Илјадници ирански и ирачки борци пристигнуваат на помош на војската на владата на сирискиот претседател Башар ал-Асад во одбрана на сириската престолнина Дамаск од џихадистите на сунитската организација Исламска држава (IS) која освои големи делови од Сирија и соседен Ирак каде што изворите на вода за пиење почна да ги користи како оружје, јавуваат агенциите.

Против сунитската радикална терористичка организација Исламска држава се бори меѓународната коалиција предводена од САД која од вторникот претпладнето извела 18 воздушни удари врз позициите на џхадистие во ирачките градови и четири во Сирија, но според општите оцени овие напади започнати ланската есен немаат големи резултати.

„Последните седмици 7.000 ирачки и ирански борци пристигнаа во Сирија и нивната првенствена цел е да ја одбранат престолнината Дамаск. Најголем е ирачкиот контингент, а се очекуваат вкупно 10.000 луѓе кои ќе им се придружат на сириската војска и на провладините милиции“, изјавил за агенцијата AFP припадник на сириските безбедносни служби во Дамаск кој говорел под услов да остане анонимен.

Другата фаза од нивната задача ќе биде да се врати контролата врз градот Џиср ал-Шугур, кој е влез на средоземниот брег и покраината Хама во централна Сирија, коишто борците на Исламската држава и на Џебхат (Фронтот) ан-Нусра, сириски огранок на Ал Каеда, на 25-ти април го заземаа од сириската војска.

Голема офанзива против Исламската држава најави и командант на иранските борци. „Следните денови светот ќе биде изненаден од она што го подготвуваме во соработка со сириските воени челници“, изјави генералот Гасем Сулејмани, командант на иранските сили на Гардата на чуварите на исламската револуција, пренесуваат иранските агенции.

Џихадистите и бунтовниците им нанесоа низа порази на сириските сили, кои од иранските и руските сојузници побараа поголема конкретна помош, изјави за AFP неименуван сириски политичар.

Владата во Дамаск од почетокот на бунтот во март 2011 година тврди дека сунитските Саудиска Арабија, Катар и Турција, преку своите диверзанти и тајни служби го подигнаа бунтот во рамките на ткн Арапска пролет, со поддршка на сунитскта ткн умерена опозиција којашто ја поддржува и Западот, но и на радикалните сунитски групи. Конфликтот набрзо прерасна во меѓу конфесионален, бидејќи овие држави, како и Западот, бараат соборување на сирискиот претседател Башар ал-Асад, кој доаѓа од алавитската (шиитска) заедница, и ја има поддршката на сириските сунитски клерици, христијаните, Друзите, а значителната курдска заедница се држи резервирано во судирот и се обидува да ја зацврсти својата контрола врз териториите на кои живеат Курдите а се напаѓани од џихадистите.

Официјален Дамаск повторно во средата ги потврди обвинувањата за странската поддршка на бунтовничките сунитски групи кои до пред извесен период војуваат меѓу себе и со исламистите, но во последните месеци заедно ја напаѓаат сириската војска.

Минатата седмица командантот на Фронтот ан-Нусра, Абу Мохад ал-Џолани изјави дека неговата мисија „во Сирија е да го урне режимот, неговите симболи и сојузници“, што се совпаѓа и со од Западот поддржуваната ткн умерена сунитска опозиција.

Исламската држава којашто на сириското боиште се појави во 2013 година и набрзо се издвои како најбрутална, најдобро вооружена и најорганизирана бунтовничка група и зазема големи територии од Сирија, во летото 2014 година објави дека се одвојува од ал Каеда и со ненадејна офанзива освои големи територии и во Ирак на кои прогласи ткн калифат.

Џихадистите од Исламската држава ги затворија испустите од браните на реката Еуфрат во западен Ирак и со тоа ги загрозија резервите од вода за пиење, објавија во средата локалните функционери. Џихадистите го пренасочиле водениот тек во своја полза на боиштето околу градот Рамади. Така, нивната тактика се заканува со суша во јужните покраини и резервите од вода паднале на загрижувачки нивоа, пишува агенцијата Reuters.

Исламската држава и порано се обидуваше водата да ја користи како оружје во војната против ирачката влада.

Портпаролот на гувернерот на ирачката покраина ал-Анбар, чиј главен град е Рамади, изјави дека ирачките сили сега мора да се прераспределат по должината на целата река за да го спречат инфилтрирањето на сунитските бунтовници. Покраинскиот совет на Анбар се состана во средата во потрага по стратегија со која ќе се одговори на тактиката на џихадистите.

Жителите на Рамади велат дека бунтовниците, сепак, оставиле два испуста отворени, очигледно за да го избегнат поплавувањето на подрачјата кои се под нивна контрола. Меѓутоа, ја повикуваат владата во Багдад да дејствува брзо, бидејќи „во спротивно последиците и катастрофата за околината ќе бидат неизбежни“, вели Фалих ал-Есави, висок функционер на безбедносните служби во покраината ал-Анбар./крај/мф/сн

Извор: Макфакс