Силите на владата на сирискиот претседател Башар ал-Асад со поддршка на руската авијација ја презема во неделата целосната контрола над древниот град Палмира откако од него ги протера џихадистите на Исламската држава што претставува симболична но и стратешка победа за Дамаск.

„По жестоките судирите во текот на измината ноќе, војската потполно го контролира градот Палмира, вклучително и древната знаменитост и истоимената станбена населба. Џихадистите се повлекоа од таму“, изјавил воен сириски извор за француската новинаска агенција AFP.

„Денеска утрото уште се водеа борби. Меѓутоа, терористите коишто беа останати во градот се ликвидирани. Уништени се последните џебови“, изјавил за руската агенција РИА извор од штабот за операцијата за освојување на Палмира.

Според него, борците на Исламската држава кои останале во Палмира продолжиле да даваат отпор во областа на аеродромот и во центарот на градот. Нивната задача била да го овозможат повлекувањето на главнината од џихадистичките сили.

„Милитантите кои останаа во градот беа бомбаши самоубијци и даваа силен отпор, но сите се уништени“, рекол соговорникот на агенцијата,

Палмира е една од шесте локации од светското културно наследство на човештвото на списокот на УНЕСКО во Сирија, а Исламската држава го зазема градот во мај годинава. Пред повлекувањето од градот, сириската армија го евакуираше најголемиот дел од артефактите од централниот музеј во Палмира. По заземањето од џихадистите, според очевидци, минирани се сите објекти на локалитетот, меѓу другото и големиот антички амфитеатар, кои постепено се уриваа.

Сириската армија која на теренот ја помагаат локалните милиции, шиитското либанско движење Хезболах, доброволци од Ирак и Иран, како и инструктори за специјалните сили од Иран и од Русија, а од воздух ја има поддршката на руската авијација, на 7-ми март започна офанзива, и влезе во Палмира во четвртокот и во петокот кога веќе беа објавени првите снимките од градот од кој се потиснуваат борците на Исламската држава.

Станува збор за една од стратешки победа на владата на претседателот Башар ал-Асад против Исламската дражва зашто ирачки Мосул, и сириските градови Палмира и Рака, се најголемите градови во таканаречениот калифат кој во јуни 2014 година го прогласи челникот на Исламската држава, Абу Бакр ал-Багдади.

Според воени извори, борците на Исламската држава „се повлекоа кон Согне, источно од Палмира, Рака и Деир-ез-Зор“, нивни упоришта во северна и источна Сирија.

„Инженерските воени единици започнаа веднаш со демонтирањето на повеќе десетици бомби и мини поставени во внатрешноста на античкиот град“, кој џихадистите делумно го уништија. Секторот со древните археолошки споменици беше целосно пуст во саботата, бидејќи никој не се осмелуваше да влеза поради поставените мини и отвореноста на просторот за снајперистите.

Според опозициската Сириска опсерваторија за човекови права (SOHR) со седиште во Лондон, „најмалку 400 џихадисти на Исламската држава се убиени од почетокот на офанзивата“ на Палмира, пренесува Reuters.

И покрај тоа што џихадистите со експлозиви минатата година разорија неколку древни градби, фунцкионер на сириската влада за старини изјавил за агенцијата во саботата дека другите антички споменици во градот „преживеале“. Снимките коишто претходно деновиве беа објавени на сириската државна телевизија во текот на армиското напредува во Палмира, покажуваа дека колонадите од античките столбови и лакови сé уште стојат./крај/мф/сн

Извор: Макфакс