознала полицијата, тој тоа го снимил и го објавил на социјалните мрежи.
„На овој начин тој јавно го подложи знамето на Република Хрватска на потсмев и грубо омаловажување и на јавноста и стави на располагање видео од тој чин преку компјутерска мрежа, во кое повикува на насилство или омраза насочена кон група луѓе поради нивната национална или етничка припадност“, наведува полицијата во кривичната пријава.
Пријавата го товари младиот човек за јавно поттикнување насилство и омраза и нарушување на угледот на Република Хрватска. За овие злосторства му се заканува затворска казна до три години.
Од полицијата потврдија дека со решение на Жупанискиот суд во Вуковар, на 18-годишникот му е одредена мерка притвор.