Македонија
МВР: Еден уапсен за фотографирање гласачко ливче
Еден гласач е уапсен затоа што го го фотографирал гласачкото ливче во општина Гази Баба, а од отварањето на гласачките места па се до 12 часот региситрирани се низа помали инциденти за кои МВР соодветно интервенира, изјави на прес конференцијата Јордан Ламановски, помошник министер за односи со јавност.
Во село Брест лица со црн џип „Хамер“, во 8.30 часот делеле пари на граѓани. По ова, истото возило е забележано во населба Бутел. Од МВР велат дека се преземаат мерки за расчистување на настанот.
Во општина Шуто Оризари, диви таксисти со 14 патнички моторни возила превезувале гласачи до избирачки места и притоа вршеле агитација. Исто така во оваа општина во ОУ „Браќа Рамиз“ во ходникот од училиштето низ кој се оди до гласачките места група од 5-6 лица на гласачите што се движеле по ходникот им сугерирале да заокружат реден број на гласачкото ливче. Во општината забележани се две возила без регистарски таблици со обележја на вратите од Дирекција на заштита и спасување, кои во повеќе наврати носеле гласачи до гласачките места.
Ламовски изјави дека е добиена пријава за агитирање гласачи околу пазарот во Ѓорче Петров. Агитирањето во повеќе наврати го вршеле лица со возило „Сеат Леон“.
Поради фотографирање на гласачкото ливче со мобилен телефон на гласачкото место во училиштето „Кочо Рацин“ во скопската општина Ѓорче Петров приведено е лицето З.Д. (37) . Поради овој случај гласањето на ова место било во прекин од 8.25 до 8.35 часот.
Случај на фотографирање на гласачкото ливче има и во Валандово. Околу 9 часот на гласачкото место во Кино Валандово З.П. откако гласал го фотографирал ливчето и заминал. Полициски службеници излегле на лице место и се работи на расчистување на случајот.
Во скопската општина Чаир е приведено лице на чие возило на местото на регистарските таблици биле испишани пароли да се гласа за една политичка партија.
На избирачкото место во село Здуње- Гостивар Ј.С., вработен во МВР се појавил на избирачкото место во својство на контролор на една политичка партија. Во општинската изборна комисија имало решение за негово ангажирање како контролор, но откако на избирачкото место настанал проблем, истиот бил отстранет и отстранувањето било нотирано во записникот. Веднаш е ангажиран и Одделот за внатрепшна контрола и професионални стандарди за проверка на случајот.
Во Одделот за внатрешна контрола, криминалистички истраги и професионални стандарди примено е и известување дека на избирачко место во село Долно Седларци- Општина Брвеница, И. Т., вработен во СВР Тетово кој е одреден за обезбедување на избирачкото место, агитирал гласачите да гласаат за одредена политичка партија. Се работи на расчистување на случајот.
Полициски службеник, кој не бил на работа, пријавил дека на неговиот мобилен телефонски број му се јавило женско лице кое се претставило како колешка, и му рекла зошто се јавувал на 192 и со закана „нека му ја мисли“ ако победи нејзината партија.
„Сакам да потенцирам дека злоупотребите од страна на вработени во МВР, доколку се докажат, најстрого ќе бидат санкционирани“, рече Ламановски на прес конференцијата.
На избирачкото место во ОУ „Јосип Броз“ дошло лицето М.Л. кое било под дејство на алкохол и се претставило како набљудувач, не дозволувајќи им на граѓаните да гласаат. Претседателот на избирачкиот одбор побарал асистенција од полицијата и ова лице е приведено. Извршен му е алкотест и утврдено присуство на алкохол од 3,6 промили. Лицето ќе биде задржано во полициска станица до неговото отрезнување.
Во село Нова Колонија во ОУ „Петар Петровиќ Његош“ во училишниот двор имало три машки лица со шалови и партиски обележја на политичка партија кои ги пречекувале лицата што доаѓале на гласање и им сугерирале за кого да гласаат.
