Македонија
Отворени осмите „Вечери на женски права“

Во понеделник вечер во Младинскиот културен центар, со проекцијата на „Сибирска љубов“ беа отворени „Вечерите на женски права“, кои се одржуваат по осми пат.
Годишново издание на оваа манифестација за отворена ја прогласи градоначалникот на Град Скопје, Коце Трајановски.
„На Вечерите на женски права се прикажуваат документарни филмови од поновата регионална и светска продукција на различни теми поврзани со родовата проблематика и истите се проследени со дебати инспирирани од филмовите. Дополнително програмата е збогатена со меѓународна изложба на слики на тема „Супер хероини“, работилници за стрип, фотографија, раскажување и форум театар. Ова секако е настан кој ни нуди можност да го почувствуваме вистинското значење на овој празник, дава можност да размислуваме на еден покомплексен начин, различен од досегашниот. Културен настан кој вклучува уметност, поттикнува разни прашања и креативност и можност за размена на мислења. Нашата работа во иднина ќе биде насочена кон креирање на град, како средина за живеење и работа, во кој мажите и жените ќе имаат еднакви можности за остварување на својот личен, професионален, приватен, интимен, духовен и културен потенцијал. Рамноправното учество на мажите и жените во семејството и во работниот живот заедно со рамноправното учество на мажите и жените во процесот на одлучување сметаме дека се предуслов и основа за развој на еден модерен град“, рече градоначалникот Трајановски.
По проекцијата на „Сибирска љубов“, пред присутните се обрати и режисерката на филмот, Олга Делане, а потоа дискутираше за значењето на филмот и нејзината инспирација за правење на истиот.
Целата програма за осмото издание на Вечерите на женски права може да ја најдете на следната интернет врска: http://www.womensrightsnights.net/program-2017.html
Вечери на женски права (ВЖП) е настан кој традиционално се организира од 2010 година. Настанот, секоја година се одржува во Скопје, на различни локации како МКЦ, Кинотека на Македонија, Градско кино Милениум, Музеј на град Скопје и други.
Настанот „Вечери на женски права“ е резултат на соработка помеѓу Град Скопје, UN Women, Институт за родови студии при Филозофски факултет на „Универзитет Кирил и Методиј“ и „Унивeрзитет за Аудио-визуелни уметности – ЕСРА“, Скопје. Оваа година настанот е во организација на Центар за истражување и креирање политики – ЦИКП Скопје./крај/со/бб
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Нема подолги задржувања за влез и излез од државата

Сообраќајот на државните патишта се одвива непречено, по суви коловози, извести АМСМ.
Интензитетот на сообраќај на патните правци надвор од градските средини е зголемен. На граничните премини од македонска страна нема подолги задржувања за влез и излез од државата.
АМСМ препорачува прилагодена брзина на движење, почитување на поставената сообраќајна сигнализација и внимателно управување со возилата, особено на патиштата низ котлините, речните долини и клисурите, каде има можност од појава на одрони. Ова посебно се однесува за делниците Катланово – Велес, Маврово – Дебар – Струга, Виница – Берово и Кочани – Делчево.
Македонија
Делови од Центар, Аеродром и Ѓорче Петров денеска без струја

Од ЕВН Македонија АД известуваат дека поради технички зафати во електродистрибутивната мрежа денеска, без електрична енергија ќе останат:
· од 08:00 до 14:00 часот, корисниците од улицата Јосиф Јосифовски Свештарот, општина Центар;
· од 08:00 до 15:00 часот, корисниците од улиците: 1 , 2, и 3 во село Долно Лисиче, општина Аеродром;
· од 08:00 до 15:00 часот, корисниците од дел од ул. 3-та Македонска Бригада, поточно објектите во околината на СУГС Владо Тасевски, oпштина Аеродром;
· од 09:00 до 13:00 часот, корисниците од дел од ул. Црногорска, општина Ѓорче Петров.
Македонија
Претежно сончево и топло, максималната температура до 37 степени

Времето денеска ќе биде претежно сончево и топло. Ќе дува слаб до умерен ветер од јужен правец.
Минималната температура ќе биде во интервал од 7 до 17, а максималната ќе достигне од 30 до 37 степени.
Во Скопје, сончево и топло со слаб до умерен ветер од јужен правец. Минималната температура ќе се спушти до 13, а максималната ќе достигне до 37 степени.
Времето во наредните денови
Во сабота попладне, во текот на ноќта и во недела претпладне ќе биде нестабилно со локален пороен дожд и грмежи. Ќе дува умерен, наместа засилен јужен, а во недела северозападен ветер, кој ќе услови опаѓање на дневната температура. Потоа следува период на стабилно и потопло време.