Американскиот Сенат не усвои ниеден од четирите законски предлози за зајакнување на контролата на продажбата на огненото оружје, и покрај повиците за итна акција по најмасовното убиство со огнено оружје во поновата американска историја од 12-ти јуни во Орландо. 

За секој од четирите предложени амандмани беа потребни 60 гласови во Сенатот, кој е мнозински републикански, а брои 100 пратеници. Притоа, два од четирите амандмани кои ги предложија самите републиканци, не минаа за само за седум гласови.

Предлозите беа поднесени набрзо по трагедијата во Орландо каде 29-годишниот Американец со авганистанско потекло Омар Матин уби во ноќен геј клуб во овој град 49 луѓе вооружен со полуавтоматска пушка „AR15“ и пиштол, кои ги купил претходно сосема легално со лиценца за поседување и носење оружје како службеник на агенција за обезбедување. Во текот на заложничката криза, според објавените документи, тој во телефонски разговор со оператерите на службата за итни случаи изјавил дека е следбеник на екстремната сунитска организација Исламска држава.

Иако овој инцидент предизвика брза реакција на властите, републиканците и демократите не можеа да постигнат консензус за обемот на какви и да се нови ограничувања во продажбата на огненото оружје.

Предложените измени, и од страна на републиканците и од страна на демократите, особено се однесуваа на зголемувањето на финансиите за проверки на оние кои сакаат да купат оружје, воведување на тридневниот рок во кој Федералното биро за истраги (FBI) ќе ги проверува дали купувачите се осомничени за врски со тероризмот, или на кои им е забраното да управуваат со воздухоплови, како и ограничување на продажбата преку интернет.

Еден од амандманите се однесуваше и на затворањето на „дупките“ во законот, кои овозможуваат купување оружје на саеми, без претходна проверка дали лицата се наоѓаат на американската листа сомнителни лица наклонети кон тероризам.

Републиканскиот амандман, прв од страна на Републиканската партија кои се однесува на какво и да е ограничување на продажбата на оружје, бараше на безбедносните служби да им се овозможи блокирање на продажбата на огнено оружје поради причини од национална безбедност, но демократите со дебатата од дури пет часа го одолговлекуваа донесувањето на одлуката, тврдејќи дека републиканскиот предлог не понудил ништо особено.

Демократите на седницата на сенатот заговараа построга регулација по прашањето на оружјето, но републиканците, како и секогаш досега тоа го нарекоа неуставно барање.

„Секогаш кога имате намера на американските граѓани да им го негирате нивното уставно прави, тоа мора да оди докази, товарот мора да биде на владата и мора да дојде од судот“, изјави Џон Корнин од државата Тексас, кого го цитира агенцијата DPA.,

Администрацијата на актуелниот претседател Барак Обама неколкупати се обиде да ги поостри прописите во САД за продажба на оружјето, но секогаш Конгресот, кој го контролираат републиканците, одбиваше да ги изгласа соодветните закони, кои се однесуваат на уставното право на американските граѓани. Агенцијата Associated Press потсетува дека последните мерки за засилена контрола на купувачите на оружјето е усвоена уште во 2007 година.

Иако слични предлози не минаа и по масакрот во основното училиште во Њутаун во Конектикат кон крајот на 2012 година, како ниту по пукањето во масовното убиство во Сан Бернардино во Калифорнија ланскиот ноември, некои сенатори се упорни дека политиките околу контролата на оружјето мора да се менуваат, како и дека националната безбедност станува сé поважен дел од таа дебата.

Анкетата на Reuters и Ipsos, спроведена минатата седмица, покажува дека 71 отсто од Американците поддржуваат барем умерени регулации и рестрикции на продажбата на оружјето, што е раст за околу 60 отсто отколку кон крајот на 2013 и 2014 година. Во САД кај граѓаните има повеќе од 310 милиони парчиња оружје, што е околу едно парче огнено оружје по жител./крај/мф/сн

Извор: Макфакс