„Расипничкото и девијантно однесување на Владата на СДСМ не запира. Вчера разбравме дека нема никаков готов проект за нов клинички центар и дека не им е јасно каде ќе биде лоциран, односно, како што велат, некаде меѓу Злокуќани и Бардовци. Покрај тоа, Mинистерството за здравство преговара со кредитори за обезбедување финансиски средства“, изјави Игор Николов, член на ИК на ВМРО-ДПМНЕ.

Според него, се поставува прашањето кои се тие кредитори и каква е сериозноста на овие преговори? Дали само се зборува за ново задолжување кое повторно ќе го платат граѓаните? И која е логиката да се преговара за нешто за што нема никаков план? „Колку за споредба, владата на ВМРО-ДПМНЕ има подготвено проект од консултанти и експерти од Шпанија, Германија и од Франција, а потпиша и договор за изградба на нов клинички центар со целосна поддршка и финансирање од Банката при Советот на Европа. Истиот тој договор СДСМ сака да го раскине и е подготвен да плати милиони евра, нормално, не од своите, туку од џебот на народот. Идејата на Зоран Заев за раскинување потпишан договор за клинички центар ќе ја платат сите граѓани, и тоа во висина од најмалку 7,5 милиони евра колку што претпоставува СДСМ. Според меѓународната пракса, сепак пеналите што треба да се платат за раскинување ваков договор може да достигнат и до 10 отсто од сумата на договорот или околу 12 милиони евра народни пари“, додаде Николов.

Тоа апелира Заев и Филипче да се откажат од сомнителните договори, да се откажат од прекинување на договорот за градба на клинички центар и да не дозволат граѓаните да се лекуваат до 2030 година во несоодветни услови и застарени згради.