Македонија
(Видео) Чомовски: Копилињата во партиите се многу поопасни
„Копилиња во македонското новинарство има, тие се качени на бродот ‘Титаник’ и се препознаваат. Жал ми е што некои од нив ќе завршат само како даночни затајувачи“, вака новинарот Александар Чомовски ги коментира последните случувања во медиумите и заканите врз претседателот на Здружението на новинарите, Насер Селмани.
„Не е проблемот во ‘копилирањето’. Копилињата во политичките и партиските ергелиња се многу поопасни, поагресивни и демонски настроени врз слободата и демократијата. Овој протест е сосема легитимен за еден континуиран бунт на новинарите кои се обидуваат барем елементарно да стават некаква брана за полуписмени, полунезнајни, полубандитски партиски функционери со кои, најверојатно, партиските шефови треба да се справуваат, а ние да ги нотираме на начин на кој тоа го правиме“, вели Чомовски за „Макфакс“.
Чомовски вели дека не треба никој да се заморува со тоа дали во цела Македонија ќе пишуваат навредувачки написи за него, дали ќе биде во топ-5 прислушувани новинари во Македонија и слично, туку треба да се надмине, како што вели, овој лош период на новинарството.
„Сè додека со јавното мислење се обидуваат да владеат разни бекировци, мекировци, синџировци и додека зад нив стојат разни ментори, без оглед дали се од досегашната власт или од сегашната актуелна владејачка гарнитура, мора да преземеме чекори за справување со насилството, сè дотогаш новинарите имаат право да го бранат својот интегритет“, додава Чомовски.
Потсетувајќи се на двајцата убиени новинари на Малта и во Словачка, Чомовски прашува дали тоа треба да се случи и во Македонија за да заминат бандитите што сè уште мислат дека владеат со оружјето и парите.
„Мислам дека во моментот не сме на таа граница за да имаме инциденти како на Малта и во Словачка. Најлесно е да влезеш во таа перцепција. Ако вака продолжиме, тешко дека ќе можеме да се справиме. Јас бев на сите воени боишта, па и таму каде што Бекир Асани бранеше или напаѓаше, но никој од неговите соборци, на чело со тогашниот командант Али Ахмети, не се осмели да нè нарече копилиња. Тие имаа доверба во моќта на новинарите кои тогаш застанаа зад нивните основи премиси, а тоа се слобода, демократија и човекови права“, рече новинарот Чомовски.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Одлуки за учество на припадници на Армијата на вежби во Германија, Бугарија, Косово
Владата на денешната седница донесе и повеќе одлуки на предлог на Министерството за одбрана, меѓу кои и за испраќање на припадници на Армијата на Република Северна Македонија за учество на вежбата „BEYOND HORIZON 24“, во Република Бугарија, за испраќање на припадници на Армијата на Република Северна Македонија за учество во НАТО операцијата „КФОР“ во Република Косово и за испраќање на припадници на Армијата на Република Северна Македонија за учество на вежбата „Combined Resolve 24-2“ во Сојузна Република Германија.
Македонија
Личните документи ќе можат да се подигнат и в среда, извести МВР
Во пресрет на претстојните Претседателски и Парламентарни избори што ќе се одржат утре, Министерството за внатрешни работи ги известува граѓаните дека Одделот за граѓански работи, односно сите отсеци за управни работи на оваа организациона единица при МВР на 08.05.2024 ќе работат за издавање на лични документи со работно време од 08.00 до 19.00 часот.
„Исто така ги известуваме граѓаните дека сите барања за лични карти кои се поднесени до 03.05.2024 година, се веќе изготвени и граѓаните можат да ги подигнат“, соопшти МВР.
Македонија
Пронајдени три полуавтоматски пиштоли и 139 куршуми, ОЈО Велес отвори истрага за недозволено држење оружје
Основното јавно обвинителство Велес донесе Наредба за спроведување истражна постапка против едно лице за кривично дело – Неовластено изработување, држење, посредување и тргување со оружје или експлозивни материи од член 396 став 5 во врска со став 3 на Кривичниот законик.
„При претрес во домот на осомничениот во селото Мелница, општина Чашка, полицијата пронашла поголемо количество оружје и муниција – три полуавтоматски пиштоли и 139 куршуми со различен калибар. За осомничениот поднесен е предлог за определување мерка притвор“, соопшти Обвинителството.
ОЈО Велес продолжува да постапува и да презема дејствија за проверка на сомненијата за изборен поткуп во однос на овој осомничен и на уште едно лице во велешко кај кое во текот на вчерашниот ден беа извршени претреси, се додава во соопштението.