Возачот на Хрватот Томислав Салопек, кој беше киднапиран и погубен од страна на џихадистите од терористичката организација Исламска држава (IS -ИД), рекол дека тој на денот на киднапирањето требало од Египет да отпатува за Хрватска, пренесува хрватскиот весник Vecernji list.

Возачот Махмуд Метвали требало да го однесе Салопек на аеродромот, бидејќи му истекол договорот за работа и требало да се врати во својата татковина.

„Томислав на 22-ри јули ги спакува своите работи, се подготвуваше да оди дома за летните одмори, но никогаш не стигна дома. Го киднапираа злосторници и терористи, и го убија без милост. Киднапирањето се случи брзо и молневито, исто како во акционите филмови. Се договоривме на 23-ри јули да дојдам по него и да го однесам на аеродромот“, раскажува Метвали.

Исто како и Салопек, и Метвали бил вработен во француската компанија CGG, а според неговите тврдења работата во Египет за Салопек била лесна, поради тоа што тој работел во уште поопасни земји како Сирија и Либија.

„Бевме во службениот автомобил на компанијата, пo извозени 90 километри застанавме да се одмориме. До тој момент сé беше во ред, го продолживме патувањето, а улицата во раните утрински часови беше празна, како и обично. По десет минути возење од паузата, зад нас се појави автомобил и почна да блиндира. Забавив, сакав да го пропуштам, но се шокирав кога погледнав кон автомобилот. Маскиран човек за неколку секунди низ прозорецот извлече пушка и ја впери кон мене“, вели Метвали.

Тој потоа раскажува дека терористот му сигнализирал да го сопре автомобилот, упатувајќи закани.

„Викаше дека ќе нé убие ако не застанеме. Закочив, а четири маскирани лица, кои како да беа подготвени за киднапирање, излегоа од возилото, наредија да излеземе и да легнеме на земја. Не беа во војнички униформи, туки имаа бедуинска облека, здолништа под кои имаа пантолони, а лицата им беа маскирани со палестински марами. Нé врзаа и нé фрлија во кабината, а еден од нив зад нас го возеше нашиот автомобил“, наведува Метвали.

Според него, работите се случувале толку брзо што не биле свесни за тоа што всушност се случува.

„По четири километри возење застанаа, ме одврзаа и ме исфрлија, а со врзаниот Томислав го продолжија патот. Истрчав до полициската станица. Веднаш беше започната потрага по Томислав, а набрзо го пронајдоа и нашиот автомобил. Потоа и автомобилот со кој беше извршено киднапирањето“, заклучува Метвали.

Хрватот Томислав Салопек од страна на припадниците на ИД беше киднапиран на 23-ти јули, а на 8-ми август се појави во видео снимка на Исламска држава, која неколку дена подоцна објави дека го погубила./крај/мф/бс