Грчката Влада води тајни и заткулисни преговори во парламентот со цел да обезбеди мнозинство од 180 пратеници за изборот на шеф на државата, за време на гласањето во февруари следната година, пишуваат грчките медиуми.

Главната цел на овој „лов” на гласови се независните пратеници во парламентот, со кои владејачката коалиција може да го обезбеди потребното мнозинство без договор и без да подлегне на уцената и условите на опозициските партии, пишува атинскиот весник Ethnos.

Според весникот, консултациите околу обезбедувањето на „претседателско мнозинство“ влегле во финална фаза, односно „сите играат со отворени карти и кројат планови за тоа што ќе биде по изборот на новиот шеф на државата“, наведува Ethnos.

Според грчките аналитичари, доколку грчкиот премиер Андонис Самарас успее да постигне договор со „тројката“ меѓународни кредитори за намалувањето од спасувачкиот план, тогаш би можел да обезбеди и доволно мнозинство за избор на претседател и да избегне предвремени избори. Според грчкото законодавство, доколку парламентот не успее да избере шеф на државата, тој се распушта и се закажуваат предвремени избори, а токму на ова сценарио се надева опозициската Коалиција на радикалната левица (СИРИЗА).

Последните анкети во земјата покажуваат дека ако во моментов се одржат избори, СИРИЗА би добила 21,7 проценти од гласовите, а Нова демократија – 18,4 отсто. Следат новата партија „Реката“ со 6,9 отсто, Комунистичката партија на Грција со 4,1 процент, „Златна зора“ со 4 отсто, ПАСОК со 3,7 отсто и партијата „Независни Грци“ со 2,6 проценти. Од резултатите станува јасно дека ниту една партија не би можела самостојно да формира влада./крај/мф/бс