Исто така, лице од Хелсиншки комитет пријавило дека на ул. „Боте Боцевски“ пред избирачкото место стоеле неколку лица кои нуделе по 1.000 денари на лица од ромска националност да гласаат за одредена политичка партија.
Во село Драчево, комбе со бела боја превезува гласачи, а има информации и дека се нудат по 1.000 денари за гласање за одредена политичка партија, информираат од МВР./крај/со
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Меџити-Спиропали: во фокусот актуелните случувања
Градоначалникот на Општина Чаир, Изет Меџити ја пречека Елиса Спиропали, министерка за Европа и надворешни работи на Република Албанија, која престојува во официјална посета во Скопје.
Средбата се одржа во пријателска и конструктивна атмосфера, при што беа разгледани актуелните регионални случувања, улогата на албанската дипломатија во зајакнувањето на сеалбанските врски, како и значењето на продлабочувањето на меѓуинституционалната соработка во функција на заедничките интереси на двете држави.
Спиропали и Меџити положија цвеќиња пред споменикот на националниот херој Ѓерѓ Кастриоти Скендербег, во знак на почит кон визијата на овој историски водач за европската ориентација на Албанците, соопштија од кабинетот на Меџити. По тој повод, беше повторно нагласено дека иднината на Албанците е во Европската Унија, како заедница на демократски вредности и успешен модел на институционална, културна и политичка интеграција на сите народи.
„Присуството во Чаир дополнително испрати јасна порака на политичка блискост, институционална поддршка и директно внимание на државата Албанија кон Албанците во Северна Македонија.
Оваа средба го потврди заедничкиот интерес за зајакнување на соработката и институционалната координација, со фокус на развојот, интеграцијата и зачувувањето на вредностите што нè поврзуваат како држави и како народ“.
Македонија
Ѓорѓиевски: Подаривме радост на 100 дечиња од згрижувачките семејства од Скопје и од организационите единици при ЈУ Детски дом „11 Октомври“
Вечерва, срцето на градот чукаше најсилно токму таму каде што се најчистите насмевки.
Со организација на кино-проекцијата на филмот „Биби и Боби“, им подаривме радост на 100 дечиња од згрижувачките семејства од Скопје и од организационите единици при ЈУ Детски дом „11 Октомври“, истакна скопскиот градоначалник Орце Ѓорѓиевски, откако беше организирана посебна вечер наменета за децата од згрижувачките семејства и од ЈУ Детски дом „11 Октомври“.
„Сала исполнета со смеа, возбуда и детска искреност, моменти што нè потсетуваат колку малку е потребно за голема среќа, а колку многу значи вниманието.
По завршувањето на филмот, поделивме новогодишни пакетчиња за сите дечиња.
Како градоначалник, но пред сè како човек, останувам цврсто посветен на создавање можности, поддршка и сигурност за најмладите, особено за децата кои се дел од системот на социјална заштита.
Нивната радост е нашата најголема обврска.
Секое дете заслужува внимание, љубов и убави празнични денови“.
Македонија
Намалена видливост поради појава на магла на неколку патни правци
Сообраќајот на државните патишта се одвива непречено, по наместа влажни коловози.
Намалена видливост поради појава на магла од 50 – 70 метри има на патниот правец Дебар – Струга, од 100 – 150 метри на патниот правец Куманово – Крива Паланка и од 50 – 100 метри на патниот правец Велес – Катланово.
Од 15.11.2025 година започна законската обврска за задолжително поседување на зимска опрема во возилата, без оглед на моменталната временска состојба. Оваа обврска ќе трае до 15.03.2026 година. Повеќе информации може да прочитате на овој линк.
Интензитетот на сообраќај на патните правци надвор од градските средини е умерен. На граничните премини од македонска страна, нема подолги задржувања за влез и излез од државата.
АМСМ препорачува прилагодена брзина на движење, почитување на поставената сообраќајна сигнализација и внимателно управување со возилата, особено на патиштата низ котлините, речните долини и клисурите, каде има можност од појава на одрони. Ова посебно се однесува за делниците Катланово – Велес, Маврово – Дебар – Струга, Виница – Берово и Кочани – Делчево.
Фото: депозитфотос

