Американските разузнавачки служби проценуваат дека од 2011 година речиси 30.000 странски џихадисти влегле во Сирија и во Ирак, што е двојно повеќе отколку што се проценуваше пред една година, пишува весникот The New York Times.

Од овие 30.000 странски борци, меѓу кои голем дел се западни државјани, околу 250 доаѓаат од Америка, а минатата година ги имало стотина, истакнува весникот, повикувајќи се на извори од американскиот разузнавачки врв.

Повеќето странски џихадисти кои доаѓаат од сто земји, ѝ се приклучиле на Исламската држава којашто пред една година зазема големи делови од Сирија и Ирак, на кои прогласи „калифат“ кој опфаќа површина од околу 90.000 квадратни километри.

Американските челници кои зборувале за The New York Times пред една година проценија дека во двете споменати земји на Блискиот исток влегле 15.000 странски борци од 80 земји.

Американскиот претседател Барак Обама во вторник во Њујорк по повод Генералното собрание на ОН ќе го предводи меѓународниот собир за борбата против Исламската држава. Се очекува претходно во понеделникот, рускиот претседател Владимир Путин да ја изнесе својата иницијатива за справување со екстремните исламистичко организации во регионот на Блискиот исток.

САД повеќе од една година ја предводат воената коалиција од шеесетина земји која изведе илјадници воздушни удари врз позициите на Исламската држава во Сирија и Ирак. Од друга страна, во саботата беше објавено дека Русија, Сирија, Ирак и Иран, во ирачката престолнина Багдад воспоставиле заеднички центар за размена на информации и координација на операциите против споменатата радикална организација.

Како што наведува NYT, дуплирањето на бројот на странските борци оди во прилогот на претпоставката дека коалицијата против Исламската држава наидува на тешкотии, во прв ред кога станува збор за запирањето на бранот џихадисти во земјите членки и за размената на разузнавачките податоци.

Меѓутоа, процените на CIA од почетокот на август годинава говорат дека и покрај нападите, терористичката групација е исто толку моќна како што беше и пред една година. Исламската држава, според процените на експертите, има војска меѓу 20 и 30 илјади луѓе, а според некои процени досега имала прилив меѓу 50 и 200 илјади луѓе од повеќе од 80 земји и региони во светот.

Исламската држава, со поддршка на другите радикални сунитски групи, со ненадејна офанзива летото 2014 година зазема големи територии од Ирак, кои ги поврза со областите кои ги контролира во соседна Сирија на кои прогласи ткн „калифат“. Во моментов Исламската држава под контрола има една третина од територијата на Ирак, а во покраината Анбар контролира околу 80 отсто. Во Сирија, пак, џихадистите контролираат околу 40 отсто од територијата, така што вкупната површина зафаќа територија со големина на Велика Британија.

Џихадистичката Исламска држава се смета за најбогатата терористичка организација на светот, а нивните приходи доаѓаат од продажба на црниот пазар на нафта и гас од наоѓалиштата во Ирак и во Сирија, , како и од продажба на древни скапи артефакти од истите области. Пари собира и од даноци што им го наметнува на жителите во областите кои контролираат кои не се муслимани, како и од наплати на откупи за странските државјани кои ги држат во заложништво./крај/мф/сн

Извор: Макфакс