Македонија
Албанските партии бараат прифаќање на Платформата за коалиција
По двочасовната средба на потпретседателите на Демократската унија за интеграција и Алијансата на Албанците, на која се очекуваше да се расправа и за наводниот пакет што СДСМ го испратил до нив за евентуална коалиција, сепак од таму само со штури информации и повторување на условот исполнување на сите точки од албанската платформа.
„Денешната средба е средба на работните групи на нашите партии, во духот на платформата за соработка на политичките партии на Албанците. Средбата беше консултативна и разговаравме за најважните точки кои ја приближуваат Македонија кон НАТО и ЕУ“, изјави Теута Арифи од ДУИ.
„Доста конструктивна средба помеѓу двете партии во којашто ги разгледавме сите точки на платформата, за нас како партија е важно да се реализираат сите точки без разлика кој ќе биде во комбинација за идната влада, значи да се имплементираат сите точки“, сподели Арбен Таравари од Движењето за реформи на ДПА.
И покрај најавите, лидерите на партиите Али Ахмети и Зијадин Села не се сретнаа.
Али Ахмети пред неколку дена најави дека нема да се брза во одлуката кого да избере за коалициски партнер од македонскиот блок, при што не ја исклучува можноста да коалицира со ВМРО-ДПМНЕ и покрај тоа што СДСМ се надева на позитивен одговор од ДУИ.
Откако лидерот на СДСМ, Зоран Заев, достави писмени гаранции за барањата од ДУИ, не се знае кога во Мала Речица ќе се изјаснат дали тоа е прифатливо. Јавноста не е запозната со содржината на писмото што е испратено и дали тоа значи дека СДСМ целосно ја прифаќа платформата која на почетокот на јануари ја објавија албанските партии како услов за коалицирање во владата.
„Постигнување целосна јазична еднаквост, употребата на албанскиот јазик на сите нивоа на власта и гаранција за неговата примена како фундаментално и уставно право. Уставот на Република Македонија треба да утврди дека македонскиот јазик и неговото кирилско писмо и албанскиот јазик со неговото писмо се официјални јазици во Република Македонија. Сеопфатна дебата за знамето, химната и државниот грб на Република Македонија, со цел државните симболи да ги рефлектираат општествената мултиетничност и етничката рамноправност“, пишува во албанската платформа.
Откако Никола Груевски не успеа за состави влада во законски предвидениот рок откако му беше доделен мандатот, сите лидери на парламентарни партии беа на средба кај Претседателот Ѓорге Иванов, кој пак за да го додели мандатот повторно побара да му се достави список со потписи на најмалку 61 пратеник, или просто парламентарно мнозинство. Од тогаш никој не успеа да го обезбеди тоа, иако Зоран Заев очекува мандатот да му го додели него и во јавноста се проширија информации дека има и повеќе од потребните потписи.
Претседателот на ВМРО-ДПМНЕ, Никола Груевски, рече дека најголем дел од разговорите со ДУИ биле посветени на прашањето за двојазичноста.
„Се бараше двојазичност на целата територија на Република Македонија, изедначување на македонскиот и албанскиот јазик. Ние им го кажавме нашиот став, дека тоа не треба да се прифати и дека е нелогично да има двојазичност на целата територија во држава во која Македонци има 65, а Албанци 25 отсто“, рече Груевски.
Дали во писмото од СДСМ до ДУИ се прифаќа двојазичност на целата територија на Македонија или не судат други комбинаторики, останува да видиме.
Македонија останува без влада во наредниот период, а поради неизвесната состојба по тоа прашање не се исклучува можноста од одржување нови предвремени парламентарни избори, овојпат заедно со локалните, што треба да се одржат напролет./крај/мф
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Остануваат уште 9 дена изборна кампања: партиските агенди и денеска набиени
Уште 9 дена изборна кампања. И денеска лидерите на партиите, заедно со носителите на листи, како и кандидатите за претседател, ќе ги презентираат своите изборни програми.
Кандидатот за претседател поддржан од СДСМ, Стево Пендаровски, денеска ќе оствари средба со жителите на село Велебрдо и со жителите на општина Маврово.
Гордана Силјановска Давкова, исто така, ќе има средби со граѓани, додека коалицијата што ја поддржува предводена од ВМРО-ДПМНЕ ќе ја презентира програмата за парламентарните избори пред граѓаните во Могила, Ресен, Демир Хисар и Битола.
Претседателот на Движењето ЗНАМ – За наша Македонија, Максим Димитриевски, ќе оствари средби со граѓаните на Крушево, Кичево, Струга и Охрид.
Во Штип на народен собир ќе се обрати претседателот на Левица, Димитар Апасиев.
Првиот човек на ДУИ, Али Ахмети, ќе се сретне со граѓаните на Струга и Дебар, а претседателот на Демократското движење, Изет Меџити, дел од Коалицијата „Вреди“ во рамките на изборните активности ќе даде изјава за медиумите во 12 часот во близина на „Веро“ во Чаир.
Македонија
Основците и средношколците од утре на пролетен распуст
Од утре до 6 мај, учениците од основните и средните училишта ќе бидат на пролетен распуст.
Пролетниот распуст е воведен првпат во оваа учебна година, па затоа има промена и во календарот за настава.
Па така, учебната 2023/2024 година за основците ќе заврши на 17 јуни, а за средношколците, како и во минатите години – на 10 јуни.
Училиштата нема да работат на 8 мај (среда) кога ќе се одржуваат вториот круг од Претседателските избори и Парламентарните избори 2024.
Ден претходно, односно на 7 мај, вторник, во училиштата каде што ќе се организира гласањето, ќе имаат скратени часови и работно време до 11 часот.
Неработните денови поради изборите ќе бидат одработени во работни денови со подолг престој на учениците во училиштата за да се реализираат дополнителни часови.
Учениците во Скопје треба да надоместат и за пропуштената наставата на 30 ноември лани кога во главниот град беше организиран Советот на министри на ОБСЕ.
За планирањето и организирањето на дополнителните часови, Министерството за образование и наука ги задолжи директорите на училиштата.
Македонија
Денеска сончево и топло, промена на времето со пороен дожд и грмежи од први мај
Управата за хидрометеоролошки работи информира дека времето денеска ќе биде сончево и релативно топло со мала до умерена локална облачност. Ќе дува слаб до умерен ветер претежно од североисточен правец. Минималната температура ќе биде во интервал од 3 до 10, а максималната ќе достигне од 21 до 27 степени Целзиусови.
Во Скопје ќе биде сончево и релативно топло со мала облачност и со слаб североисточен ветер. Минималната температура ќе се спушти до 8, а максималната ќе достигне до 26 степени, велат од УХМР.
Стабилното и суво време, сепак, нема да се задржи долго. Веќе од средината на следната седмица, повторно се очекува дожд.
Промената на времето ќе започне уште во среда, на први мај, кога во попладневните часови ќе има услови за локална појава на краткотраен пороен дожд и ретки грмежи. Поголема нестабилност со дожд и чести грмежи се очекува во четврток.