Сириската армија започнала да го користи новото руско оружје, изјавиле во четвртокот сириски воени извори, а истовремено постојаниот претставник на Сирија во Обединетите нации, Башар Џафари изјави дека Русија би требало да има можност како и САД да изведува воздушни удари врз радикалната сунитска организација Исламска држава (IS).

Сириски вени извори за агенцијата Reuters го опишуваат новото руско оружје како многу прецизно и ефикасно, и додаваат дека војската започнала да го користи минатите седмици, откако била спроведен обука во Сирија изминатите месеци.

„Се испорачува ново оружје, нови модели оружје. Сириската војска се обучува за нивно користење. Војската веќе некои типови оружје започна да ги користи. Оружјето е многу ефикасно и многу прецизно и точно ги погодува целите“, рекол неименуваниот воен извор на Reuters запрашан за руската воена поддршка.

Претходно сирискиот амбасадор во ОН, Башар Џафари за новинарите во Њујорк изјави дека на Русија би требало да ѝ биде овозможено да презема воздушни удари врз позициите на џихадистичката група Исламска држава во Сирија, како што тоа го прави меѓународната коалиција предводена од САД.

„Зошто Американците војуваат против Исламската држава со своите воздушни сили, а за Русија тоа да е забрането? Дали тоа има смисла? Никако. На крајот, ние се бориме против ист непријател“, го цитира Џафари Associated Press.

Претходно американски функционери за Reuters тврдеа дека Русија последните денови значително го засилила своето воено присуство во покраината Латакија којашто е упориште на поддржувачите на сирискиот претседател Башар ал-Асад. Се споменува и дека во споменатата база биле истоварени 200 руски маринци. САД ја критикуваат оваа стратегија за која Москва вели дека не постои, и велат дека Русите во Латакија градата „модерна воздухопловна база“.

Рускиот министер за надворешни работи Сергеј Лавров минатата седмица повтори дека Москва не крие оти ја помага и ќе продолжи со воената и техничката помош за армијата на сириската влада во борбата со терористичките групи.

Терористичката организација Исламска држава денес е една од најголемите безбедносни закани во светот. Последните три години оваа џихадистичка групација успеа да заземе големи области во Ирак и во Сирија, на кои прогласи свој ткн „калифат“. Покрај тоа таа се обидува да го прошири своето влијание и во земјите во Северна Африка, особено во Либија.

Според различни процени, Исламската држава контролира територија којашто се протега на околу 90.000 квадратни километри, на која објавија воспоставување свој „калифат“ во кој ги применуваат строгите исламски прописи но според нивното ригидно толкувања, што претпоставува меѓу другото и наметнување даноци на „неверниците“, односно христијаните и шиитите, како и брутални јавни казнувања и егзекуции.

Во борбата против Исламската држава учествуваат околу 90 земји, но нема заеднички фронт против оваа џихадистичка структура којашто е прогласена за најголемата светска закана за мирот денес. САД ја предводат коалицијата од западните и сунитските земји од регионот која изведува воздушни напади во Ирак и во Сирија, каде што дејствуваат без одобрување или координација со силите на претседателот Башар ал-Асад чиешто заминување од власт го бараат. Русија, пак, е децениско сојузник на Асад и ја помага неговата влада и армија, со хуманитарни и пратки во вооружување според претходни договори./крај/мф/сн

Извор: Макфакс