Свет
Трамп и Путин го завршија првиот официјален телефонски разговор
Во саботата вечерта по средноевропско време, по 50 минути заврши долгоочекуваниот во светот телефонски разговор меѓу новиот американски претседател Доналд Трамп и рускиот претседател Владимир Путин, кој се смета за историски и од кој се очекува да ги ресетира американско-руските односи кои се на најниското ниво од крајот на Студената војна, а во чиј тек било разговарано за сите отворени прашања меѓу двете земји, особено за заедничката соработка на рамноправна основа.
Засега Белата куќа не излезе со соопштение за темата и текот на разговорот меѓу двајцата челници, но Кремљ оцени дека телефонскиот разговор меѓу претседателот на Русија Владимир Путин и претседателот на САД Доналд Трамп, минал во „позитивна атмосфера“, и оти двајцата челници разговарале за „борбата против тероризмот, сирискиот конфликт и ситуацијата во Украина“.
На разговорот кој Трамп го водел од Овалната соба, присуствувале и потпретседателот Мајк Пенс, шефот на администрацијата на Белата куќа Рајнс Прибас, советникот на американскиот претседател за национална безбедност Мајкл Флин и советникот за стратешки прашања Стивен Бенон.
Се истакнува дека „во текот на разговорот двете страни покажаа насоченост за активна заедничка работа на стабилизацијата на руско-американската соработка на конструктивна, рамноправна и основи коишто ќе бидат заемно полезни“, се наведува во соопштението на Кремљ.
„Беше истакната важноста на обновувањето на заемните трговско-економски врски меѓу бизнис заедниците во двете земји, што би можело дополнително да стимулира прогресивен и стабилен развој на билатералните односи“, се додава во соопштението на службата за информирање на рускиот претседател.
„Темелно беа разгледувани актуелните меѓународни проблеми, вклучително и борбата против тероризмот, ситуацијата на Блискиот исток, арапско-израелскиот конфликт, сферата на сратешката (нуклеарна – з.р.) стабилност и неширењето на оружјето, ситуацијата околу иранската нуклеарна програма и на Корејскиот полуостров“, се наведува во соопштението објавено на страницата на Кремљ.
Се додава и дека била отворена и темата на „главните аспекти“ на кризата во Украина и се истакнува дека „беше договорено да се воспостави партнерска соработка за сите овие и други области“, се додава во руската изјава за текот и темите од разговорот меѓу Путин и Трамп.
Бил истакнат и приоритетот на заедничките напори во борбата против најголемата закана – меѓународниот тероризам, при што претседателите повикале на воспоставување вистинска координација на американските и руските акции со цел да се победи џихадистичката организација Исламска држава, како и другите терористички групи во Сирија, според изјавата од Москва.
Исто така, Путин и Трамп се договориле да им дадат инструкции на своите соработници да работат на можните термини и местото на нивната лична средба, и се согласиле да ги продолжат меѓусебните директни контакти.
Русија смета дека по преземањето на должноста на републиканецот Трамп односите меѓу Москва и Вашингтон, коишто според оцените на руските челници во двата мандата на демократскиот претседател Барак Обама биле целосно деградирани, ќе почнат да се подобруваат.
Од друга страна, американските и медиумите во другите западни земји, исто така, со големо внимание го исчекуваа исходот и соопштенијата од разговорот меѓу Трамп и Путин и го сметаат за првиот тест за „ресетирањето“ на руско-американските односи.
Во написите се истакнува дека руските челници го поздравиле разговорот, но со загриженост го следат критичарите на Путин во Вашингтон и во Европа кои стравуваат дека Трамп може, во желбата да ги подобри односите со Кремљ да ги укине санкциите против Русија, наметнати од администрацијата на Обама а потоа и со негов притисок и од Европската унија, поради присоединувањето на црноморскиот полуостров Крим на Руската Федерација, по референдумот од 2014 година на тамошното мнозинско руско и рускојазично население по револуцијата и промената на власта во Киев.
Досега Западот го сметаше тоа за нелегално според меѓународното право руско анектирање на украинската територија, меѓутоа како и што навестуваше Трамп во својата кампања, и многу европски политичари кои пледираат да ја освојат власта, минатата година најавуваа преиспитување на ваквите ставови околу Крим./крај/мф/сн
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Свет
Јулија Навална: На Путин мора да му дојде крајот
Јулија Навална, вдовицата на рускиот опозициски политичар Алексеј Навални, денеска, по повод инаугурацијата на Владимир Путин за претседател на Русија, изјави дека неговиот режим се заснова на лаги и корупција и дека мора да му дојде крајот.
