Балканот се наоѓа во состојба многу слична на онаа пред распадот на една заедничка поранешна држава (Југославија), со заострена реторика и отсуство на ЕУ и НАТО, состојба што може да доведе до загрозување на стабилноста, забележа претседателот на Република Македонија, Ѓорге Иванов, во обраќањето на приемот за членовите на дипломатскиот кор, акредитирани во Република Македонија, кој се одржа во петок во Струга.

„Ние на Балканот го чувствуваме отсуството на Европската Унија и на НАТО, што може да ја загрози стабилноста на Балканот. Во последниов период слушаме реторика и гледаме постапки кои по многу нешта потсетуваат на периодот што мислевме дека е далеку зад нас – периодот на распадот на една заедничка поранешна држава. Долго време не ги коментирав изјавите и постапките на некои политичари од соседството затоа што верував дека само со игнорирање можат да се изолираат“, рече претседателот на Република Македонија.

Во говорот пред амбасадорите претседателот Иванов ги истакна придобивките на македонскиот инклузивен демократски модел и додаде дека Република Македонија не се срами и не се обидува да ја потиснува својата мултиетничка, мултирелигиска и мултијазична традиција, туку напротив истата ја институционализираше.

„Наместо енергијата да ја трошат занимавајќи се со слабостите на другите држави, некои лидери од соседството е подобро најпрво да се свртат кон слабостите на сопствените држави. Граѓаните ги избрале за да ги решаваат нивните, а не проблемите и предизвиците на другите држави“, порача Претседателот.

Иванов не ја коментираше политичката криза, само изрази очекување дека политичките партии во постизборните преговори ќе водат сметка за државните интереси на Република Македонија и за националните интереси на македонскиот народ.

„Нема да ве потсетувам дека статус кво состојбата во европската и во евроатлантската интеграција е дел од проблемот, а не од решението на политичката криза во Македонија“, порача Претседателот пред амбасадорите.

Иванов се осврна на мигрантската криза и злоупотребата на масовната миграција, и посочи на два клучни предизвика – да се обезбеди контрола на коридорите преку кои се префрлаат мигрантите и да се обезбеди контрола врз слободното движење на мигрантите кои веќе се наоѓаат на Шенген-територија.

Во рамки на дипломатскиот прием, што според воспоставената практика се одржува надвор од главниот град, претседателот Иванов и членовите на дипломатскиот кор во сабота ќе ја посетат општина Вевчани, црквата „Св. Никола“ и Вевчанските извори./крај/мф