Шеснаесетгодишник од скопското село Кодново од страна на Одделението за малолетничка деликвенција и семејно насилство, со кривична пријава до надлежното Основно јавно обвинителство Скопје е предаден поради основано сомневање дека сторил кривично дело „Тешка телесна повреда“, при што се повредени две малолетни лица негови соселани.

За стореното кривично дело казниво по член 131 од КЗ, од страна на судија во претходна постапка, на малолетникот идентификуван со иницијалите Ф.А. му е одредена мерка притвор во траење од 30 денови.

Пријавениот малолетник е од претходно регистриран насилник, кој во временскиот период од 2012 до 2014 e кривично пријавен за „учество во тепачка“ и „насилство“, а во истиот период е и четири пати прекршочно пријавен за физички напад. Последниот инцидент се случил на 8-ми септември кога околу 21,30 часот во селото Кондово, прво физички нападнал двајца малолетници, а потоа со нож им нанел повеќе убодни рани.

Повод за насилството било тоа што двајцата нападнати малолетници одбиле да му бидат другари, што според репутацијата на Ф.А., подразбирало да учествуваат или да извршуваат кривични дела. Притоа тој на посочениот датум околу 20,30 часот во угостителски објект во населбата Ѓорче Петров им пришол на двајцата малолетници и им кажал дека ќе ги чека да разговараат во Кондово, во близина на објектот на старата општина, место кое е напуштено и неосветлено.

По кусо време, двајцата малолетници со возило управувано од нивен пријател се упатиле од Ѓорче Петров кон Кондово, со намера да си одат дома, но пред домот на едниот, Ф.А. со мотор им го пресекол патот и почнал вербална расправија со нив, која прераснала во тепачка, во која пријавениот употребил нож, нанесувајќи им повеќе убодни рани на двајцата малолетници.

Двајцата малолетници од страна на нивните родители беа пренесени во Градската општа болница „8-ми Септември“, каде на двајцата им се констатирани тешки телесни повреди (повреди со нож, убодни рани по главата и телото), двајцата се задржани на натамошно лекување, а на едниот од нив му е извршена и хируршка интервенција.

Веќе наредниот ден Ф.А. е пронајден и приведен од страна на полициските службеници од Единицата за прв одговор и интервенција АЛФА, а пота е предаден во полициска станица за понатамошна постапка./крај/мф/сн

Извор: Макфакс