Македонија
Едночасовна пауза во Собранието, Џафери го прескокна законот за јазиците

По барање на пратениците од ВМРО-ДПМНЕ, претседателот на Собранието, Талат Џафери, даде еден час пауза на седницата што траеше околу половина час, а на која на дневен ред е законот за јазиците. Додека опозицијата извикуваше: „Пауза, пауза“, пратениците од владејачкото мнозинство изгласаа измени во Законот за минералните суровини и во Законот за продажба на земјоделското земјиште. Џафери го прескокна законот за јазиците, кој беше прва точка на дневен ред.
ВМРО-ДПМНЕ побара пауза на седницата за Комисијата за мандатно-имунитетски прашања да се изјасни за амандманите.
Пратеникот на ВМРО-ДПМНЕ, Илија Димовски, петнаесет минути од собраниската говорница објаснуваше дека Деловникот и Уставот се прекршени бидејќи не се дозволува разгледување на амандманите. Тој во своето излагање ја спомена и УЧК, по што реагираа пратениците.
„Собранието е свесно дека носи неуставен закон, пратениците се свесни дека го кршат Деловникот. Отворам спор за примена на Деловникот и барам од Комисијата за мандатно-имунитетски прашања да каже дали може или не може да се поднесуваат амандмани. Вашето тврдење дека Собранието не е должно да разгледува дали законот е уставен е неточно, тоа е исто како работници од фабрика да не кажат дали производите се расипани или не“, рече Димовски.
Димовски му се обрати и на Џафери дека тој што седи на претседателскиот стол треба да зачува ред, да постапува според законите и Уставот. Тој му рече на Џафери дека доколку му се важни партиските барања на ДУИ, тогаш да продолжат со незаконско работење.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Непречен сообраќај по влажни коловози низ државата

Сообраќајот на државните патишта се одвивa непречено, по влажни коловози, извести АМСМ.
Интензитетот на сообраќај на патните правци надвор од градските средини е умерен. На граничните премини од македонска страна нема подолги задржувања за влез и излез од државата.
АМСМ препорачува прилагодена брзина на движење, почитување на поставената сообраќајна сигнализација и внимателно управување со возилата, особено на патиштата низ котлините, речните долини и клисурите, каде има можност од појава на одрони. Ова посебно се однесува за делниците Катланово – Велес, Маврово – Дебар – Струга, Виница – Берово и Кочани – Делчево.
Македонија
Без струја дел од Гази Баба

Од ЕВН Македонија АД известуваат дека денеска без електрична енергија ќе останат:
– во периодот од 09.00 до 12.00 часот, корисниците од улица Трубарево – крак 2, општина Гази Баба.
Македонија
Променливо облачно со повремени врнежи од дожд

Времето денеска променливо облачно со повремени врнежи од дожд, пообилни во источните делови (над 15 l/m2). Ќе дува слаб до умерен ветер од северен правец.
Минималната температура ќе биде во интервал од 4 до 10, а максималната ќе достигне од 12 до 17 степени.
Во Скопје, променливо облачно со повремени врнежи од дожд. Ќе дува слаб до умерен ветер од северен правец. Минималната температура ќе се спушти до 9, а максималната ќе достигне до 16 степени.
Во сабота времето ќе биде променливо облачно со сончеви периоди и со услови за локална појава на нестабилност со пороен дожд, грмежи и засилен ветер.
Во недела ќе има брз продор на студена воздушна маса од север и врнежи од дожд, на планините и на повисоките места од снег.
Ќе дува засилен северен ветер, температурите значително ќе опаднат и врнежи од снег се очекуваат и во некои од пониските места.
Во понеделник наместа ќе провејува слаб снег, а утринските температури на повеќе места ќе бидат негативни.