Американскиот претседател Доналд Трамп во неговата писмена изјава во неделата дека неговата одлука за привремено суспендирање од 90 до 120 дена за забрана за влез во САД во земјата за имигранти и бегалци од седум муслимански земји не е указ насочен против муслиманите, туку таа мерка е донесена поради безбедност на државата во којашто сепак многу негови противници излегоа на протести.

„За работите да бидат појасни, не станува збор за забрана чијашто цел се муслиманите, како што медиумите тоа погрешно го пренесуваат. Тоа нема никаква врска со верата, станува збор за тероризмот и безбедноста на нашата земја“, порача американскиот претседател Доналд Трамп.

Нагласува дека во светот има повеќе од 40 земји во коишто мнозинството од населението го сочинуваат муслиманите, но не се опфатени со неговиот указ. Додава дека ќе продолжи издавањето на визи за сите земји кога по 90 дене ќе започне да се спроведува новата безбедносна политика.

„Повторно ќе им издаваме визи на сите земји, штом ќе бидеме сигурни дека сме спровеле анализа и сме ја имплементирале најсигурната политика, низ следните 90 дена“, додава Трамп.

Американскиот претседател во петокот воведе четиримесечна забрана за прифаќање бегалци во САД и привремено забрани влегување во земјата на државјани од Сирија, Иран, Ирак, Либија, Сомалија, Судан и Јемен, со образложение дека таа мерка ќе помогне Американците да бидат заштитени од терористички напади. Притоа се предвидува поединечно разгледување на секој случај за сите оние државјани на споменатите земји кои веќе имаат визи, дозволи за престој, се школуваат или лекуваат во САД.

Сепак, десетици илјади противници на Трамп се собраа во некои американски градови и на аеродромите за да протестираат против таа одлука. Во Њујорк, Вашингтон и Бостон бранот протести започна во неделата попладнето, по оние мали протести кои се одигруваа во саботата на аеродромите откако надлежните служби почнаа да ги спроведуваат упатствата на претседателот.
Еден од најголемите неделни протести беше одржан на Менхетен,недалеку од Статуата на слободата во њујоршкото пристаниште, некогашниот симбол за добредојде на американскиот брег. Организаторите процениле дека се собрале десетина илјади луѓе.

Во Вашингтон група се собра кај Белата куќа, извикувајќи пароли за поддршка на бегалците. Двесте демонстранти протестирале на аеродромот „Далес“ крај Вашингтон. Сличен број лица протестирале во неделата и на аеродромот „ЏФК“ во Њујорк, каде што загрижени семејства го чекале роднините кои со часови биле држени на границата.

Организаторите велат дека околу десет илјади луѓе се собрале во Бостон, додеа во Хјустон 500 лица марширале во центарот на градот.

Инаку, и сега фалената политика кон имиграцијата на штотуку заминатиот демократски претседател Барак Обама не можеше да се пофали со некои особени бројки, и беше засилена дури пред крајот на неговиот мандат, меѓу другото и како резултат на критиките од ЕУ дека САД не прават доволно за решавањето на кризата со сириските бегалци. Имено соединетите држави минатата 2016 година примиле и по повеќе десет пати помалку бегалци од Германија, на пример, и повеќекратно помалку од другите европски земји.

Така американската бегалска програма во бројки за 2016-та покажува дека лани на територијата на САД биле примени само 84.995 бегалци од 79 земји. Меѓутоа, забележливо е што речиси третина од нив, или 29.989 бегалци се примени од октомври, при крајот на претседателската кампања, па до крајот на минатата седмица кога Доналд Трамп на 20-ти јануари беше инаугуриран за претседател.

Според националност биле примени 12.587 Сиријци, 9.880 Ирачани, 3.750 Иранци, 9.020 Сомалијци, 1.458 Суданци, 26 Јеменци и еден Либиец.

Од нив 72 отсто биле жени и деца, а 70 отсто од вкупната бројка пристигнале од пет држави: Демократска Република Конго, Сирија, Бурма, Ирак и Сомалија.

САД планирале во 2017 година да примат 110.000 бегалци, или како што потенцираше администрацијата на Обама – 57 отсто повеќе од 2015 година. /крај/мф/сн