„За мене лично, последните шест години од владеењето на Путин беа годините во кои мојот сопруг, Алексеј Навални, вистински руски патриот, беше прогонуван, отруен со хемиско оружје, суден, мачен во затвор три години, а потоа убиен“, рече Навална и го обвини рускиот претседател за сето тоа. Како што рече таа во видеото објавено на ‘Јутјуб’, со секој негов мандат сѐ се влошува и додаде дека е страшно да се замисли што друго ќе се случи доколку Путин остане на власт.
„Секојдневно ни се крадат огромни суми пари за да се бомбардираат мирните градови“, им порача Јулија на граѓаните на Русија и истакна дека Путин се плаши да ги открие вистинските бројки на жртвите на „крвавата и бесмислена војна што никој не ја сака, освен него“.
Таа рече дека Русија со Путин „нема да има ниту мир, ниту развој, ниту слобода“ и дека тој го изневери ветувањето дадено за време на последниот инаугуративен говор кога рече дека сака мирна Русија, безбедна за нејзините граѓани.
„Пред два месеца Русија доживеа масовна трагедија, еден од најголемите и најстрашни терористички напади во поновата историја. Руските безбедносни сили не успеаја да го спречат и дозволија десетици смртни случаи на наши сограѓани. А сепак мирни поединци секојдневно се апсат поради новинарство, мислења или дури објави на социјалните мрежи“, рече Навална. Таа додаде дека мора да се осигури дека никој во светот нема доверба во Путин, ниту во Русија ниту надвор од нејзините граници.
„Нашата земја моментно ја води лажго, крадец и убиец, но на тоа ќе му дојде крајот. Не откажувајте се, вистината ќе победи“, заклучи Јулија, пренесува „Танјуг“.
Регион
Советот на Европската Унија го усвои планот за раст за Западен Балкан
Советот на Европската Унија денеска даде зелено светло за воспоставување на инструментот за реформи и раст за Западен Балкан.
Ова го претставува финансискиот дел од планот за раст за Западен Балкан, кој на земјите од нашиот регион, вклучително и Србија, им обезбедува шест милијарди евра од буџетот на Европската Унија, две милијарди директна помош и четири заеми.
За да добијат пари, земјите треба да подготват реформски агенди, во кои ќе наведат кои реформи ќе ги спроведат.
Дополнително, предуслови за добивање пари, меѓу другото, се почитување на демократските принципи, слободни и фер избори, медиумски плурализам, независност на судството, владеење на правото.
Дополнителни предуслови имаат и Белград и Приштина, што е видливо поместување во нормализацијата на односите, како и исполнување на обврските што произлегуваат од претходно договорените договори.
Свет
Путин положи заклетва и ја презеде должноста претседател на Русија во нов мандат
Рускиот лидер Владимир Путин денеска на свечената инаугурација во Големата палата во Кремљ положи заклетва и официјално стана претседател на Русија.
Тој ќе остане на функцијата во следните шест години, до 2030 година, пренесува „РИА новости“.
На инаугурацијата присуствуваа сенатори, заменици на државата Дума, судии од Уставниот суд, гувернери, членови на владата, претставници на традиционални верски заедници, странски амбасадори и други гости.
Руските производители на автомобили за оваа пригода специјално го адаптираа претседателскиот автомобил „аурус сенат“, а на пат кон палатата претседателската лимузина беше придружувана од нови електрични мотоцикли „аурус“.
Според Уставот на Русија, владата му ги предава овластувањата на идниот претседател, а министрите ќе продолжат да работат во технички мандат до формирањето нов кабинет.
Премиерот ќе го именува претседателот откога државната Дума ќе ја одобри кандидатурата во рок од две недели.
Новиот премиер ќе го изнесе својот став за структурата на извршната власт, а потоа на државната Дума ќе ѝ предложи кандидати за вицепремиери и министри, освен шефовите на безбедносниот сектор и на Министерството за надворешни работи.
Шефовите на Министерството за одбрана, ФСБ, Министерството за внатрешни работи, Министерството за правда, Министерството за вонредни ситуации и Министерството за надворешни работи ги именува претседателот на Русија по консултација со Советот на Федерацијата.
Путин првпат стана претседател на Русија во 2000 година, а во 2004 година беше реизбран за нов мандат.
Тој не учествуваше на изборите во 2008 година бидејќи Уставот не му дозволуваше да се кандидира повеќе од два последователни мандата.
Откога ја поддржа кандидатурата на Дмитриј Медведев, Путин ја презеде функцијата премиер во мај 2008 година.
Во исто време беа направени измени на Уставот, според кои претседателот не се избира на четири, туку на шест години.
Путин повторно стана шеф на државата во 2012 година, а потоа беше реизбран во 2018 година.
Тој доби право да учествува на изборите во 2024 година по усвојувањето на измените на Уставот во 2020 година.
На претседателските избори во Русија одржани од 15 до 17 март Путин освои 87,28 отсто од гласовите, пренесува „Танјуг“.