Меѓународните експерти за хемиско оружје потврдија дека иперит е употребен во сирискиот град Мареа, каде што екстремната сунитска групација Исламска држава (IS) се бори со други бунтовнички групи, се наведува во извештајот на  меѓународните набљудувачи.

Доверливиот документ од 29-ти октомври на Организацијата за забрана на хемиското оружје (OPCW), во чии извадоци имала увид агенцијата Reuters, се заклучува дека „со голема веројатност најмалку две лица биле изложени на иперит“ во градот Мареа, северно од Алепо, на 21-ви август годинава, „Многу веројатно е дека едно бебе починало од последиците на иперит“, се додава во цитираниот извештај.Содржината на извештајот, без поединости, го потврди во петокот вечерта и руското министерство за надворешни работи, кое оцени дека извештајот на OPCW всушност „го потврди користењето на иперит од страна на терористичката организација Исламска дражва во Сирија“.„Што се однесува до извештајот на мисијата на OPCW, всушност се потврдува употребата на иперит од страна на Исламската држава во Сирија, што беше многу внимателно проучувано и од страна на руските специјалисти. Планирано е негово разгледување во Хаг на сесијата на Извршниот совет на OPCW до крајот на ноември“, се наведува во кусото соопштение на руската дипломатија. Доказите, како што наведува Reuters, ја даваат првата потврда за употреба на иперит, откако беше договорено и изнесувањето и уништувањето на резервите од хемиско оружје во Сирија, меѓу кои спаѓа и иперитот.Во извештајот не се споменува Исламската држава, бидејќи во мандатот на мисијата не е одредување на виновникот, меѓутоа дипломатски извори од повеќе земји тврдат дека хемиско оружје е употребено во судирите меѓу Исламската држава и другите бунтовнички групи кои во тоа време се воделе во споменатата област.„Тоа го наметнува многу важното прашање за тоа од каде доаѓа хемиското оружје. Или тие (Исламската држава) се способни да го произведат самите, или оружјето може да потекнува од складиштата коишто Исламската држава ги заземала. Двете можности се загрижувачки“, рекол неименуван извор за агенцијата.Меѓутоа, официјалните сириски власти и во случајот од летото 2013 година кога имаше употреба на хемиско оружје во предградие на главниот град Дамаск, кога само паушално и без докази беше обвинета владата на претседателот Башар ал-Асад, тврдеа дека џихадистите ги употребиле боевиот отров доставен од странски разузнавачки служби, од сунитските арапски земји, со цел да ја дискредитира власта и да предизвика странска воена интервенција. Се претпоставува дека Сирија целосно го предала хемиското оружје пред 18 месеци. Неговата употреба претставува кршење на резолуцијата на Советот за безбедност и конвенцијата за хемиско оружје од 1997 година, на којашто Дамаск ѝ пристапи пред година ипол.Во извештајот, кој официјално му беше претставен на генералниот секретар на ОН, Бан Ки-Мун претходно во ноември, се предочени повеќе докази дека Исламската држава добила и користи хемиско оружје во Ирак и во Сирија.Властите во автономната курдска покраина Ирачки Курдистан претходно обвинија дека џихадистите од Исламската држава истрелувале врз позиции на нивните борци – пешмергите во северен Ирак гранати исполенти со иперит во текот на борбите во август. Според нив, примероците од крвта земена од 35 борци кои биле изложени на нападот југозападна од регионалната престолнина Ербил, покажале траги од иперит, кои ги имало и на остатоците од истреланите гранати./крај/мф/сн

Извор: Макфакс